ອະສັງຫາລິມະຊັບຂະຫຍາຍຕົວຊ້າລົງ ອາດແກ່ຍາວໄປຮອດປີໜ້າ

ຂະແໜງອະສັງຫາລິມະຊັບທີ່ຄາດວ່າຈະຂະຫຍາຍຕົວໃນລະດັບຕ່ຳ ຫຼື ອາດຈະຢູ່ຕົວ ໄປຈົນໝົດປີ 2019. ທະນາຄານໂລກ ປະຈຳ ສປປ ລາວ ຄາດວ່າເສດຖະກິດຂອງລາວປີນີ້ຈະຂະຫຍາຍຕົວໃນລະດັບບໍ່ເກີນ 6,6% ຍ້ອນບັນຫາໜີ້ສິນຄຸມເຄືອຂອງລັດຖະບານທີ່ ຈະຕ້ອງໄດ້ເລັ່ງປັບປຸງແກ້ໄຂ ໂດຍສະເພາະແມ່ນໜີ້ 3 ແຈ ລະຫວ່າງ ລັດຖະບານ – ບໍລິສັດ – ທະນາຄານເຮັດໃຫ້ລະບົບການເງິນ ບໍ່ມີຄວາມຄ່ອງຕົວ.

ຕ້ອງຍອມຮັບວ່າເສດຖະກິດລາວໃນປີ 2018 ພົບຫຼາຍບັນຫາທ້າທາຍສ້າງ ຄວາມກົດດັນໃຫ້ກັບລັດຖະບານຫຼາຍສົມຄວນທີ່ຈະ ຕ້ອງໄດ້ແກ້ໄຂ ໂດຍສະເພາະແມ່ນຜົນເສຍຫາຍຈາກພາຍຸໃນລະດູຝົນຜ່ານມາ ທີ່ເສຍຫາຍເກືອບ 2 ພັນຕື້ກີບ ບໍ່ລວມຄວາມ ເສຍຫາຍຢູ່ເມືອງສະໜາມໄຊ ແຂວງອັດຕະປື ເນື້ອທີ່ນາຂອງປະຊາຊົນຖືກເສຍຫາຍ, ຖະໜົນຫົນທາງຖືກຕັດຂາດ, ເຮືອນຊານ ປະຊາຊົນເປ່ເພ, ໄຟຟ້າຖືກຕັດຂາດບາງແຂວງຍັງແກ້ໄຂບໍ່ສຳເລັດ.

ທ່ານ ຫຸມພັນ ໄຊຍະລາດ ຜູ້ອຳນວຍການ ບໍລິສັດ ເຣັນສະບາຍ ຊື້ເຊົ່າຂາຍດິນ – ເຮືອນ ໃຫ້ສຳພາດວ່າ: ສະພາບເສດຖະກິດໂລກມີ ການຂະຫຍາຍຕົວຊ້າລົງ, ນ້ຳມັນຫຍັບຂຶ້ນສົ່ງຜົນໃຫ້ປະເທດທີ່ນຳເຂົ້າສິນຄ້າໄດ້ຮັບຜົນກະທົບຢ່າງຫຼີກເວັ້ນບໍ່ໄດ້ ຫຼ້າສຸດທະນາຄານ ໂລກປະຈຳລາວປັບຫຼຸດການຂະຫຍາຍຕົວດ້ານເສດຖະກິດຂອງລາວຈາກ 7% ມາຢູ່ທີ່ 6,6% ການປັບຫຼຸດການຂະຫຍາຍຕົວດ້ານ ເສດຖະກິດມັນໄດ້ສົ່ງຜົນຕໍ່ພາກອະສັງຫາລິມະຊັບ ເນື່ອງຈາກວ່າສະພາບເສດຖະກິດບໍ່ຄ່ອງຕົວເທົ່າທີ່ຄວນ ນັກທຸລະກິດບໍ່ກ້າລົງ ທຶນຫຼາຍຢ້ານທຶນທີ່ລົງໄປຈະນອນຢູ່ດົນ, ປະຊາຊົນບໍ່ກ້າໃຊ້ຈ່າຍຫຼາຍຈະໃຊ້ແຕ່ສິ່ງທີ່ຈໍາເປັນເທົ່ານັ້ນ ປັດໄຈດັ່ງກ່າວມີຄວາມເປັນໄປ ໄດ້ຫຼາຍທີ່ເຮັດໃຫ້ຂະແໜງອະສັງຫາລິມະຊັບຈະຂະຫຍາຍຕົວໃນອັດຕາທີ່ຕ່ຳ ຫຼື ຢູ່ໃນລະດັບຢູ່ຕົວອາດແກ່ຍາວໄປຈົນເຖິງໝົດປີ ໜ້າ.

ການລົງທຶນຂອງຕ່າງປະເທດຍັງຢູ່ໃນທ່າທາງທີ່ດີ ໂດຍສະເພາະໂຄງການກໍ່ສ້າງທາງລົດໄຟ ລາວ – ຈີນ ທີ່ເລີ່ມຈາກນະຄອນຫຼວງວຽງ ຈັນ ໄປຫາ ແຂວງຫຼວງນ້ຳທາ ຄາດວ່າຕາມເສັ້ນທາງສອງຂ້າງໂດຍສະເພາະແມ່ນຈຸດສະຖານີພັກຈະເກີດມີການຈັບຈອງສະຖານ ດັ່ງກ່າວຫຼາຍຂຶ້ນ ແຕ່ກໍ່ຍັງຄາດການບໍ່ໄດ້ວ່າຈະເພີ່ມຂຶ້ນໜ້ອຍ ຫຼື ຫຼາຍປານໃດ ທ່ານ ຫຸມພັນ ໄຊຍະລາດ ກ່າວ.

ທ່ານ ນາງ ດາລຸນນີ ພູມມະສັກ ເຈົ້າຂອງໂຄງການເຮືອນຈັດສັນ Green-residence ບ້ານທົ່ງປົ່ງ ກ່າວກ່ອນໜ້ານັ້ນວ່າ: ເຖິງວ່າເສດ ຖະກິດໄລຍະປີ 2018 ຈະຂະຫຍາຍຕົວຊ້າລົງຕາມທ່າອ່ຽງເສດຖະກິດໂລກ ແຕ່ໂຄງການໃຫຍ່ຂອງລັດຖະບານຍັງສືບຕໍ່ກໍ່ສ້າງ ເຊິ່ງໄດ້ ສ້າງຄວາມເຊື່ອໝັ້ນຕໍ່ກັບນັກລົງທຶນທີ່ຈະເຂົ້າມາລົງທຶນໃນ ສປປ ລາວ ການເຂົ້າມາຂອງນັກລົງທຶນທີ່ພັກເຊົາທີ່ຢູ່ອາໄສແມ່ນສິ່ງຈຳ ເປັນສຳລັບພວກເຂົາທີ່ຂາດບໍ່ໄດ້ ທີ່ຈະເປັນແຮງສະໜັບສະໜູນໃຫ້ຂະແໜງອະສັງຫາລິມະຊັບຍາມໃດກໍ່ຍັງເປັນທີ່ຕ້ອງການຂອງ ລູກຄ້າ.

ຫາກຈະຕັດສິນໃຈລົງທຶນໃສ່ຂະແໜງອະສັງຫາລິມະຊັບສຳລັບນັກທຸລະກິດກະເປົ໋າເງິນໜັກແມ່ນມີຄວາມເໝາະສົມທີ່ສຸດ ຫາກລາ ຄາເນື້ອທີ່ດິນຫຼຸດລົງຈາກເດີມຈະຊື້ໄວ້ເພື່ອຂາຍຕໍ່ໃນ 1 – 2 ປີຂ້າງໜ້າ ຕາມການຄາດການວ່າເສດຖະກິດຂອງລາວຈະກັບມາ ຂະຫຍາຍຕົວອີກຄັ້ງໃນລະຫວ່າງທ້າຍປີ 2019 – 2020 ເຈົ້າຂອງໂຄງການບ້ານຈັດສັນກ່າວ.

ເສດຖະກິດຂອງ ສປປ ລາວ ຂະຫຍາຍຕົວໃນລະດັບບໍ່ຫຼຸດ 7% ມາແຕ່ໄລຍະປີ 2000 ເປັນຕົ້ນມາ ແຕ່ປີນີ້ທະນາຄານໂລກ ແລະ ທະນາຄານພັດທະນາອາຊີ ປະຈຳລາວ ໄດ້ຄາດຄະເນວ່າເສດກິດລາວຈະຂະຫຍາຍຕົວຊ້າລົງຢູ່ໃນລະດັບ 6,6 – 6,8% ຍ້ອນລາຍຮັບ ຈາກຂະແໜງບໍ່ແຮ່ຫຼຸດລົງ ແລະ ລັດຖະບານສັ່ງຢຸດການຂຸດຄົ້ນຊົ່ວຄາວໃນຂະແໜງດັ່ງກ່າວ ແຕ່ທິດທາງອັດຕາການຂະຫຍາຍ ຕົວຂອງຂະແໜງບໍລິການມີທ່າອ່ຽງເພີ່ມຂຶ້ນ.

 

[ ຂ່າວ – ຮູບ: ສຸລິນ ]

Leave a Reply

Your email address will not be published. Required fields are marked *

Facebook