ຕະຫຼາດແຮງງານແຂວງສະຫວັນນະເຂດ ໄດ້ເປີດຂຶ້ນແລ້ວທີ່ສູນການຄ້າສະຫວັນ-ໄອເຕັກ

ໃນວັນທີ 2 ພະຈິກ 2018 ທີ່ສູນການຄ້າ ສະຫວັນ-ໄອເຕັກ ໄດ້ເປີດຕະຫຼາດແຮງງານຂຶ້ນ ຢ່າງເປັນທາງການ ໂດຍການຮ່ວມມືຂອງສະພາການຄ້າ ແລະ ອຸດສາຫະກຳແຂວງ, ພະ ແນກແຮງງານສະຫວັດດີການສັງຄົມແຂວງ ພະແນກສຶກສາທິການ ແລະ ກິລາ ແຂວງ ໂດຍການເຂົ້າຮ່ວມ ຂອງທ່ານ ປອ ໂພໄຊ ໄຊຍະສອນ ຮອງເຈົ້າແຂວງສະຫວັນນະເຂດ, ທ່ານ ບຸນລົບ ໂຄດຫຼັກຄຳ ຫົວໜ້າພະແນກແຮງງານ ແລະ ສະຫວັດດີການສັງຄົມແຂວງ, ທ່ານ ນາງ ຫຼິງທອງ ແສງຕາວັນ ຫົວໜ້າພະແນກສຶກສາທິການ ແລະ ກິລາແຂວງ ພ້ອມດ້ວຍຕາງໜ້າສະຖາບັນການສຶກສາທັງພາກລັດ, ພາກເອກະຊົນ, ນັກທຸລະກິດ, ຫ້າງຮ້ານບໍລິສັດ ແລະ ນ້ອງນັກສຶກສາເຂົ້າຮ່ວມນຳ.

ທ່ານ ບຸນລົບ ໂຄດຫຼັກຄຳ ໄດ້ລາຍງານການເປີດຕະຫຼາດ ແຮງງານຄັ້ງນີ້ວ່າ: ແຂວງສະ ຫວັນນະເຂດເປັນແຂວງທີ່ມີເນື້ອທີ່ກວ້າງຂວາງຢູ່ພາກກາງຕອນໃຕ້ຂອງລາວ ເປັນທີ່ຕັ້ງ ຍຸດທະສາດທີ່ສຳຄັນໃນການ ເຊື່ອມໂຍງກັບພາກພື້ນສາກົນ ໂດຍມີເສັ້ນທາງຫຼວງແຫ່ງຊາດໝາຍເລກ 9 ທີ່ເປັນເສັ້ນທາງເຊື່ອມໂຍງຕາເວັນອອກ -ຕາເວັນຕົກ, ເປັນແຂວງທີ່ມີ ປະຊາກອນເກີນ 1 ລ້ານກວ່າຄົນ ອັນເປັນທ່າແຮງໃນການສົ່ງເສີມເສດຖະກິດດຶງດູດການລົງທຶນພາຍໃນ ແລະ ຕ່າງປະເທດ ເຮັດໃຫ້ນັກລົງທຶນບໍລິສັດທີ່ມີຊື່ສຽງລະດັບສາກົນໄດ້ ຕັດສິນໃຈເຂົ້າມາລົງທຶນຢູ່ ແຂວງສະຫວັນນະເຂດ ນັບມື້ນັບຫຼາຍຂຶ້ນເພາະມີສະຖານທີ່ຮອງຮັບຄືເຂດຖະກິດພິເສດ ສະຫວັນ-ເຊໂນ ທີ່ມີຄວາມພ້ອມດ້ານພື້ນຖານໂຄງລ່າງຮັບຮອງ ການລົງທຶນ ຊື່ງມີຈຳນວນ 103 ບໍລິສັດ ສ້າງຕັ້ງຂຶ້ນແລ້ວຢູ່ໃນເຂດ, ອັນໄດ້ສົ່ງຜົນໃຫ້ເສດຖະກິດຂອງແຂວງໄດ້ຂະຫຍາຍຕົວຕໍ່ເນື່ອງ, ສາມາດສ້າງວຽກເຮັດງານທຳໃຫ້ແກ່ແຮງງານ ເປັນຈຳນວນຫຼາຍ ພ້ອມກັນນີ້, ແຂວງມີແຮງງານທັງໝົດປະມານ 582.522 ຄົນ, ກວມ ເອົາ 57% ຂອງພົນລະເມືອງ ເຊິ່ງໂຄງປະກອບແຮງງານໄດ້ຂະຫຍາຍຕົວຕາມທິດທີ່ຫັນ ເປັນອຸດສາຫະກຳເທື່ອລະກ້າວ ແລະ ການເປີດຕະຫຼາດແຮງງານໃນຄັ້ງນີ້ເປັນເວລາ 2 ວັນ ຄືວັນທີ 2-3 ພະຈິກ ລວມມີ 17 ບູດ ຂອງຫົວໜ່ວຍທຸລະກິດຕ່າງໆ ແລະ ຄາດວ່າຈະມີຜູ້ມາ ປະກອບແບບຟອມສະໝັກງານ ຈຳນວນ 3.500 ກວ່າຄົນ, ໂດຍສະເພາະແມ່ນຜູ້ຫວ່າງງານ ແລະ ນັກສຶກສາທີ່ກຳລັງຈົບຈາກສະຖາບັນການສຶກສາຕ່າງໆ.

ທ່ານ ປອ ໂພໄຊ ໄຊຍະສອນ ຮອງເຈົ້າແຂວງ ມີຄຳເຫັນວ່າ: ງານຕະຫຼາດນັດແຮງງານ ຖືວ່າມີຄວາມໝາຍຄວາມສຳຄັນ ຍ້ອນແຂວງພວກເຮົາພວມສຸມໃສ່ການພັດທະນາ, ການ ຫັນມາເປັນອຸດສາຫະກຳທີ່ມີຄວາມທັນສະໄໝໃນຍຸກທີ່ມີການຮ່ວມມື ແລະ ເປີດກວ້າງສູ່ຕະຫຼາດພາຍນອກພາຍໃນທ່າມກາງກະແສສັງຄົມທີ່ມີຄວາມຕ້ອງການ ມີ ວຽກເຮັດງານທຳທັງເປັນການເປີດກວ້າງເພື່ອເສີມສ້າງໃຫ້ບັນດາຫົວໜ່ວຍທຸລະກິດຫ້າງຮ້ານໄດ້ພົບປະແລກປ່ຽນຂໍ້ມູນແລກປ່ຽນຄຳຄິດເຫັນແລກປ່ຽນປະສົບການໃຫ້ບັນດານັກ ສຶກສາ, ນັກຮຽນຮູ້, ປັນຍາຊົນ ໄດ້ຊອກຫາວຽກເຮັດງານທຳໃນປະຈຸບັນເພື່ອຈະໄດ້ມີໂອກາດເຮັດວຽກຮ່ວມກັນໃນອາ ນາຄົດ.

 

 

Leave a Reply

Your email address will not be published. Required fields are marked *