ເທີນ-ຫີນບູນ ພາກຂະຫຍາຍ ປະດັບຫລຽນໃຫ້ພະນັກງານ ຜູ້ທີ່ມີຜົນງານດີເດັ່ນ

ໃນວັນທີ 8 ພະຈິກ 2018  ທີ່ໂຮງແຮມຄຣາວພາຊາ ວຽງຈັນ,  ບໍລິສັດເທີນ-ຫີນບູນ ພາວເວີ ຈຳກັດ  ໄດ້ຈັດພິທີສະຫລຸບ ຜົນສຳເລັດຂອງໂຄງການກໍ່ສ້າງເຂື່ອນໄຟຟ້າ  ເທີນ-ຫີນບູນ ພາກຂະຫຍາຍ (THXP)  ແລະ ການປະດັບຫລຽນ, ມອບໃບຍ້ອງຍໍປະເພດຕ່າງໆ ໃຫ້ກົມກອງລວມໝູ່ ແລະ ບຸກຄົນທີ່ມີຜົນງານດີເດັ່ນ ໃນໄລຍະ 20 ປີ ຜ່ານມາ. ໃນນັ້ນຫລຽນໄຊແຮງງານຊັ້ນ II ປະ ເພດບຸກຄົນ ມີ 10 ຄົນ  ແລະ 2 ກົມກອງ, ຫລຽນໄຊແຮງງານຊັ້ນIII ມີ 21 ຄົນ ແລະ 3 ກົມກອງ, ຫລຽນກາ ມີ 49 ຄົນ  ແລະ 1 ກົມກອງ, ພ້ອມ ໃບຍ້ອງຍໍ 70 ຄົນ, 2 ກົມກອງ, ໂດຍເປັນກຽດປະດັບຫລຽນໃນຄັ້ງນີ້,  ໂດຍທ່ານ ສົມດີ ດວງດີ ຮອງນາຍົກລັດຖະມົນຕີ ແຫ່ງ ສປປ ລາວ.

ທ່ານ ສຸລິເດດ ເບົ້າມະນີໂຄດ ຮອງຜູ້ອຳນວຍການໃຫຍ່ ບໍລິສັດເທີນ-ຫີນບູນ ພາວເວີ   ຈຳກັດ ກ່າວວ່າ: ໂຄງການກໍ່ສ້າງເຂື່ອນໄຟ ຟ້າ ເທີນ-ຫີນບູນ ພາກຂະຫຍາຍ  ແມ່ນໂຄງການສືບເນື່ອງ ມາ ຈາກ ໂຄງການໄຟຟ້າ ເທີນ-ຫີນບູນ  ທີ່ມີຢູ່ແລ້ວ ເຊິ່ງເລີມຜະລິດ ມາແຕ່ປີ 1998  ສາມາດຜະລິດພະລັງງານໄຟຟ້າ ໂດຍສະເລ່ຍ 1.450 GWh ຕໍ່ປີ,  ມີກຳລັງຕິດຕັ້ງທັງໝົດ 500 MW  ໃນນັ້ນປະ ກອບດ້ວຍ 220 MW ທີ່ມີຢູ່ແລ້ວ,  ຕິດຕັ້ງເຄື່ອງຈັກໃໝ່220 MW ຂະຫຍາຍເພີ່ມ  ແລະ 60 MW ຕິດຕັ້ງເຄື່ອງຈັກໃໝ່ ຢູ່ເຂື່ອນນ້ຳຍວງ. ຜົນຜະລິດສະເລ່ຍປະຈຳປີ  ເພີ່ມຂຶ້ນເປັນ 3.000 GWh ເຊິ່ງຜະລິດຢູ່ເຮືອນຈັກ  ເທີນ-ຫີນບູນ 2.700 GWh ແລະ ຢູ່ເຂື່ອນນ້ຳຍວງ 300 GWh  ເຊິ່ງສາມາດບັນຈຸນ້ຳໄດ້ 2.450 ລ້ານແມັດກ້ອນ,  ມີລະບົບສາຍສົ່ງ 230 kv ເພື່ອນຳສົ່ງກະແສໄຟຟ້າ ອອກໄປຂາຍໃຫ້ປະເທດເພື່ອນບ້ານ.

ທ່ານ ສຸລິເດດ ເບົ້າມະນີໂຄດ ກ່າວຕື່ມວ່າ: ໂຄງການ THXP ໄດ້ຮັບການຈັດຕັ້ງປະຕິບັດ ສອດຄ່ອງຕາມສັນຍາສຳປະທານພາກຂະ ຫຍາຍ ແລະ ໄດ້ສຳເລັດທຸກວຽກງານຕາມຈຸດປະສົງ  ແລະ ລະດັບຄາດໝາຍ,  ບັນດາຂະແໜງການຂອງສູນກາງ ແລະ ແຂວງ ໄດ້ເອົາໃຈໃສ່ປະສານສົມທົບກັນ ຮັບຊາບບັນຫາ ແລະ ຮ່ວມກັນແກ້ໄຂຈົນສຳເລັດຜົນ. ນອກຈາກນີ້, ໂຄງການ THXP ຍັງໄດ້ ສົ່ງເສີມການສ້າງວຽກເຮັດງານທຳ  ໃຫ້ແກ່ປະຊາຊົນ ທີ່ີອາໄສຢູ່ເຂດພື້ນທີ່ດັ່ງກ່າວ. ພ້ອມກັນນີ້, ບໍລິສັດຍັງໄດ້ປະກອບສ່ວນ ໃນການພັດທະນາ ພື້ນຖານໂຄງລ່າງ ໃຫ້ບັນດາບ້ານຈັດສັນເຊັ່ນ: ສ້າງເສັ້ນທາງເຂົ້າຫາບ້ານ, ສ້າງໂຮງຮຽນ,  ສຸກສາລາ, ລະບົບນ້ຳສະອາດ, ລະບົບຊົນລະປະທານ ແລະ ອື່ນໆ.

 

Leave a Reply

Your email address will not be published. Required fields are marked *

Facebook