ປກສ ສີສັດຕະນາກ ມ້າງກຸ່ມແກ້ງລັກລົດຈັກລາຍໃຫຍ່

ໃນ​ໄລ­ຍະ 3 ເດືອນ​ຜ່ານ​ມາ ປກສ ເມືອງ​ສີ​ສັດ­ຕະ​ນາກ ນະ­ຄອນ­ຫຼວງ​ວຽງ​ຈັນ ສາ­ມາດ​ມ້າງ​ກຸ່ມ​ແກ້ງ​ລັກ​ລົດ­ຈັກ​ລາຍ​ໃຫຍ່​ໄດ້​ຈຳ­ນວນ 2 ກຸ່ມ ພາຍ­ຫຼັງ​ທີ່​ຮ່ວມ​ກັນ​ເຂົ້າ​ມາ​ກໍ່​ເຫດ​ລັກ​ລົດ­ຈັກ​ຢູ່​ເມືອງ​ສີ​ສັດ­ຕະ​ນາກ ແລະ ຂອບ​ເຂດ​ນະ­ຄອນ­ຫຼວງ​ວຽງ​ຈັນ ແລ້ວ​ນຳ­ໄປ​ຂາຍ​ຕໍ່​ຢູ່​ແຂວງ​ບໍ​ລິ​ຄຳ​ໄຊ ແລະ ແຂວງ​ຊຽງ​ຂວາງ.

ທ່ານ ພັນ​ໂທ ທອງ​ສະ​ຫວັດ ແສນ​ສຸ​ວາດ ຫົວ­ໜ້າ​ກອງ​ບັນ­ຊາ​ການ ປກສ ເມືອງ​ສີ​ສັດ­ຕະ​ນາກ ໃຫ້​ຮູ້​ວ່າ: ນັບ​ແຕ່​ກາງ​ເດືອນ​ສິງ­ຫາ 2018 ເປັນ­ຕົ້ນ​ມາ ເຈົ້າ​ໜ້າ­ທີ່​ສືບ­ສວນ-ສອບ​ສວນ​ເມືອງ​ສີ​ສັດ­ຕະ​ນາກ ໄດ້​ມ້າງ​ກຸ່ມ​ແກ້ງ​ລັກ​ລົດ­ຈັກ 2 ກຸ່ມ​ຄື: ກຸ່ມ​ຂອງ​ທ້າວ ກອນ​ປະ­ດິດ ອາ­ຍຸ 22 ປີ ນັກ​ສຶກ​ສາ ຢູ່​ບ້ານ​ນາ​ແຫນ ເມືອງ​ບໍ​ລິ​ຄັນ ແຂວງ​ບໍ​ລິ​ຄຳ​ໄຊ ພ້ອມ​ພັກ​ພວກ 2 ຄົນ ທີ່​ມາ​ເຄື່ອນ​ໄຫວ​ລັກ​ລົດ­ຈັກ​ຢູ່​ຂອບ​ເຂດ​ເມືອງ​ສີ​ສັດ­ຕະ​ນາກ ແລະ ບັນ­ດາ​ເມືອງ​ຢູ່​ນະ­ຄອນ­ຫຼວງ​ວຽງ​ຈັນ ແລ້ວ​ນຳ­ໄປ​ຂາຍ​ຢູ່​ເມືອງ​ບໍ​ລິ​ຄັນ ແຂວງ​ບໍ​ລິ​ຄຳ​ໄຊ ໄດ້​ຂອງ​ກາງ​ລົດ­ຈັກ​ເວບ​ຈຳ­ນວນ 8 ຄັນ ແລະ ມ້າງ​ກຸ່ມ​ທ້າວ ຕາມ ອາ­ຍຸ 17 ປີ ນັກ­ຮຽນ​ບ້ານ​ນ້ຳ​ສວນ ແລະ ທ້າວ ທອງ​ສີ ອາ­ຍຸ 17 ປີ ບ້ານ​ຜາ​ເກງ ເມືອງ​ພູ​ຄູນ ແຂວງ​ຫຼວງ​ພະ​ບາງ ທີ່​ມາ​ເຄື່ອນ​ໄຫວ​ລັກ​ລົດ­ຈັກ​ຢູ່​ຂອບ​ເຂດ​ນະ­ຄອນ­ຫຼວງ​ວຽງ​ຈັນ ແລະ ສົ່ງ​ຂາຍ​ເຂດ​ເມືອງ​ພູ​ຄູນ ແລະ ແຂວງ​ຊຽງ​ຂວາງ ໄດ້​ຂອງ​ກາງ​ລົດ­ຈັກ 8 ຄັນ.

ເຊິ່ງ​ໃນ​ນີ້ ມີ​ລົດ­ຈັກ 1 ຄັນ​ແມ່ນ​ເກັບ​ກູ້​ໄດ້​ທີ່​ນະ­ຄອນ­ຫຼວງ​ວຽງ​ຈັນ ປັດ­ຈຸ­ບັນ ເຈົ້າ​ໜ້າ­ທີ່​ຍັງ​ຂະ­ຫຍາຍ​ຜົນ​ຕິດ­ຕາມ​ຈັບ​ກຸມ​ຜູ້​ຮ່ວມ​ຂະ​ບວນ​ການ ພ້ອມ​ທັງ​ເກັບ​ກູ້​ລົດ​ທີ່​ຍັງ​ເຫຼືອ​ຕໍ່​ໄປ.

 

ແຫຼ່ງຂ່າວ: ວຽງຈັນໃໝ່

 

 

Leave a Reply

Your email address will not be published. Required fields are marked *

Facebook