ສູ້ຊົນສັກຢາກັນພະຍາດສັດ ໃຫ້ໄດ້ຫຼາຍກວ່າ 90%

ຊຸມ​ປີ­ຜ່ານ­ມາ​ການ​ລະ­ບາດ​ຂອງ​ພະ­ຍາດ​ສັດ ຍັງ​ຖື​ເປັນ​ໄພ​ຂົ່ມ­ຂູ່ ແລະ ສົ່ງ​ຜົນ​ກະ­ທົບ​ໂດຍ​ກົງ​ຕໍ່​ການ​ລ້ຽງ­ສັດ​ຢູ່​ລາວ ເປັນ​ສິ່ງ​ກີດ­ຂວາງ​ດ້ານ​ການ​ຄ້າ​ຢູ່​ພາຍ​ໃນ ກໍ່​ຄື​ການ​ສົ່ງ​ອອກ ເຊິ່ງ​ອົງ­ການ​ປົກ­ຄອງ​ທ້ອງ­ຖິ່ນ​ແຕ່​ລະ​ຂັ້ນ ໄດ້​ໃຫ້​ຄວາມ​ສຳ­ຄັນ​ຕໍ່​ວຽກ​ງານ​ສັກ​ຢາ​ກັນ​ພະ­ຍາດ​ສັດ ໂດຍ​ໄດ້​ຊຸກ­ຍູ້​ຂະ​ບວນ​ການ​ສັກ​ຢາ​ກັນ​ພະ­ຍາດ​ສັດ​ຢ່າງ​ເປັນ​ຂະ​ບວນ​ຟົດ­ຟື້ນ ເຮັດ​ໃຫ້​ອັດ­ຕາ​ການ​ສັກ​ຢາ​ກັນ​ພະ­ຍາດ​ແຕ່​ລະ​ຊະ­ນິດ​ເພີ່ມ​ຂຶ້ນ​ຢ່າງ​ຕໍ່​ເນື່ອງ ເຊັ່ນ: ການ​ສັກ​ຢາ​ປ້ອງ​ກັນ​ຢູ່​ບັນ­ດາ​ຟາມ​ລ້ຽງ­ສັດ​ໄດ້​ເກືອບ 100% ສັດ­ລ້ຽງ​ເຂດ​ຊານ­ເມືອງ ແລະ ເຂດ​ຊົນ­ນະ­ບົດ​ຫຼາຍ​ກວ່າ 60% ເຂດ​ຫ່າງ​ໄກ​ສອກ­ຫຼີກ​ຫຼາຍ​ກວ່າ 20% ເຮັດ​ໃຫ້​ສັດ­ລ້ຽງ​ມີ​ພູມ​ຕ້ານ­ທານ​ໃນ​ລະ­ດັບ​ດີ​ພໍ​ສົມ­ຄວນ ແຕ່​ຍັງ​ມີ​ບາງ​ທ້ອງ­ຖິ່ນ​ມີ​ການ​ລະ­ບາດ ເປັນ­ຕົ້ນ ພະ­ຍາດ​ປາກ​ເປຶ່ອຍ​ລົງ​ເລັບ ຢູ່​ແຂວງ​ໄຊ​ຍະ​ບູ​ລີ ແລະ ແຂວງ​ຫົວ­ພັນ ຍິ່ງ​ໄປ​ກວ່າ​ນັ້ນ ສັດ­ລ້ຽງ​ຂອງ​ປະ­ຊາ­ຊົນ​ຍັງ​ໄດ້​ຮັບ​ຜົນ​ກະ­ທົບ​ຈາກ​ໄພ­ພິ­ບັດ​ນ້ຳ​ຖ້ວມ ເຮັດ​ໃຫ້​ຝູງ​ສັດ​ຈຳ­ນວນ​ຫຼາຍ​ຂາດ​ອາ­ຫານ ຂາດ​ທີ່­ຢູ່​ອາ­ໄສ ເຮັດ​ໃຫ້​ຝູງ​ສັດ​ເຫຼົ່າ­ນັ້ນ​ມີ​ພູມ​ຕ້ານ­ທານ​ຫຼຸດ​ລົງ.

ກະ­ຊວງ​ກະ­ສິ­ກຳ ແລະ ປ່າ­ໄມ້ ໄດ້​ອອກ​ຄຳ​ສັ່ງ​ການ​ສ້າງ​ຂະ​ບວນ​ການ​ສັກ​ຢາ​ກັນ​ພະ­ຍາດ​ສັດ ໃນ​ໂອ­ກາດ​ວັນ​ສັກ​ຢາ​ກັນ​ພະ­ຍາດ​ສັດ​ແຫ່ງ​ຊາດ ວັນ​ທີ 11 ພະ­ຈິກ 2018 ໂດຍ​ໃຫ້​ກົມ​ລ້ຽງ­ສັດ ແລະ ການ​ປະ­ມົງ​ປະ­ສານ​ສົມ­ທົບ​ກັບ​ພະ​ແນກ​ກະ­ສິ­ກຳ ແລະ ປ່າ­ໄມ້​ປະ­ຈຳ​ແຂວງ ນະ­ຄອນ­ຫຼວງ​ວຽງ​ຈັນ ອົງ­ການ​ປົກ­ຄອງ​ທ້ອງ­ຖິ່ນ ແລະ ຂະ­ແໜງ­ການ​ທີ່​ກ່ຽວ­ຂ້ອງ ສືບ­ຕໍ່​ໂຄ­ສະ­ນາ​ເຜີຍ­ແຜ່​ເນື້ອ​ໃນ​ຕົ້ນ­ຕໍ​ຂອງ​ກົດ­ໝາຍ ດຳ­ລັດ ຄຳ​ສັ່ງ ຂໍ້​ຕົກ­ລົງ ຄຳ​ແນະ­ນຳ​ແລະ​ແຈ້ງ​ການ​ຕ່າງໆ​ທີ່​ຕິດ​ພັນ​ກັບ​ການ​ລ້ຽງ­ສັດ ແລະ ການ​ສັດ­ຕະ­ວະ­ແພດ​ໃຫ້​ທົ່ວ​ສັງ­ຄົມ​ໄດ້​ຮູ້­ຈັກ ຈັດ​ກອງ​ປະ­ຊຸມ ສຳ​ມະ​ນາ ປາ­ຖະ­ກະ­ຖາ ໂດຍ​ຍົກ​ໃຫ້​ເຫັນ​ຄວາມ​ສຳ­ຄັນ​ຂອງ​ການ​ເຝົ້າ​ລະ­ວັງ ການ​ປ້ອງ​ກັນ ແລະ ຕ້ານ​ພະ­ຍາດ​ສັດ ລວມ​ທັງ​ຄວາມ​ເສຍ​ຫາຍ​ທີ່​ເກີດ​ຈາກ​ຖື​ເບົາ​ຕໍ່​ວຽກ​ງານ​ສັກ​ຢາ​ກັນ​ພະ­ຍາດ​ສັດ ແລະ ຕັ້ງ­ໜ້າ​ປະ­ຕິ­ບັດ​ຕາມ​ທິດ​ນຳ​ທີ່​ວ່າ “ການ​ກັນ​ພະ­ຍາດ​ສັດ​ເປັນ​ໜ້າ­ທີ່​ຂອງ​ທົ່ວ​ປວງ​ຊົນ”.

 

ແຫຼ່ງຂ່າວ: ວຽງຈັນໃໝ່

 

Leave a Reply

Your email address will not be published. Required fields are marked *

Facebook