ຜູ້ນໍາເກົາຫຼີເໜືອ ຕ້ອນຜູ້ນຳຄິວບາ

ສໍານັກຂ່າວຕ່າງປະເທດລາຍງານຈາກນະຄອນໂຊລ ປະເທດເກົາຫຼີໃຕ້ ເມື່ອວັນທີ່ 6 ພະຈິກ 2018 ວ່າ ທ່ານ ຄິມ ຈອງ-ອຶນ ຜູ້ນໍາສູງສຸດຂອງເກົາຫຼີເໜືອ ຕ້ອນຮັບປະທານາທິບໍດີມິເກລ ດິແອຊ-ກາເນລ ຜູ້ນໍາຄິວບາ ເຊິ່ງຢ້ຽມຢາມນະຄອນປຽງຢາງ ຢ່າງເປັນທາງການ ເມື່ອວັນຈັນທີ່ຜ່ານມາ ແມ່ນວ່າສໍານັກຂ່າວກາງເກົາຫຼີ (ເຄຊີເອັນເອ) ບໍ່ໄດ້ໃຫ້ລາຍລະອຽດກ່ຽວກັບພາລະ ກິດຂອງຜູ້ນໍາຄິວບາຫຼາຍ ແຕ່ລາຍງານວ່າຜູ້ນໍາທັງສອງປະເທດຫາລືກ່ຽວກັບສະຖານະການ ປັດຈຸບັນເທິງໂລກ ແລະ ການເເບ່ງປັນປະຫວັດສາດກ່ຽວກັບສັງຄົມນິຍົມ ພ້ອມນັ້ນເຫັນດີການຍົກລະດັບຄວາມຮ່ວມມືລະດັບທະວີພາຄີໃນອານາຄົດ

ຢ່າງໃດກໍ່ຕາມ ການຢ້ຽມຢາມນະຄອນປຽງຢາງຂອງແອຊ-ກາເນລ ເຊິ່ງຮັບຕໍາແໜ່ງຜູ້ນໍາຄິວບາເມື່ອເດືອນເມສາ ທີ່ຜ່ານມາ ເກີດຂື້ນພຽງບໍ່ເທົ່າວັນຫຼັງສະມັດຊາໃຫຍ່ແຫ່ງສະຫະປະຊາຊາດ (ຢູເອັນຈີເອ) ມີມະຕິສຽງສ່ວນໃຫຍ່ 189 ຕໍ່ 2 ສຽງ ປະນາມມາດ ຕະການປິດລ້ອມທາງເສດຖະກິດ ແລະ ອາວຸດຂອງສະຫະລັດຕໍ່ຄິວບາ ແລະ ປະຕິເສດຂໍ້ຮຽກຮ້ອງຂອງລັດຖະບານວໍຊິງຕັນເຊິ່ງ ຕ້ອງການ “ແກ້ໄຂ” ປະຫວັດດ້ານສິດທິມະນຸດຊະຍະຊົນຂອງຄິວບາ ໂດຍສຽງຄັດຄ້ານມີພຽງສະຫະລັດ ແລະ ອິດສະລະເອລ ສະນັ້ນທໍານຽບຂາວຢືນຢັນຈະຂະຫຍາຍຂອບເຂດມາດຕາການຂວໍ້າບາດຕໍ່ຄິວບາພາຍໃນອານາຄົດອັນໃກ້ນີ້

ນອກຈາກນີ້ ການຫາລືເລື່ອງປົດອາວຸດນິວເຄຼຍລະຫວ່າງສະຫະລັດ ກັບ ເກົາຫຼີເໜືອເກືອບຈະບໍ່ມີຄວາມຄືບໜ້າ ນັບຕັ້ງແຕ່ການ ປະຊຸມລະດັບສູງສຸດຄັ້ງປະຫວັດສາດຮ່ວມກັນທີ່ສິງກະໂປ  ໂດຍລັດຖະບານວໍຊິງຕັນຢືນຢັນຈະໃຊ້ມາດຕາການກົດດັນທາງເສດຖະ ກິດຕໍ່ລັດຖະບານປຽງຢາງຕໍ່ໄປ ຈົນກວ່າຂະບວນການປົດອາວຸດນິວເຄຼຍ “ຈະສໍາເລັດຢ່າງສົມບູນແບບ” ດ້ານກະຊວງປ້ອງກັນປະ ເທດເກົາຫຼີເໜືອອອກຖະແຫຼງການເມື່ອວັນອາທິດ ວ່າອາດຈະຮື້ຟື້ນນະໂຍບາຍແຫ່ງຊາດ “ພະຢອງຈິນ” ທີ່ເປັນ “ການພັດທະນາ ໂຄງການນິວເຄຼຍຄວບຄູ່ກັບການພັດທະນາເສດຖະກິດ” ຫາກສະຫະລັດຍັງຄົງບໍ່ປັບປ່ຽນຈຸດຢືນໃນການໃຊ້ມາດຕາການຂວໍ້າ ບາດຝ່າຍດຽວຕໍ່ເກົາຫຼີເໜືອ.

 

Leave a Reply

Your email address will not be published. Required fields are marked *

Facebook