ເອບີບີ ແນະນຳເຕັກໂນໂລຊີທັນສະໄໝເຂົ້າໃນຂະແໜງການບໍ່ແຮ່ ແລະ ໄຟຟ້າ

ບໍລິສັດ ເອບີບີ ຈັດສຳມະນາວິຊາການ ( ABB Technology Day ) ພາຍໃຕ້ຫົວຂໍ້ “ Let’s write the future of industrial digitalization ” ເພື່ອມາອັບເດດຂໍ້ມູນທາງດ້ານເຕັກນິກທີ່ກ່ຽວຂ້ອງກັບອຸດສາຫະກຳໃນອະນາຄົດໃຫ້ບັນດານັກວິຊາການຂະແໜງການໄຟຟ້າ ແລະ ບໍ່ແຮ່ ໃນ ສປປ ລາວ ໄດ້ຮັບຮູ້.

ພິທີສຳມະນາດັ່ງກ່າວໄດ້ມີຂຶ້ນໃນວັນທີ 8 ພະຈິກ 2018 ທີ່ໂຮງແຮມ ຄຣາວພລາຊາ ນະຄອນຫຼວງວຽງຈັນ ໃຫ້ກຽດເຂົ້າຮ່ວມຂອງ ທ່ານ ພູມມີ  ເນຕິບັນດິດ ຮອງຜູ້ອຳນວຍການໃຫຍ່ ບໍລິສັດ ຜະລິດໄຟຟ້າລາວ ມະຫາຊົນ, ມີທ່ານ ໄຊຢົດ ປີຍະວັນນະຣັດ ກຳມະການຜູ້ຈັດການ ບໍລິສັດ ເອບີບີ ປະຈຳປະເທດໄທ, ມຽນມາ, ກຳປູເຈຍ ແລະ ສປປ ລາວ, ມີບັນດານັກວິຊາການ ແລະ ແຂກທີ່ຖືກເຊີນເຂົ້າຮ່ວມຈຳນວນຫຼາຍ.

ທ່ານ ກິດຕິກອນ ກຳນາຣາຍ ຜູ້ຊ່ວຍຜູ້ຈັດການຝ່າຍການຕະຫຼາດ ບໍລິສັດ ເອບີບີ ປະຈຳ ສປປ ລາວ ກ່າວວ່າ: ເອບີບີ ມີ ຄວາມມຸ່ງ ໝັ້ນໃນການນຳເຕັກໂນໂລຊີລໍ້າສະໄໝ ແລະ ມີມາດຕະຖານມາໃຊ້ໃນ ສປປ ລາວ ເປັນຕົ້ນ: ອຸປະກອນໄຟຟ້າໃນຄົວເຮືອນ, ອຸປະ ກອນໄຟຟ້າໃນອຸດສາຫະກຳ, ມີນະວັດຕະກຳໃນການນຳຫຸ່ນຍົນມາແທນທີ່ການໃຊ້ແຮງງານແທນຄົນ. ສຳລັບງານສຳມະນາໃນຄັ້ງນີ້ ເອບີບີ ໄດ້ນຳອຸປະກອນຢ່າງຫຼວງຫຼາຍເຂົ້າມາຝຶກຮົມໃຫ້ບັນດານັກວິຊາການໃນ ສປປ ລາວ ເພື່ອໄດ້ອັບເດດຂໍ້ມູນໃໝ່ໆ ໂດຍສະ ເພາະແມ່ນເຕັກໂນໂລຊີລຸ້ນໃໝ່ທີ່ໃຊ້ເຂົ້າໃນຂະແໜງການຜະລິດໄຟຟ້າ ແລະ ບໍ່ແຮ່.

ທ່ານ ພູມມີ ເນຕິບັນດິດ ກ່າວວ່າ: ເອບີບີ ໄດ້ມາເປີດ ແລະ ໄດ້ນຳນະວັດຕະກຳໃໝ່ໆມາພັດທະນາຂະແໜງການພະລັງງານຢູ່ ສປປ ລາວ ແລະ ໄດ້ມີສ່ວນຮ່ວມໃນການເຮັດໃຫ້ ສປປ ລາວ ພວກເຮົາມີອຸປະກອນເຄື່ອງມືທັນສະໄໝເຂົ້າສູ່ການຜະລິດພະລັງງານໄຟຟ້າ ຢ່າງມີປະສິດທິຜົນສູງ. ນອກນັ້ນ, ເອບີບີ ຍັງໄດ້ພັດທະນາບຸກຄະລາກອນໃຫ້ມີປະສິດທິພາບ ເຊິ່ງໃນແຕ່ລະປີ ເອບີບີ ໄດ້ນຳເຕັກ ໂນໂລຊີທັນສະໄໝ ທີ່ໃຊ້ໃນລະດັບສາກົນ ເພື່ອມາສົ່ງມອບຄວາມຮູ້ໃຫ້ກັບພະນັກງານທັງພາກລັດ ແລະ ເອກະຊົນ ພ້ອມທັງຈະສືບ ຕໍ່ຈັດຕໍ່ໄປໃນແຕ່ລະປີ.

ດ້ານທ່ານ ໄຊຢົດ ປີຍະວັນນະຣັດ ໃຫ້ສຳພາດວ່າ: ສປປ ລາວ ແລະ ເອບີບີ ໄດ້ມີສ່ວນຮ່ວມໃນການພັດທະນາ ແລະ ໄດ້ນຳເຕັກ ໂນໂລຊີມາໃນ ສປປ ລາວ ເກືອບ 30 ປີແລ້ວ ຕະຫຼອດໄລຍະທີ່ຜ່ານມາຈະໄດ້ເຫັນວິວັດທະນາການຂະຫຍາຍ ແລະ ເຕັກໂນໂລ ຊີໃໝ່ໆຂອງ ເອບີບີ ທີ່ນຳເຂົ້າມາຈຳໜ່າຍຢູ່ ສປປ ລາວ ເພື່ອສະໜອງໃຫ້ບັນດາໂຄງການຜະລິດໄຟຟ້າ ແລະ ບໍ່ແຮ່ ຂອງລັດຖະ ບານ ແລະ ຂອງພາກເອກະຊົນ. ສຳລັບການຈັດສຳມະນາຄັ້ງນີ້ກໍ່ເປັນອີກຄັ້ງໜຶ່ງທີ່ ເອບີບີ ໄດ້ມີໂອກາດໄດ້ນຳສະເໜີເຕັກໂນໂລຊີທີ່ ຫຼາກຫຼາຍຂຶ້ນ, ເອບີບີ ມີຄວາມໝັ້ນໃຈໃນເລື່ອງຂອງສັກກາຍະພາບຂອງປະເທດລາວ ໂດຍສະເພາະນະໂຍບາຍຂອງປະເທດທີ່ຈະ ເຮັດໃຫ້ເປັນໝໍ້ໄຟອາຊຽນ ເຊິ່ງທາງບໍລິສັດຂອງພວກເຮົາ ຢາກເປັນສ່ວນໜຶ່ງໃນການສະໜອງບັນດາອຸປະກອນ ຫຼື ນະວັດຕະກຳ ໃຫ້ບັນດາໂຄງການຜະລິດໄຟຟ້າ ແລະ ບໍ່ແຮ່ ພ້ອມທັງສົ່ງເສີມໃນນະໂຍບາຍດັ່ງກ່າວ ພວກເຮົາມີເຕັກໂນໂລຊີຫຼາກຫຼາຍທີ່ພ້ອມ ຈະສະໜອງໃຫ້.

 

[ ຂ່າວ: ສົມລົດ; ຮູບ: ສຸກສະຫວັນ ]

Leave a Reply

Your email address will not be published. Required fields are marked *

Facebook