ຮອງນາຍົກລັດຖະມົນຕີ ຢ້ຽມຢາມໂຄງການຂຸດຄົ້ນຖ່ານຫີນ ທີ່ເມືອງຍອດອູ

ຕອນບ່າຍວັນທີ 8 ພະຈິກ 2018 ນີ້,  ທ່ານ ສອນໄຊ ສີພັນດອນ ຮອງນາຍົກລັດຖະມົນຕີ  ແລະ ທ່ານ ຄຳເຈນ ວົງໂພສີ ເຈົ້າແຂວງ ຜົ້ງສາລີ ພ້ອມດ້ວຍຄະນະ  ໄດ້ໄປຢ້ຽມຢາມໂຄງການສຳປະທານຂຸດຄົ້ນຖ່ານຫີນ ຂອງບໍລິສັດ ກໍ່ສ້າງລູຍທິງ  ເມືອງລ້ານຊ້າງ ຈຳກັດ ຢູ່ທີ່ເມືອງຍອດອູ  ແຂວງຜົ້ງສາລີ.

ຄະນະຂອງທ່ານຮອງນາຍົກລັດຖະມົນຕີ  ໄດ້ຮັບຟັງສະພາບການຈັດຕັ້ງປະຕິບັດວຽກງານຂອງໂຄງການດັ່ງກ່າວ ເຊິ່ງເຫັນວ່າ: ບໍລິສັດ ກໍ່ສ້າງລູຍທິງ ເມືອງລ້ານຊ້າງ ຈຳກັດ (ບໍລິສັດຈາກ ສປ ຈີນ) ໄດ້ເຊັນສັນຍາສໍາປະທານຂຸດຄົ້ນຖ່ານຫີນ  ຢູ່ເມືອງຍອດອູ ກັບລັດຖະບານແຫ່ງ ສປປ ລາວ ຈຳນວນ 2 ສັນຍາສຳປະທານ ຄື:  ສັນຍາທີ 1 ເຊັນສັນຍາໃນປີ 2005 ມີເນື້ອທີ່ສຳປະທານ ຈຳນວນ 660 ເຮັກຕາ, ອາຍຸສຳປະທານ 13 ປີ ແລະ ສັນຍາທີ 2 ເຊັນສັນຍາ ໃນປີ 2006 ມີເນື້ອທີ່ສຳປະທານ ຈຳນວນ 1.496 ເຮັກຕາ, ອາຍຸສຳປະທານ 20 ປີ, ສອງເນື້ອທີ່ດັ່ງກ່າວ  ແມ່ນຕັ້ງຢູ່ຕິດກັນ.

ໄລຍະຜ່ານມາ  ແມ່ນສາມາດຂຸດຄົ້ນຖ່ານຫີນ ເພື່ອສົ່ງອອກຂາຍຕ່າງປະເທດແລ້ວ  ຈຳນວນ 2 ແສນກວ່າໂຕນ,  ໄດ້ເສຍພັນທະ ຕ່າງໆ ໃຫ້ລັດແລ້ວ ຈຳນວນ 7,1 ລ້ານໂດລາສະຫະລັດ,  ໄດ້ລົງທຶນກໍ່ສ້າງເສັ້ນທາງ  ໃນບໍລິເວນພື້ນທີ່ຂອງໂຄງການ ປະມານ 7 ແສນ ໂດລາສະຫະລັດ,  ໄດ້ປັບປຸງ ແລະ ກໍ່ສ້າງພື້ນຖານ ເປັນຕົ້ນ ໂຮງຮຽນ, ສຸກສາລາ, ນໍ້າສະອາດ ແລະ ອື່ນໆ ໃຫ້ແກ່ ປະຊາຊົນທ້ອງຖິ່ນ ປະມານ 2,5 ແສນໂດລາສະຫະລັດ, ໄດ້ກໍ່ສ້າງຕາຂ່າຍໄຟຟ້າ ມາຈາກຊາຍແດນ ລາວ-ຈີນ  ມີຄວາມຍາວປະ ມານ 28 ກິໂລແມັດ ໂດຍໄດ້ຊົມໃຊ້ເຂົ້າໃນການຂຸດຄົ້ນຖ່ານຫີນ  ກໍຄືວຽກງານພາຍໃນໂຄງການ ແລະ ຍັງໄດ້ ຂະຫຍາຍຕາຂ່າຍ ໃຫ້ປະຊາຊົນບັນດາບ້ານ ໃກ້ຄຽງ ໄດ້ຊົມໃຊ້ນຳອີກ. ນອກນັ້ນ, ຍັງໄດ້ປະກອບສ່ວນງົບປະມານ ເຂົ້າໃນການຈັດຕັ້ງປະຕິບັດກິດຈະ ກຳຕ່າງໆ ຂອງທ້ອງຖິ່ນ ປະມານ 40 ພັນໂດລາສະຫະລັດ,  ສ່ວນແຮງງານ ຂອງໂຄງການ ແມ່ນມີແຮງງານລາວ  ກວມປະມານ  40%.

ໃນໂອກາດດຽວກັນ,  ທ່ານ ສອນໄຊ ສີພັນດອນ ຍັງໄດ້ໃຫ້ກຽດພົບປະໂອ້ລົມ ຕໍ່ພະນັກງານໂຄງການ ແລະ ປະຊາຊົນບ້ານໃກ້ຄຽງ ທີ່ມາຕ້ອນຮັບໃນຄັ້ງນີ້. ໃນນັ້ນ,  ທ່ານຮອງນາຍົກລັດຖະມົນຕີ ໄດ້ຊີ້ນຳໃຫ້ພາກສ່ວນທີ່ກ່ຽວຂ້ອງ ເອົາໃຈ ໃສ່ຕື່ມບາງດ້ານ ເປັນຕົ້ນ  ໃຫ້ໂຄງການເພີ່ມອັດຕາສ່ວນແຮງງານລາວ ໃຫ້ຫລາຍຂຶ້ນກວ່າເກົ່າ ແລະ ຖືກຕ້ອງ-ສອດຄ່ອງ ຕາມລະບຽບກົດໝາຍ ຂອງ ສປປ ລາວ; ໃຫ້ພາກສ່ວນກ່ຽວຂ້ອງຂອງແຂວງ ແລະ ເມືອງຍອດອູ ສົມທົບ ກັບໂຄງການ  ຄົ້ນຄວ້າຊົດເຊີຍທີ່ດິນຂອງປະຊາ ຊົນ ທີ່ໄດ້ຮັບຜົນກະທົບຈາກໂຄງການ ຢ່າງຖືກຕ້ອງ ແລະ ສອດຄ່ອງກັບສະພາບຕົວຈິງ; ໃຫ້ໂຄງການ ສົມທົບກັບພາກສ່ວນທີ່ກ່ຽວ ຂ້ອງກວດກາຄືນບົດວິພາກເສດຖະກິດ, ເຮັດບົດປະ ເມີນສິ່ງ ແວດລ້ອມ,  ບົດຄຸ້ມຄອງສິ່ງແວດລ້ອມ ແລະ ແຜນການປິດບໍ່ ພາຍຫລັງທີ່ໝົດອາຍຸການສຳປະທານ ພ້ອມກັນນັ້ນ  ກໍໃຫ້ກວດກາຄືນເນື້ອທີ່ສຳປະທານ, ຖ້າຫາກເນື້ອທີ່ສ່ວນໃດ ບໍ່ມີຖ່ານຫີນ (ບໍ່ມີເສດຖະກິດ)  ກໍໃຫ້ສົ່ງເນື້ອທີ່ສ່ວນດັ່ງກ່າວ ຄືນໃຫ້ແກ່ລັດ ເພື່ອຈະໄດ້ຈັດສັນໃຫ້ປະຊາຊົນ  ທຳການຜະລິດ ແລະ ຊົມໃຊ້; ໃຫ້ໂຄງການເອົາໃຈໃສ່ ຕໍ່ລະບົບຄວາມປອດໄພ ໃນການຂຸດຄົ້ນຖ່ານຫີນ ຢ່າງເຄັ່ງຄັດ, ເໝາະສົມ  ແລະ ມີປະສິດທິຜົນສູງ; ໃຫ້ພາກສ່ວນທີ່ກ່ຽວຂ້ອງຂອງແຂວງ, ເມືອງ ຍອດອູ ແລະ ໂຄງການ ສົມທົບກັບປະຊາຊົນ  ເພື່ອຄົ້ນຄວ້າ ແລະ ກຳນົດໂຄງການພັດ ທະນາທ້ອງຖິ່ນ ໂດຍສະເພາະ  ໂຄງການທີ່ຕິດພັນກັບການປັບປຸງຊີວິດການເປັນຢູ່ຂອງປະຊາຊົນ  ໃນທ້ອງຖິ່ນດັ່ງກ່າວ ໃຫ້ນັບມື້ດີ ຂຶ້ນເປັນກ້າວໆ, ພ້ອມທັງ ຊຸກຍູ້ສົ່ງເສີມ ແລະ ສ້າງເງື່ອນໄຂ ໃຫ້ລູກຫລານ ກໍຄື ປະຊາຊົນທ້ອງຖິ່ນ ໄດ້ເຂົ້າຮຽນໜັງສືກວມເອົາອັດ ຕາສ່ວນຫລາຍ.

 

Leave a Reply

Your email address will not be published. Required fields are marked *

Facebook