ແຂວງວຽງຈັນ ຄາດ 3 ເດືອນທ້າຍປີ ຈະມີນັກທ່ອງທ່ຽວເຂົ້າມາ 173 ພັນກວ່າຄົນ

ແຂວງວຽງຈັນ ກໍ່ເປັນອີກແຂວງໜຶ່ງທີ່ມີນັກທ່ອງທ່ຽວທັງພາຍໃນ ແລະ ຕ່າງປະເທດເຂົ້າມາທ່ອງຊົມທຳມະຊາດ ເປັນຕົ້ນແມ່ນ ເມືອງວັງວຽງ ທີ່ມີຊື່ສຽງໂດ່ງດັງໃນຂະແໜງການທ່ອງທ່ຽວ ເຊິ່ງທາງແຂວງກໍ່ພ້ອມອຳນວຍຄວາມສະດວກ ແລະ ປະສານສົມທົບ ກັບຂະແໜງການທີ່ກ່ຽວຂ້ອງພາຍໃນແຂວງໃນການໂຄສະນາກິດຈະກຳການທ່ອງທ່ຽວພາຍໃນແຂວງອອກສູ່ສັງຄົມພາຍໃນ ແລະ ຕ່າງປະເທດໃຫ້ນັບມື້ກວ້າງຂວາງ.

ທ່ານ ແສງອາລຸນ    ວິໄລເຮືອງ ຮອງຫົວໜ້າຂະແໜງທ່ອງທ່ຽວ ແລະ ເປັນຜູ້ຊີ້ນໍາວຽກງານຄຸ້ມຄອງການທ່ອງທ່ຽວແຂວງວຽງຈັນ ໃຫ້ຮູ້ວ່າ: ຈຳນວນນັກທ່ອງທ່ຽວທີ່ເຂົ້າມາແຂວງວຽງຈັນ ໄລຍະ 9 ເດືອນຕົ້ນປີແມ່ນ 495.730 ຄົນ ຄາດໝາຍໝົດປີແມ່ນ 669.577 ຄົນ ແລະ ຄາດໝາຍນັກທ່ອງທ່ຽວ 3 ເດືອນທ້າຍປີ 2018 ແມ່ນ 173.847 ຄົນ.

ສ່ວນແຜນປະຕິບັດເພື່ອໃຫ້ບັນລຸເປົ້າໝາຍແມ່ນເອົາໃຈໃສ່ໃນການຕິດຕາມກວດກາ ແລະ ເກັບກຳສະຖິຕິນັກທ່ອງທ່ຽວທີ່ເຂົ້າ ມາທ່ອງທ່ຽວພາຍໃນແຂວງໃຫ້ເຂົ້າງວດ, ສະໜັບສະໜູນໃຫ້ຈັດງານເທດສະການຕ່າງໆຂອງແຂວງ ເພື່ອດຶງດູດນັກທ່ອງ ທ່ຽວໃຫ້ເຂົ້າມາທ່ອງທ່ຽວພາຍໃນແຂວງໃຫ້ຫຼາຍຂຶ້ນ ໂດຍສະເພາະແມ່ນເທດສະການດົນຕີສາກົນຢູ່ເມືອງວັງວຽງ ( vang vieng Music Festival ) ແລະ  ເທດສະການງານບຸນຊ່ວງເຮືອພາຍໃນແຂວງວຽງຈັນ. ນອກຈາກນີ້, ຍັງເອົາໃຈໃສ່ຕິດຕາມຄວບ ຄຸມລາຄາສິນຄ້າ ແລະ ການບໍລິການທາງດ້ານການທ່ອງທ່ຽວພາຍໃນໃຫ້ຢູ່ໃນເກນປົກກະຕິ ເພື່ອຫຼີກລຽງການເອົາລັດເອົາປຽບນັກ ທ່ອງທ່ຽວ ເຊິ່ງເປັນສາເຫດທີ່ຈະເຮັດໃຫ້ນັກທ່ອງທ່ຽວເຂົ້າມາທ່ຽວແຂວງວຽງຈັນຫຼຸດລົງ ພ້ອມທັງຊຸກຍູ້ໃຫ້ຜູ້ປະກອບການທຸລະກິດ ທາງດ້ານການທ່ອງທ່ຽວມີສ່ວນຮ່ວມໃນການສ້າງກິດຈະກຳ ແລະ ພັດທະນາຂະແໜງທ່ອງທ່ຽວພາຍໃນແຂວງ ໃຫ້ມີຄວາມຫຼາກ ຫຼາຍເພື່ອດຶງດູດນັກທ່ອງທ່ຽວໃຫ້ມາທ່ອງທ່ຽວແຂວງວຽງຈັນໃຫ້ຫຼາຍຂຶ້ນ.

ທ່ານ ບຸນມີ ພົມມະວົງສາ ຫົວໜ້າຫ້ອງການຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ເມືອງວັງວຽງ ໄດ້ໃຫ້ສຳພາດວ່າ: ສຳລັບນັກທ່ອງທ່ຽວທີ່ເຂົ້າມາທ່ຽວເມືອງວັງວຽງ ໃນໄລຍະ 9 ເດືອນຕົ້ນປີ ມີຈຳນວນ 187.763 ຄົນ ໂດຍສ່ວນໃຫຍ່ແມ່ນນັກທ່ອງ ທ່ຽວຈາກ ສ.ເກົາຫຼີ ແລະ ສປ ຈີນ ສ່ວນນັກທ່ອງທ່ຽວຈາກເອີຣົບ ແລະ ອາຟຣິກກາ ແມ່ນມີຈຳນວນຫຼຸດລົງຖ້າທຽບໃນປີຜ່ານມາ ສາມາດສ້າງລາຍຮັບໃຫ້ລັດ, ນັກທຸລະກິດ, ຜູ້ປະກອບການ ແລະ ພໍ່ແມ່ປະຊາຊົນໄດ້ຫຼາຍສົມຄວນ ປີໜຶ່ງບໍ່ຫຼຸດ 90 ກວ່າຕື້ກີບ.

ໃນການກະກຽມງານເທດສະການດົນຕີ ( vang vieng Music Festival ) ໃນໄລຍະຜ່ານມາໄດ້ມີການປັບປຸງ ແລະ ຂະຫຍາຍບັນ ດາທີ່ພັກໃຫ້ຫຼາຍຂຶ້ນກວ່າເກົ່າ ລວມທັງໃຫ້ໄດ້ມາດຕະຖານເພື່ອຮອງຮັບນັກທ່ອງທ່ຽວທັງພາຍໃນ ແລະ ຕ່າງປະເທດ ມາຮອດ ປັດຈຸບັນມີໂຮງແຮມ 22 ແຫ່ງ, ເຮືອນພັກ 123 ແຫ່ງ, ຣີສອດ 13 ແຫ່ງ, ບັງກາໂລ 11 ແຫ່ງ ແລະ ໂຮມສເຕ 1 ແຫ່ງ ເຊິ່ງມີຫ້ອງ ພັກທັງໝົດ 2.867 ຫ້ອງ ແລະ ສາມາດຮອງຮັບແຂກທີ່ມາພັກເຊົາໄດ້ 2.734 ຄົນຕໍ່ມື້.

ນອກຈາກນີ້, ຍັງຕ້ອງໄດ້ມີການຄຸ້ມຄອງທາງດ້ານລາຄາ ໂດຍມີການແຕ່ງຕັ້ງຄະນະກຳມະການລົງກວດກາກຳນົດລາຄາໂຮງແຮມ ຫຼື ເຮືອນພັກໃຫ້ແທດເໝາະກັບຕົວຈິງ ແລະ ບໍ່ໃຫ້ສວຍໂອກາດຂຶ້ນລາຄາໃນໄລຍະຈັດງານເທດສະການດົນຕີ ໂດຍຜູ້ປະກອບ ການຈະຕ້ອງໄດ້ຕິດລາຄາໃສ່ດ້ານໜ້າໂຮງແຮມ ຫຼື ບ່ອນຕ້ອນຮັບແຂກເພື່ອໃຫ້ນັກທ່ອງທ່ຽວຮັບຮູ້.

 

[ ຂ່າວ: ທິບອຸສາ ]

Leave a Reply

Your email address will not be published. Required fields are marked *

Facebook