ທ່ານ ສອນໄຊ ສີພັນດອນ ຊຸກຍູ້ການກໍ່ສ້າງໂຮງຮຽນປະ ຖົມສົມບູນ ພັນໄຊ

ໃນວັນທີ 7 ພະຈິກ 2018 ທ່ານ ສອນໄຊ ສີພັນດອນ  ຮອງນາຍົກລັດຖະມົນຕີ ພ້ອມດ້ວຍຄະນະ ໄດ້ໄປຊຸກຍູ້,  ຕິດຕາມ-ກວດກາ ເບິ່ງຄວາມຄືບໜ້າ  ໃນການກໍ່ສ້າງອາຄານໂຮງຮຽນຫລັງໃໝ່  ຢູ່ໂຮງ ຮຽນປະຖົມສົມບູນພັນໄຊ ເມືອງຊຳເໜືອ ແຂວງຫົວພັນ.  ໂດຍມີການນຳຂອງແຂວງຫົວພັນ,  ຄູອາຈານ ແລະ ນ້ອງນັກຮຽນ ໂຮງຮຽນດັ່ງກ່າວ  ໃຫ້ການຕ້ອນຮັບຢ່າງອົບອຸ່ນ.

ອາຄານຮຽນຫລັງໃໝ່ ແມ່ນຄອບຄົວຂອງ  ທ່ານ ສອນໄຊ ສີພັນດອນ ມອບເປັນຂອງຂວັນໃຫ້ອົງການປົກຄອງ  ແລະ ປະຊາຊົນທ້ອງຖິ່ນດັ່ງກ່າວ,  ໂດຍການສະໜັບສະໜູນທຶນ ຈາກທະນາຄານ ເອັດທີ (ST Bank),  ເປັນອາຄານກໍ່ສອງຊັ້ນ,  ມີຂະໜາດ 9×33 ແມັດ, ປະກອບ ມີ 6 ຫ້ອງຮຽນ, 2 ຫ້ອງການ ຄູ-ອາຈານ,  ສາມາດຮອງຮັບນັກຮຽນ ເຂົ້າຮຽນໄດ້ 200 ກວ່າຄົນ,  ລວ​ມມູນຄ່າການກໍ່ສ້າງທັງໝົດ 2,4 ຕື້ກີບ,  ໂດຍແມ່ນບໍລິສັດ ໄຊເສດຖາກໍ່ສ້າງຂົວທາງ ຈຳກັດ  ເປັນຜູ້ຮັບເໝົາກໍ່ສ້າງ ​ແລະ ໄດ້ເລີ່ມລົງມືກໍ່ສ້າງ ມາແຕ່ເດືອນກັນຍາ 2018, ມີຄວາມຄືບໜ້າປະມານ 30%,  ຈະໃຫ້ສຳເລັດ 100%  ໃນເດືອນເມສາ 2019. ປັດຈຸບັນ ໂຮງຮຽນປະຖົມສົມບູນພັນໄຊ ມີ ນັກຮຽນ ແຕ່ຊັ້ນ ປ1-ປ5  ລວມທັງໝົດ 196 ຄົນ, ມີຄູ-ອາຈານ 9 ທ່ານ.

ໃນໂອກາດນີ້, ທ່ານຮອງນາຍົກລັດຖະມົນຕີ  ໄດ້ໃຫ້ກຽດພົບປະໂອ້ລົມ ຕໍ່ບໍລິສັດຜູ້ຮັບເໝົາກໍ່ສ້າງ ແລະ ຄູອາຈານ,  ໄດ້ສະແດງຄວາມຍ້ອງຍໍຊົມເຊີຍ ຕໍ່ຜົນສໍາເລັດ  ຂອງບໍລິສັດ ແລະ ຄູອາຈານ  ທີ່ສາມາດ ປະຕິບັດໜ້າທີ່ວຽກງານຂອງຕົນ ມີຜົນສຳເລັດເປັນກ້າວໆ. ພ້ອມນັ້ນ, ຍັງໄດ້ຊີ້ນໍາໃຫ້ສືບຕໍ່ເອົາໃຈໃສ່ ຕໍ່ວຽກງານການກໍ່ສ້າງໂຮງຮຽນດັ່ງກ່າວ ໃຫ້ໄດ້ມາດຕະຖານ,  ຖືກຕ້ອງຕາມເຕັກນິກວິຊາການ ແລະ ສຳ ເລັດ ຕາມຄາດໝາຍທີ່ວາງໄວ້.  ພ້ອມ​ນີ້, ຍັງໄດ້ເນັ້ນໜັກໃຫ້ຄູ-ອາຈານ  ຈົ່ງພ້ອມກັນສືບຕໍ່ເສີມຂະຫຍາຍ ມູນເຊື້ອອັນດີງາມຂອງໂຮງຮຽນ ກໍຄື ທ້ອງຖິ່ນຂອງຕົນ  ໃຫ້ກວ້າງຂວາງ, ເລິກເຊິ່ງ ແລະ ໝັ້ນຄົງ ຍາວນານ,  ເອົາໃຈໃສ່ຕໍ່ວຽກງານການສິດສອນ,  ການປະຕິບັດໜ້າທີ່,  ຄວາມຮັບຜິດຊອບໃຫ້ມີຜົນາເລັດໃໝ່ ແລະ ຍິ່ງໃຫຍ່ກວ່າເກົ່າ,  ທີ່ສຳຄັນແມ່ນສິດສອນນັກຮຽນໃຫ້ຮຽນເກັ່ງ, ມີ ຄຸນນະພາບ, ສາມາດ ແຂ່ງຂັນໄດ້  ແລະ ກາຍເປັນຜູ້ສືບທອດທີ່ດີໃນອະນາຄົດ.

 

ແຫຼ່ງຂ່າວ: ຂ່າວສານປະເທດລາວ

 

Leave a Reply

Your email address will not be published. Required fields are marked *

Facebook