ຮ້ານກະແລັມ ອາເລັກ ສ້າງຈຸດຂາຍຜ່ານຄວາມແຕກຕ່າງ ແລະ ແປກໃໝ່

ທ່ານ ທະນົງສິນ ຈັນທະວົງ ເຈົ້າຂອງຮ້ານກະແລັມ ອາເລັກ ຊ໊ອຟເສີບ ໄດ້ໃຫ້ສໍາພາດວ່າ: ຢາກສ້າງທຸລະກິດນ້ອຍໆເພື່ອໃຫ້ນ້ອງຂອງ ຕົນເອງໄດ້ມາເຮັດ ແລະ ລົງມືເອງ ເຊິ່ງຂາຍທັງເສື້ອຜ້າພ້ອມທັງເຮັດຮ້ານກະແລັມຄວບຄູ່ໄປນໍາ ໄລຍະທີ່ເປີດໃຫ້ບໍລິການ ມາປະມານ 2 ເດືອນ ກະແສຕອບຮັບຈາກກຸ່ມນັກຮຽນ – ນັກສຶກສາແມ່ນໄດ້ດີເກີນຄາດໝາຍ ເຊິ່ງກະແລັມ ຊ໊ອຟເສີບ ( Soft Serve ) ຈະມີຈຸດພິເສດຄືຈະມີໄຂມັນຕໍ່າປະມານ 3 – 6% ກວ່າກະແລັມທົ່ວໄປປະມານ 10 – 18% ແລະ ຕ້ອງຜະລິດທີ່ອຸນນະພູມ -4 ອົງສາ ໂດຍຜະລິດໃນເຄື່ອງຈັກສະເພາະທີ່ມີສ່ວນປະສົມຂອງນົມເປັນຫຼັກ.

ສາເຫດທີ່ບໍ່ເປີດຮ້ານໃຫຍ່ມີຄວາມຄິດວ່າການເຮັດທຸລະກິດນ້ອຍໆເປັນການສ້າງຮາກຖານເລີ່ມຕົ້ນທີ່ດີ ແຕ່ຖ້າຢ້ານທີ່ຈະລົງມື້ ເຮັດກໍ່ບໍ່ມີຫຍັງດີຂຶ້ນເຊັ່ນກັນ ເພາະການລົງມືເຮັດຕ້ອງມີໄດ້ ແລະ ເສຍ ເພາະກວ່າຈະເປັນຮ້ານກະແລັມ ອາເລັກ ກໍ່ມີການລອງຜິດ ລອງຖືກປັບປ່ຽນຫຼາຍໆຢ່າງກວ່າ 1 ເດືອນ ຈົນໄດ້ສູດທີ່ດີທີ່ສຸດຈຶ່ງມາເປີດຂາຍ ຄິດສະເໝີວ່າ: “ ລູກຄ້າກິນສິ່ງທີ່ດີມີຄຸນນະພາບ ເຮົາກໍ່ກິນເຊັ່ນກັນ ” ນັບຕັ້ງແຕ່ການເລືອກວັດຖຸດິບ ແລະ ອຸປະກອນຕ້ອງເນັ້ນທີ່ຄວາມສະອາດເປັນຕົ້ນຕໍ

ກະແລັມ ຊ໊ອຟເສີບ ຈະມີເນື້ອທີ່ນຽນນຸ້ມ, ສີສັນທີ່ສົດໃສ ແລະ ລົດຊາດທີ່ເຂັ້ມຂຸ້ນຈຶ່ງກາຍເປັນຈຸດຂາຍຕໍ່ກຸ່ມໄວໜຸ່ມ – ເດັກນ້ອຍ ຍອດຂາຍແຕ່ລະມື້ບໍ່ຫຼຸດ 100 ຈອກ ໂດຍທັງໝົດ 20 ກວ່າລົດຊາດ ແລະ ຈະປ່ຽນໄປທຸກມື້ໆລະ 2 ລົດຊາດ ລົດຊາດທີ່ໄດ້ຮັບຄວາມ ນິຍົມ ແລະ ໄດ້ຮັບກະແສຕອບຮັບຄືລົດນົມວານິລາ ຈຸດພິເສດແມ່ນຄວາມຫອມຂອງນົມສົດ ແລະ ກິ່ນຂອງວານິລາທີ່ພົ້ນເດັ່ນ ດ້ວຍລົດຊາດທີ່ຫວານໜ້ອຍຈຶ່ງໄດ້ຂາຍດີ ແລະ ຕ້ອງມີທຸກໆມື້.

ຕໍ່ມາກໍ່ຈະເປັນລົດຊາໂຄ ໂດຍເຮົານຳເຂົ້າຊາໂຄທີ່ມີຄຸນນະພາບຈາກຕ່າງປະເທດ ແລະ ລົດບູເບີຣີຈະອອກຫວານສົ້ມພ້ອມທັງ ຫອມກິ່ນບູເບີຣີເນັ້ນໆ ເຊິ່ງຈະມີລາຄາໃຫ້ເລືອກຕັ້ງແຕ່ 5 ພັນ, 8 ພັນ ແລະ 10 ພັນກີບ ມີທັງແບບຈວຍເຂົ້າໜົມ ( ວານິລາ ແລະ ຫຼາກຊ໊ອກໂກແລັດ ) ແລະ ແບບຈອກ ເຊິ່ງສາມາດເພີ່ມລາຄາຂຶ້ນຕື່ມອີກໄດ້. ນອກຈາກນີ້, ຮ້ານເຮົາຍັງຈະພັດທະນາສູດ ແລະ ລົດຊາດໃໝ່ໆອອກມາເລື້ອຍໆໃນເທດສະການຕ່າງໆເພື່ອໃຫ້ແຕກຕ່າງບໍ່ຄືເກົ່າຈົນໜ້າເບື່ອ.

ເຈົ້າຂອງຮ້ານກະແລັມ ອາເລັກ ຊ໊ອຟເສີບ ຍັງໄດ້ໃຫ້ສຳພາດກ່ຽວກັບແຜນສ້າງສາຂາຕື່ມວ່າ: ອຸປະກອນທີ່ຈະສ້າງສາຂາແມ່ນກຽມ ພ້ອມຮຽບຮ້ອຍ ແຕ່ເຮົາຢາກຈະສ້າງຈຸດເຂັ້ມແຂງໃຫ້ຮ້ານ ໂດຍການເນັ້ນຜະລິດຕະພັນໃຫ້ມີຄຸນນະພາບ ແລະ ຫຼາກຫຼາຍ. ນອກນີ້, ຍັງມີແຜນເຮັດກ່ອງເກັບກະແລັມສາມາດນຳໄປເປັນຂອງຝາກ ຫຼື ຊື້ເມືອກິນຢູ່ບ້ານໂດຍບໍ່ລະລາຍ.

ຖ້າທ່ານໃດສົນໃຈຢາກຈະລອງຊີມກະແລັມ ຊ໊ອຟເສີບ ນຽນນຸ້ມກໍ່ສາມາດໄປໄດ້ທີ່ບ້ານໂພນທັນ ( ກົງກັນຂ້າມວິທະຍາໄລຣັຕນະ ບໍລິຫານ ທຸລະກິດ ) ເມືອງສີສັດຕະນາກ ເປີດແຕ່ວັນຈັນ – ວັນເສົາ ເວລາ 10:00 – 20:00 ໂມງ ຫຼື ສາມາດສອບຖາມຂໍ້ມູນເພີ່ມ ຕື່ມໄດ້ທີ່: www.facebook.com/Alex-Soft-Serve-Ice-Cream

 

( ຂ່າວ: ນຸ້ມນິ້ມ; ຮູບ: ວິລະສັກ )

Leave a Reply

Your email address will not be published. Required fields are marked *

Facebook