ໜູນິ້ມ ສາວທັນຕະແພດສາດ ກ້າວຜ່ານຄຳດູໝິ່ນຈາກຄົນອ້ອມຂ້າງ ສູ່ເວທີນາງສາວລາວ 2018

ນາງ ທິບ​ພະຈັນ ສົມບູນ​ທິບ ຫຼື ໜູນິ້ມ ປັດຈຸບັນກຳລັງສຶກສາທີ່ ມະຫາວິທະຍາໄລ ວິທະຍາສາດສຸຂະພາບ ຄະນະທັນຕະແພດສາດ ​ແລະ ວິທະຍາໄລລາວອາເມລິກາ.

ໜູນິ້ມ ເປີດເຜີຍກັບ muan.la ວ່າ “​ໃນຄວາມໄຝ່ຝັນຂອງ​ນ້ອງ​ຢາກ​ຈະເປັນນັ້ນ ກໍ່ຄື: ການໄດ້ເປັນນາງສາວລາວ ​ເຊິ່ງຄົນເຮົາຈະເຮັດຫຍັງອອກມາໄດ້ດີກໍ່ຕໍ່ເມື່ອເຮົາຮັກ ແລະ ມັກໃນສິ່ງນັ້ນ​ແທ້, ສ່ວນຕົວນ້ອງແລ້ວການທີ່ເຮົາເຂົ້າປະກວດນັ້ນກໍ່ຄືກັບການຮຽນໜັງສືອີກວິຊາຫນຶ່ງທີ່ສອນໃຫ້ເຮົາຮູ້ຈັກກ້າສະແດງອອກ, ຮູ້ຈັກແກ້ໄຂສະເພາະໜ້າ ແລະ ທີ່ສຳຄັນຄືການໄດ້ຢູ່ຮ່ວມກັນໃນສັງຄົມກັບຄົນກຸ່ມໃໝ່, ກັບຄົນທີ່ເຮົາບໍ່ເຄີຍຮູ້ຈັກມາກ່ອນ ​ໂດຍມັນຈະເຮັດໃຫ້ເຮົາປັບຕົວເອງໃຫ້ເຂົ້າກັບສັງຄົມ ແລະ ສາມາດຊ່ວຍເຫຼືອສັງຄົມໄດ້ຫຼາຍຂຶ້ນ”.

“ໃນການປະກວດຄັ້ງນີ້, ນ້ອງກໍ່ບໍ່ໄດ້ຄາດຫວັງຫຍັງຫຼາຍ ເພາະເຮົາມາເຮັດຕາມຝັນ ແລະ ເຮັດໜ້າທີ່ຂອງເຮົາໃຫ້ດີທີ່ສຸດ, ​ຫັນ​ໄດ້​ວ່າຜ່ານມານ້ອງບໍ່ໄດ້ເປັນຄົນງາມມາກ່ອນ ນ້ອງຈະ​ເປັນ​ຄົນຕຸ້ຍ ຈົນຫຼາຍໆຄົນມັກຈະເວົ້າໃຫ້ວ່າ ຂີ້ລ້າຍ ໜູໝູນິ້ມ ຕຸ້ຍ ຍັງກ້າຄິດຢາກເປັນນາງງາມ ສາລະພັດຄຳດູຖູກ ເຊິ່ງນ້ອງກໍ່ບໍ່ໄດ້ຄຽດ ຫຼື ຊັງພວກເຂົາ ແຕ່ນ້ອງເກັບເອົາຄຳເວົ້ານັ້ນ ເພື່ອມາພິສູດໃຫ້ຄົນອື່ນເຫັນວ່ານ້ອງສາມາດພັດທະນາໂຕເອງໃຫ້ດີຂຶ້ນໄດ້ ແລະ ມາຮອດຈຸດນີ້ບໍ່ວ່າຜົນຈະອອກມາເປັນແບບໃດນ້ອງໄດ້ເຮັດທຸກໆມື້ຢ່າງເຕັມທີ່ທີ່ສຸດແລ້ວ ເທົ່ານີ້ນ້ອງກໍ່ໄດ້ຊະນະໃຈໂຕເອງ ແລະ ພູມໃຈທີ່​ສຸດ”.

“ສຳລັບ​ຜົນງານ​ຜ່ານ​ມາ ​ແມ່ນຕອນນ້ອງໄດ້ຮຽນຈົບຊັ້ນມັດທະຍົມຕອນປາຍ ນ້ອງກໍ່ໄດ້ຄະແນນສອບເສັງຈົບຊັ້ນເປັນ ອັນດັບ 1 ຂອງແຂວງ, ໄດ້ເຂົ້າຮ່ວມປະກວດນາງສາວທິດາເຜົ່າແຂວງເຊກອງໄດ້ຕຳແໜ່ງຮອງອັນດັບໜຶ່ງ, ​ເຊິ່ງຕອນ​ນີ້ກຳລັງໃຈທີ່ສຳຄັນທີ່ສຸດກໍຄືຄອບຄົວ ທີ່ຊ່ວຍໃຫ້ກຳລັງໃຈ ແລະ ຊ່ວຍສະໜັບສະໜູນນ້ອງຢ່າງເຕັມທີ່. ສຸດທ້າຍນ້ອງຢາກເປັນແຮງບັນດານໃຈໃຫ້ກັບສາວໆຫຼາຍໆຄົນທີ່ຂາດຄວາມໝັ້ນໃຈ ເພາະນ້ອງກໍ່ເຄີຍເປັນມາກ່ອນ ແລະ ຝາກເຖິງຜູ້ຊົມທັງຫຼາຍຊ່ວຍໂຫວດ ຊ່ວຍເຊຍ ແລະ ສົ່ງກຳລັງໃຈໃຫ້ ນິ້ມ ໝາຍເລກ ML9 ຕົວແທນຈາກແຂວງເຊກອງ ແລະ ຊ່ວຍເປັນກຳລັງໃຈໃຫ້ພວກເຮົາທັງ 40 ຄົນແນ່ເດີ ທຸກໆການໂຫວດ ທຸກໆສຽງເຊຍຄືແຮງພັກດັນ ແລະ ກຳລັງໃຈທີ່ສຳຄັນທີ່ສຸດ”.

 

ຂໍ້ມູນຈາກ: ມ່ວນ

 

Leave a Reply

Your email address will not be published. Required fields are marked *

Facebook