ຊ່ຽງໄຮ້ SIPG ສ້າງປະຫວັດສາດ ຄວ້າແຊ້ມລີກສູງສຸດປະເທດຈີນຄັ້ງທຳອິດ!!

ຊ່ຽງໄຮ້ SIPG (Shanghai SIPG) ສະໂມສອນມະຫາເສດຖີໃນລີກສູງສຸດປະເທດຈີນ (Chinese Super League) ສ້າງປະຫວັດສາດ ຄວ້າແຊ້ມລີກສູງສຸດປະເທດຈີນຄັ້ງທຳອິດ ໃນປີ 2018 ຫລັງຈາກນັດທີ 29 (ຮອງນັດສຸດທ້າຍຂອງລະດູການ) ເປີດບ້ານຊະນະ ປັກກິ່ງ ເຣິນເຫີ (Beijing Renhe) ທິມອັນດັບທີ 8 ຂອງລີກ 2-1 ຈາກປະຕູຂອງ ໂອດີວ ອັກເມດັອຟ ແລະ ຫວູເລ່ຍ.

ໄຊຊະນະດັ່ງກ່າວ ເຮັດໃຫ້ ຊ່ຽງໄຮ້ SIPG ມີຄະແນນໜີຫ່າງແຊ້ມເກົ່າ ກວາງໂຈ່ວ ເອເວີແກຣນ (Guangzhou Evergrande) ທີ່ບຸກເສຍໃຫ້ ຈົງຊິ່ງ ລີ້ຟານ (Chongqing Lifan) 0-2 ເຖິງ 8 ຄະແນນ ເຫລືອການແຂ່ງຂັນພຽງນັດດຽວ ກ່ອນໜ້ານັດນີ້ ຊ່ຽງໄຮ້ SIPG ບຸກພິຊິດໄຊເໝືອແຊ້ມເກົ່າຄາບ້ານແບບສຸດມັນ 5-4 ຢຸດແຊ້ມເກົ່າ 7 ສະໄຫມຊ້ອນໄວ້ໄດ້ ແລ້ວກ້າວມາເປັນແຊ້ມຄັ້ງທຳອິດ.

ຄວາມສຳເລັດຄັ້ງນີ້ ມີຫລາຍຢ່າງຊ່ວຍຜັກດັນສະໜັບສະໜູນທິມສູ່ໝາກຜົນອັນໃຫມ່ ໃນນັ້ນນອກຄະນະບໍລິຫານທິມທີ່ເອົາໃຈໃສ່ໃຫ້ຄວາມສະດວກ ພັດທະນາທິມຮອບດ້ານ ຍັງມີນັກເຕະກຳລັງຫລັກຫລາຍຄົນ ທັງຄົນຈີນ ແລະ ຄົນຕ່າງປະເທດ ເປັນຕົ້ນ: ອັອດສະກ້າ (Oscar) ກອງກາງທິມຊາດເບຣຊິນ, ອະດີດກອງກາງເຊວຊີ ແລະ ຮັກຄ໌ (Hulk) ປີກຮ່າງໃຫຍ່ຊົງພະລັງທິມຊາດເບຣຊິນ ອະດີດນັກເຕະເຊນິດ ເຊັນປິເຕີສະເບີກ.

ລວມໄປເຖິງ ຫວູເລ່ຍ (Wu Lei) ກອງໜ້າທິມຊາດຈີນ ເປັນດາວຍິງສູງສຸດໃນລະດູການນີ້ 27 ໜ່ວຍ! ແລະ ຄູຝຶກໃຫມ່ Vítor Pereira ຊາວປອກຕຸຍການ (ໂປຕູເກດ) ຊ່ຽງໄຮ້ SIPG ຄວ້າສິດໄປຫລິ້ນ AFC Champions League 2019 ຮອບແບ່ງກຸ່ມ.

 

 

ຂໍ້ມູນມາຈາກ : ສະປອດອັບເດດ

 

Leave a Reply

Your email address will not be published. Required fields are marked *

Facebook