ລາວ-ຕວັກກີ ເສີມຂະຫຍາຍຄວາມສຳພັນ ແລະ ການຮ່ວມ ມືຮ່ວມກັນ

ໃນວັນທີ 08 ພະຈິກ 2018  ທີ່ ກະຊວງການຕ່າງປະເທດ,  ທ່ານ ສະເຫລີມໄຊ ກົມມະສິດ ລັດຖະມົນຕີກະຊວງການຕ່າງປະເທດ ແຫ່ງ ສປປ ລາວ ໄດ້ໃຫ້ກຽດຕ້ອນຮັບ  ແລະ ພົບປະສອງຝ່າຍກັບ ທ່ານ ເມຣຸດ ຄາວູໂຊລູ (Mevlut Cavusoglu)  ລັດຖະມົນຕີ ກະຊວງການຕ່າງປະເທດ ແຫ່ງ ສ.ຕວັກກີ  ພ້ອມດ້ວຍຄະນະ ໃນໂອກາດເດີນທາງມາຢ້ຽມຢາມ ສປປ ລາວ  ຢ່າງເປັນທາງການ ໃນ ລະຫວ່າງ ວັນທີ 7-8 ພະຈິກ 2018.

ໃນການພົບປະຄັ້ງນີ້,  ສອງຝ່າຍໄດ້ຕີລາຄາສູງ ຕໍ່ການພົວພັນຮ່ວມມື  ແລະ ການສະໜັບສະໜູນ  ຊ່ວຍເຫລືອເຊິ່ງກັນ ແລະ ກັນ ໃນໄລຍະຜ່ານມາ,  ຊຶ່ງນັບແຕ່ ສປປ ລາວ ແລະ ສ.​ຕວັກ​ກີ  ໄດ້ສ້າງຕັ້ງສາຍພົວ ພັນການທູດນຳກັນ ໃນວັນທີ 26 ມິຖຸນາ 1958,  ສອງປະເທດ ກໍໄດ້ມີການພົວພັນທີ່ດີນໍາກັນຕະຫລອດມາ,  ຊຶ່ງເຫັນໄດ້ຈາກການແລກປ່ຽນການສະໜັບສະໜູນ  ເຊິ່ງກັນ ແລະ ກັນ ໃນເວ ທີສາກົນ, ການແລກປ່ຽນ ການ ຢ້ຽມຢາມ  ລະຫວ່າງ ຄະນະຜູ້ແທນຂອງສອງປະເທດ.  ພ້ອມກັນນີ້, ສອງຝ່າຍ ຍັງໄດ້ສະແດງຄວາມຊົມເຊີຍ  ຕໍ່ການສ້າງຕັ້ງສາຍພົວພັນການທູດ ລາວ-ຕວັກກີ  ຄົບຮອບ 60 ປີ. ພ້ອມທັງ ໄດ້ມີການເປີດສະຖານ ເອກອັກ ຄະລັດ ຖະທູດ ແຫ່ງ ສ.ຕວັກກີ ປະຈໍາ ສປປ ລາວ ຂຶ້ ນຢ່າງເປັນທາງການ ເພື່ອເປັນນິມິດໝາຍອັນສໍາຄັນ  ໃຫ້ແກ່ການຊຸກຍູ້ການພົວພັນຮ່ວມມືຂອງສອງປະເທດ  ໃຫ້ກ້າວຂຶ້ນສູ່ລະດັບໃໝ່.  ຈາກນັ້ນ, ສອງຝ່າຍ ຍັງໄດ້​ປຶກ​ສາ​ຫາ​ລື​  ກ່ຽວກັບການ​ເສີມ​ຂະ​ຫ​ຍາຍ​ການ​ພົວ​ພັນ​ຮ່ວມ​ມື​ສອງຝ່າຍ  ແລະ ຫລາຍຝ່າຍ ໃນ​ຕໍ່​ໜ້າ  ແລະ ທັງໄດ້​ແລກ​ປ່ຽນ​ຄຳ​ຄິດ​​ເຫັນ ​ຕໍ່ກັບ​ບັນ​ຫາ​ທີ່​ພົ້ນເດັ່ນ  ໃນພາກ​ພື້ນ ແລະ ສາກົນ.  ພາຍຫລັງສຳເລັດການພົບປະສອງຝ່າຍ,  ກໍໄດ້ມີ ລົງນາມຮ່ວມກັນ  ໃນສັນຍາວ່າດ້ວຍການຍົກເວັ້ນວີຊາ ສໍາລັບຜູ້ຖືໜັງສືຜ່ານແດນການທູດ  ລະຫວ່າງ ລັດຖະບານ ແຫ່ງ ສປປ ລາວ  ແລະ ລັດຖະບານ ແຫ່ງ ສາທາລະນະລັດ ຕວັກກີ.

ໃນໂອກາດຢ້ຽມຢາມ ສປປ ລາວ ໃນຄັ້ງນີ້,  ທ່ານ ເມຣຸດ ຄາວູໂຊລູ ພ້ອມດ້ວຍຄະນະ   ຍັງໄດ້ເຂົ້າຢ້ຽມຂ່ຳນັບ ທ່ານ ທອງລຸນ ສີສຸລິດ  ນາຍົກລັດຖະມົນຕີ ແຫ່ງ ສປປ ລາວ  ແລະ ໄດ້ໄປຢ້ຽມຊົມ ສະຖານທີ່ທ່ອງທ່ຽວ  ທາງດ້ານວັດທະນະທໍາທີ່ສໍາຄັນ ຢູ່ນະຄອນຫລວງວຽງຈັນຕື່ມອີກ.

 

Leave a Reply

Your email address will not be published. Required fields are marked *

Facebook