ສປປ ລາວ ກຽມເປັນເຈົ້າພາບຄັດບານເຕະຍິງຊີງແຊັມອາຊີ 2019 ຢູ 16 ຮອບ 2

ສະຫະພັນບານເຕະອາຊີ ( ເອເອັຟຊີ ) ຈັບສະຫຼາກແບ່ງສາຍການແຂ່ງຂັນບານເຕະຍິງຊີງແຊັມອາຊຽນ 2019 ລຸ້ນອາຍຸບໍ່ເກີນ 16 ປີ ຮອບຄັດເລືອກຮອບ 2 ປະກົດວ່າສາວລາວ ຢູ 16 ໄດ້ຮັບກຽດເປັນເຈົ້າພາບ ຈັດຢູ່ກຸ່ມ A ຮ່ວມກັບ ອົດສະຕຣາລີ, ຫວຽດນາມ ແລະ ອີຣານ. ທີມສາວລາວ ຢູ 16 ສ້າງຜົນງານໄດ້ຢ່າງໂດດເດັ່ນໃນການແຂ່ງຂັນບານເຕະຊີງແຊັມອາຊີ 2019 ຮອບຄັດເລືອກ ລຸ້ນອາຍຸບໍ່ເກີນ 16 ປີ ຮອບທໍາອິດ ດ້ວຍການເປັນອັນດັບ 1 ຂອງກຸ່ມ B ຈາກການຊະນະ ປາກິດສະຖານ 3 – 0, ນັດທີ 2 ຊະນະ ມົງໂກລີ 4 – 0, ນັດທີ 3 ຊະນະ ຮົງກົງ 3 – 1 ແລະ ນັດທີ 4 ສະເໝີ ອິນເດຍ 1 – 1 ເຮັດໃຫ້ລົງສະໜາມ 4 ນັດ ມີ 10 ຄະແນນ ຢຶດທີມນໍາກຸ່ມ B ຜ່ານເຂົ້າຮອບຄັດເລືອກຮອບ 2 ທັນທີ. ຫຼ້າສຸດ ເອເອັຟຊີ ໄດ້ມີການຈັບສະຫຼາກແບ່ງສາຍການແຂ່ງຂັນບານເຕະຍິງຊີງແຊັມອາຊີ ລຸ້ນອາຍຸບໍ່ເກີນ 16 ປີ ຮອບຄັດເລືອກຮອບທີ 2 ໂດຍມີ 8 ທີມທີ່ຜ່ານເຂົ້າມາຮອບນີ້ ແລະ ແບ່ງອອກເປັນ 2 ກຸ່ມ ແຂ່ງຂັນໃນລະຫວ່າງວັນທີ 23 ກຸມພາ – 3 ມີນາ 2019 ເຊິ່ງ ສປປ ລາວ ຈະໄດ້ເປັນເຈົ້າພາບກຸ່ມ A ໂດຍຜົນຈັບສະຫຼາກມີດັ່ງນີ້: – ກຸ່ມ A: ອົດສະຕຣາລີ, ລາວ ( ເຈົ້າພາບ ), ຫວຽດນາມ ແລະ ອີຣານ. – ກຸ່ມ B: ສປ ຈີນ, ບັງກລາເທດ, ຟີລິບປິນ ແລະ ມຽນມາ ( ເຈົ້າພາບ ). ສໍາລັບການແຂ່ງຂັນນັດທໍາອິດຂອງທີມຊາດລາວ ຈະລົງສະໜາມພົບກັບ ຫວຽດນາມ ໃນວັນທີ 27 ກຸມພາ 2019, ນັດທີ 2 ພົບກັບ ອີຣານ ໃນວັນທີ 1 ມີນາ 2019 ແລະ ນັດທີ 3 ພົບກັບ ອົດສະ ຕຣາລີ ໃນວັນທີ 3 ມີນາ 2019 ເຊິ່ງຮອບຄັດເລືອກຮອບ 2 ຈະຄັດເອົາ ແຊັມ ແລະ ຮອງແຊັມຂອງທັງສອງກຸ່ມເຂົ້າໄປຫຼິ້ນຮອບສຸດທ້າຍທີ່ປະເທດໄທ ໂດຍມີ: ໄທ, ສປປ ເກົາຫຼີ, ສ.ເກົາຫຼີ ແລະ ຍີ່ປຸ່ນ ເຂົ້າໄປຢືນລໍຖ້າຢູ່ແລ້ວ.

 

 

ຂໍ້ມູນມາຈາກ : ເສດຖະກິດການຄ້າ

Leave a Reply

Your email address will not be published. Required fields are marked *

Facebook