ສສຊ ຫາລືປັບປຸງເນື້ອໃນຮ່າງກົດໝາຍ ວ່າດ້ວຍທີ່ດິນ ສະບັບປັບປຸງ ກ່ອນນຳເຂົ້າພິຈາລະນາ

ບັນດາສະມາຊິກສະພາແຫ່ງຊາດ (ສສຊ)  ໃນຂອບເຂດທົ່ວປະເທດ ໄດ້ພ້ອມກັນປະກອບຄຳຄິດຄຳເຫັນ  ໃສ່ການປັບປຸງເນື້ອໃນຮ່າງກົດໝາຍ  ວ່າດ້ວຍທີ່ດິນສະບັບປັບປຸງ ​ເພື່ອ​ໃຫ້​ມີ​ເນື້ອ​ໃນ​ທີ່​ຊັດ​ເຈນ,  ຈະ​ແຈ້ງ, ກະທັດ​ຮັດ ​ແລະ ຮັດກຸມ  ກ່ອນທີ່ຈະນຳເຂົ້າພິຈາລະນາ  ຢູ່ກອງປະຊຸມສະໄໝສາມັນເທື່ອທີ 6  ຂອງສະພາແຫ່ງຊາດ ຊຸດທີ VIII ຊຶ່ງຈະຈັດຂຶ້ນໃນມໍ່ໆນີ້.

ການ​ປຶກສາ​ຫາລືດັ່ງກ່າວ,  ​ໄດ້​ມີ​ຂຶ້ນຢູ່​ທີ່​ກອງ​ປະຊຸມ​ສຳ​ມະ​ນາ ​ ກ່ຽວ​ກັບ​ການ​ຍົກ​ສູງ​ຄຸນ​ນະພາ​ບທາງ​ດ້ານ​ເນື້ອ​ໃນ  ​ທີ່​ຈະ​ນຳ​ເຂົ້າພິຈາລະນາ ຢູ່ກອງປະຊຸມສະໄໝສາມັນ ເທື່ອທີ 6 ຂອງສະພາແຫ່ງຊາດ ຊຸດທີ VIII  ທີ່​ນະຄອນຫລວງ​ວຽງ​ຈັນ, ​ໃນ​ວັນ​ທີ  7 ພະຈິກ 2018,  ​ໂດຍການ​ເປັນ​ປະທານ​ຂອງ ທ່ານ ສົມ​ພັນ ​ແພງ​ຄຳ​ມີ  ຮອງ​ປະທານ​ສະພາ​ແຫ່ງ​ຊາດ, ຜູ້​ຊີ້​ນຳ​ກຳມາ​ທິການ​ກົດໝາຍ.

ໂອກາດ​ນີ້, ທ່ານ ບຸນ​ມີ ພຸດ​ທະ​ວົງ  ຮອງ​ລັດຖະມົນຕີ​ ກະຊວງ​ຊັບພະຍາກອນ​ທຳ​ມະ​ຊາດ ​ແລະ ສິ່ງ​ແວດ​ລ້ອມ ກ່າວ​ວ່າ:  ກົດໝາຍ​ວ່າ​ດ້ວຍ​ທີ່​ດິນ​ສະບັບ​ປັດຈຸບັນ (​ປະກາດ​ໃຊ້​ປີ 2003)  ​ໄດ້​ປະກອບ​ສ່ວນ​ເຮັດ​ໃຫ້ການ​ຄຸ້ມ​ຄອງ  ​ແລະ ບໍລິຫານ​ທີ່​ດິນ​ໄດ້ດີ​ພໍ​ສົມຄວນ  ​ແລະ ມີ​ຜົນສຳ​ເລັດ​ຫລາຍ​ດ້ານ.  ​ເຖິງ​ຢ່າງ​ໃດ​ກໍ​ຕາມ, ​ໃນ​ພາກ​ປະຕິບັດ​ຕົວ​ຈິງ ມາ​ຮອດ​ປັດຈຸບັນ​ເຫັນ​ວ່າ  ການ​ຄຸ້ມ​ຄອງ​ທີ່​ດິນ ກໍ​ຍັງ​ເກີດ​ມີ​ຫລາຍ​ບັນຫາ​ສັບສົນ​ ເປັນ​ຕົ້ນ​ແມ່ນ ການ​ຫັນປ່ຽນ​ປະ​ເພດ​ທີ່​ດິນ​  ຍັງ​ບໍ່​ທັນ​ໄດ້​ປະຕິບັດ​ຕາມ​ກົດໝາຍ​ຢ່າງ​ເຂັ້ມ​ງວດ,  ຍ້ອນ​ການ​ສ້າງ​ແຜນ​ແມ່​ບົດ​  ຈັດ​ສັນ​ທີ່​ດິນ​ແຫ່ງ​ຊາດ ​ແລະ ວາງ​ແຜນ ການ​ນຳ​ໃຊ້​ທີ່​ດິນ​ຂອງ​ຂະ​ແໜງ​ການ  ​ແລະ ທ້ອງ​ຖິ່ນ ຍັງ​ບໍ່​ທັນ​ສຳ​ເລັດ  ອັນ​ພາ​​ໃຫ້ການ​ນຳ​ໃຊ້​ທີ່​ດິນ​ມີ​ລັກສະນະ​ຟຸມ​ເຟືອຍ,  ມີ​ການ​ຈັບຈອງ-ຄອບ​ຄອງ​ທີ່​ດິນ,  ຊື້-ຂາຍ​ສິດ​ນຳ​ໃຊ້​ທີ່​ດິນ​ແບບ​ຊະຊາຍ ​ແລະ ບໍ່​ຖືກຕ້ອງ​ຕາມ​ກົດໝາຍ  ​ເປັນ​ຕົ້ນ ການ​ອອກ​ໃບ​ຕາດິນ,  ​ແຜນ​ທີ່​ຕາດິນ​ເກີນ​ອັດຕາ​ທີ່​ກົດໝາຍ​ກຳນົດ,   ອອກ​ໃບ​ຕາດິນ​ຊ້ຳ​ຊ້ອນ​ກັນ,   ການ​ຕົກລົງ​ແບ່ງປັນ​ທີ່​ດິນ​ຂອງ​ລັດ​ໃຫ້​ບຸກຄົນ​ຖື​ສິດ​ນຳ​ໃຊ້ ​ຂາດ​ຕົວ​ທີ່​ບໍ່​ຖືກຕ້ອງ​ຕາມ​ກົດໝາຍ ​ເກີດ​ຂຶ້ນຢ່າງ​ແຜ່​ຫລາຍ, ລາຄາ​ທີ່​ດິນ​ນັບ​ມື້​ນັບ​ສູງ​ຂຶ້ນ​ຕໍ່​ເນື່ອງ  ​ໂດຍ​ສະ​ເພາະ​ ທີ່​ດິນ​ໃນ​ເຂດ​ຕົວ​ເມືອງ.

ໃນ​ຂະນະ​ດຽວ​ກັນ,  ຍ້ອນ​ຂາດການຄຸ້ມ​ຄອງ​ທີ່​ດີ ຈຶ່ງ​ເຮັດ​ໃຫ້ການ​ເກັບ​ພາສີ,  ອາກອນ​ຈາກ​ທີ່​ດິນ  ​ແລະ ຈາກ​ການ​ມອບ​ໂອນ,  ຊື້-ຂາຍ​ສິດ​ນຳ​ໃຊ້​ທີ່​ດິນ​ຖືກ​ຮົ່ວ​ໄຫລ​ຢ່າງ​ໜັກໜ່ວງ,  ທ່າ​ແຮງ​ບົ່ມ​ຊ້ອນ​ຂອງ​ທີ່​ດິນ​ ບໍ່​ໄດ້​ຮັບ​ການ​ເສີມ​ຂະຫຍາຍ​ເທົ່າ​ທີ່​ຄວນ,  ການ​ຮ້ອງ​ຟ້ອງ ​ແລະ ​ເກີດ​ຄະດີ​  ກ່ຽວ​ກັບ​ທີ່​ດິນ​ນັບ​ມື້​ນັບ​ຫລາຍ​ຂຶ້ນ,  ການ​ຫັນ​ທີ່​ດິນ​​ເປັນທຶນ​ຍັງ​ບໍ່​ທັນ​ມີ​ນິຕິ​ກຳ​ລະອຽດ  ​ເຮັດ​ໃຫ້​ລັດ ​ແລະ ປະຊາຊົນ​  ບໍ່​ທັນ​ໄດ້​ຮັບ​ຜົນ​ປະ​ໂຫຍ​ດຕົວ​ຈິງ​ເທົ່າ​ທີ່​ຄວນ,  ການ​ເວນ​ຄືນ​ທີ່​ດິນ ​ເພື່ອ​ຮັບ​ໃຊ້​ໂຄງການ​ພັດທະນາ​ຕ່າງໆ  ເປັນພາລະ​ອັນ​ໜັກໜ່ວງ  ​ແລະ ​ເປັນ​ບັນຫາ​ຫລໍ່​ແຫລມ ​ທີ່​ສົ່ງ​ຜົນ​ກະທົບ​ຕໍ່​ຄວາມ​ເປັນ​ລະບຽບ​ຮຽບຮ້ອຍ​ຂອງ​ສັງຄົມ  ​ແລະ ບັນຫາ​ອື່ນໆ.

ຈາກ​ສະພາບ​​ດັ່ງກ່າວ​ນັ້ນ,  ຈຶ່ງ​ເຫັນ​ວ່າ​ມີ​ຄວາມ​ຈຳ​ເປັນ​ຕ້ອງ​ໄດ້​ມີ​ການ​ປັບປຸງ​ກົດໝາຍ​  ວ່າ​ດ້ວຍ​ທີ່​ດິນ ປີ 2003 ​ເພື່ອ​ໃຫ້​ເນື້ອ​ໃນ​ກົດໝາຍ​ດັ່ງກ່າວ ມີ​ຄວາມ​ຊັດ​ເຈນ, ຈະ​ແຈ້ງ, ກະທັດຮັດ, ຮັດ​ກຸມ,   ນຳ​ໃຊ້​ຄຳ​ສັບ​ທີ່​ມີ​ຄວາມ​ໝາຍ​ແນ່ນອນ,  ​ເຂົ້າ​ໃຈງ່າຍ ​ແລະ ສາມາດ​ຈັດ​ຕັ້ງ​ປະຕິບັດ​ໄດ້  ​ໂດຍ​ໃຫ້​ສອດຄ່ອງ​ກັບ​ມະຕິ ​ຂອງ​ຄະນະ​ບໍລິຫານ​ງານ​ສູນ​ກາງ​ພັກ  ວ່າ​ດ້ວຍ​ການ​ເພີ່ມ​ທະວີ​ວຽກ​ງານ​ການ​ຄຸ້ມ​ຄອງ  ​ແລະ ພັດທະນາ​ທີ່​ດິນ​ໄລຍະ​ໃໝ່ ​ແລະ ສະພາບ​ການ​ຂະຫຍາຍຕົວ​​ເສດ​ຖະກິດ -ສັງຄົມ​ຂອງ​ຊາດ.

 

ແຫຼ່ງຂ່າວ: ຂ່າວສານປະເທດລາວ

 

 

Leave a Reply

Your email address will not be published. Required fields are marked *

Facebook