ທຳລາຍສິນຄ້າຜິດກົດໝາຍ ມູນຄ່າ 30 ກວ່າລ້ານກີບ

ຕອນເຊົ້າທີ 11 ພະຈິກ 2018 ທີ່ສະໜາມຖິ້ມຂີ້ເຫຍື້ອ ຫຼັກ 31 ເມືອງໄຊທານີ ນະຄອນຫຼວງວຽງຈັນ ໄດ້ຈັດພິທີທຳລາຍສິນຄ້າເສື່ອມຄຸນ ແລະ ສິນຄ້າຜິດລະບຽບທີ່ຢຶດມາໄດ້ ໂດຍຮ່ວມເປັນປະທານໂດຍ ທ່ານ ສົມຊາຍ ນົງລາດ ຫົວໜ້າພະແນກກວດກາການຄ້າພາຍໃນກະຊວງອຸດສາຫະກຳ ແລະ ການຄ້າ ( ອຄ ), ທ່ານ ພອນທິບ ຍົກໄຊຍະຄຳ ຫົວໜ້າຫ້ອງການອຸດສາຫະກຳ ແລະ ການຄ້າ ເມືອງນາຊາຍທອງ, ຕາງໜ້າພະແນກອຸດສາຫະກຳ ແລະ ການຄ້າ ນະຄອນຫຼວງວຽງຈັນ, ຕາງໜ້າສຸກສະລາເມືອງນາຊາຍທອງ ແລະ ຕາງໜ້າຫ້ອງການກະສິກຳ ແລະ ປ່າໄມ້ ເມືອງນາຊາຍທອງ ເຂົ້າຮ່ວມ.

ສິນຄ້າທີ່ນໍາມາທຳລາຍຄັ້ງນີ້ແມ່ນສິນຄ້າທີ່ຢຶດໄດ້ຈາກຮ້ານຄ້າຕາມຕະຫຼາດ, ຈາກຮ້ານຄ້າຍ່ອຍ, ຮ້ານຄ້າທົ່ວໄປຢູ່ເມືອງນາຊາຍທອງ ນະຄອນຫຼວງວຽງຈັນ ມີທັງປະເພດເຄື່ອງອຸປະໂພກ ແລະ ບໍລິໂພກ ເຊັ່ນ: ຊີ້ນໝູ, ເຄື່ອງສຳອາງ, ອາຫານເຄິ່ງສຳເລັດຮູບ ( ໝີ່ຊອງ, ໝີ່ກ່ອງ ) ແລະ ລວມເປັນມູນຄ່າ ດັ່ງນີ້: ຊີ້ນໝູນ້ອຍແຊ່ແຂງບໍ່ມີໃບອະນຸຍາດສາມາດຢຶດໄດ້ 317 ໂຕ ມູນຄ່າ 31.700.000 ກີບ, ໝີ່ສຳເລັດຮູບ ແລະ ເຂົ້າໜົມ ມູນຄ່າ 9 ແສນກີບ, ເຄື່ອງສຳອາງ ມູນຄ່າ 5 ແສນກີບ, ທາດແຕກຕ່າງໆ ( ໝາກກະໂພກ )  ມູນຄ່າ 5 ແສນກີບ ເຊິ່ງລວມມູນຄ່າທັງໝົດທີ່ສາມາດຢຶດໄດ້ ລວມເປັນ 33.600.000 ກີບ ມູນຄ່າປັບໃໝ 20 ລ້ານກວ່າກີບ.

ທ່ານ ພອນທິບ ຍົກໄຊຍະຄຳ ຫົວໜ້າຫ້ອງການອຸດສາຫະກຳ ແລະ ການຄ້າ ເມືອງນາຊາຍທອງ ກ່າວວ່າ: ການຕິດຕາມກວດກາສິນຄ້າບໍ່ຖືກລະບຽບ ແລະ ສິນຄ້າໝົດອາຍຸ ຕະຫຼອດຮອດສິນຄ້າຫ້າມນຳເຂົ້າຈຳໜ່າຍແມ່ນພວກເຮົາໄດ້ປະຕິບັດທຸກປີ ແລະ ມີການທຳລາຍທຸກໆທ້າຍປີ ແລະ ປີນີ້ເຫັນວ່າຈຳນວນສິນຄ້າຢຶດໄດ້ຫຼຸດລົງ ເພາະຜູ້ບໍລິໂພກກໍ່ຄືປະຊາຊົນເລືອກຊື້ສິນຄ້າ ໂດຍສະເພາະການກວດກາເບິ່ງສະຫຼາກວັນໝົດອາຍຸ ແລະ ພິເສດທາງການຄ້າ ໄດ້ເປີດສາຍດ່ວນ 1510 ເພື່ອເປັນເວທີໃຫ້ສັງຄົມໂທແຈ້ງຫາການຄ້າພາຍໃນໄດ້ມາກວດສອບ, ເປັນເວທີປົກປ້ອງຜູ້ຊົມໃຊ້ຈຶ່ງເປັນຂໍ້ສະດວກໃຫ້ທັງມວນຊົນ ແລະ ສະດວກຕໍ່ການກວດກາຂອງພວກເຮົາ.

ຕອນທ້າຍ ທ່ານຫົວໜ້າຫ້ອງການອຸດສາຫະກຳ ແລະ ການຄ້າ ເມືອງນາຊາຍທອງ ຝາກເຕືອນສັງຄົມ ແລະ ພໍ່ຄ້າຊາວຂາຍ ຕະຫຼອດຜູ້ປະກອບການທຸກຄົນຈົ່ງເປັນເຈົ້າການຊ່ວຍກັນ ໂດຍສະເພາະຜູ້ຊົມໃຊ້ແມ່ນໃຫ້ເບິ່ງສະຫຼາກເຄື່ອງບໍລິໂພກກ່ອນຊື້ ວ່າມັນໝົດອາຍຸ ຫຼື ໃກ້ໝົດອາຍຸແລ້ວ ຫຼື ຍັງ, ແນະນຳໃຫ້ປະຊາຊົນຄວນຊື້ຊີ້ນຕາມຕະຫຼາດ ເພາະມີໃບອະນຸຍາດຄັກແນ່ ແລະ ຝາກເຕືອນແມ່ຄ້າຊາວຂາຍຕະຫຼອດຮ້ານອາຫານ ກ່ອນຈະຈຳໜ່າຍກ່ອນຈະນຳອາຫານປະເພດຊີ້ນ ຫຼື ສ່ວນປະກອບອື່ນມາວາງຂາຍຕ້ອງຄຳນຶງເຖິງລູກຄ້າ ແລະ ຜູ້ບໍລິໂພກ, ຄຳນຶງເຖິງສຸຂະພາບລູກຄ້າພ້ອມ ຖ້າກວດພົບສິນຄ້າເສື່ອມຄຸນ, ສິນຄ້າຜິດກົດໝາຍ ພວກເຮົາຈະໄດ້ປະຕິບັດຕາມລະບຽບການຢ່າງເຄັ່ງຄັດ.

 

ແຫຼ່ງຂ່າວ: ເສດຖະກິດ-ການຄ້າ

 

Leave a Reply

Your email address will not be published. Required fields are marked *

Facebook