ນັກສຶກສາ 49 ຄົນ ສຳເລັດການຝຶກອົບຮົມນຳໃຊ້ພື້ນຖານພາສາເກົາຫຼີ ແລະ ດ້ານໄອທີ

ສະຖາບັນ ໄອຊີທີ ມິດຕະພາບ ລາວ – ເກົາຫຼີ ຈັດພິທີມອບ – ຮັບໃບຢັ້ງຢືນໃຫ້ນັກສຶກສາຂອງສູນຝຶກອົບຮົມດາຕາຄອມພິວເຕີ ແລະ ທຸລະກິດດາຕາຄອມ ຈຳນວນ 49 ຄົນ ທີ່ຈົບການຝຶກອົບຮົມຫຼັກສູດທິດສະດີ ແລະ ຝຶກອົບຮົມໄລຍະ 3 ເດືອນ ໃນ 3 ສາຂາວິຊາຮຽນ ຄື: Network System, Web Coding, Graphic Design ທີ່ຜ່ານທັກສະການໃຊ້ພື້ນຖານພາສາເກົາຫຼີ ແລະ ດ້ານໄອທີ ທີ່ກ່ຽວຂ້ອງກັບສາຂາການຮຽນຈະມີໂອກາດໄປເຮັດວຽກຢູ່ ສ.ເກົາຫຼີ ໃນໄລຍະ 6 ເດືອນຂຶ້ນໄປ.

ພິທີດັ່ງກ່າວ ຈັດຂຶ້ນໃນວັນທີ 2 ພະຈິກຜ່ານມາ ທີ່ສະຖາບັນ ໄອຊີທີ ມິດຕະພາບ ລາວ – ເກົາຫຼີ ( ອາຄານວຽງວັງທາວເວີ້ ) ເຊິ່ງເປັນກຽດເຂົ້າຮ່ວມໂດຍ ທ່ານ ລີຢົງຮຸນ ປະທານ ບໍລິສັດ ໄນເນັດ ແລະ ເປັນຜູ້ອຳນວຍການສະຖາບັນ ໄອຊີທີ ມິດຕະພາບ ລາວ – ເກົາຫຼີ, ທ່ານ ທະນົງສິນ ກັນລະຍາ ປະທານ ບໍລິສັດ ດາຕາຄອມ ຈຳກັດຜູ້ດຽວ, ມີຮອງຫົວໜ້າກົມສີມືແຮງງານ ແລະ ຈັດຫາງານ ກະຊວງແຮງງານ ແລະ ສະຫວັດດີການສັງຄົມ, ຫົວໜ້າພາກວິຊາວິທະຍາສາດ – ການກີລາ ມະຫາວິທະຍາໄລແຫ່ງຊາດ ພ້ອມດ້ວຍພະນັກງານ, ຄູ – ອາຈານ, ແຂກທີ່ຖືກເຊີນ ແລະ ນັກສຶກສາເຂົ້າຮ່ວມຢ່າງພ້ອມພຽງ.

 

ການຝຶກອົບຮົມແມ່ນໄດ້ເລີ່ມແຕ່ວັນທີ 16 ກໍລະກົດ ຫາ ວັນທີ 15 ຕຸລາ 2018 ໃນ 3 ສາຂາວິຊາຮຽນ ຄື: Network System, Web Coding, Graphic Design ທີ່ຜ່ານທັກສະການໃຊ້ພື້ນຖານພາສາເກົາຫຼີ ແລະ ດ້ານໄອທີ. ສຳລັບນັກຮຽນຜູ້ທີ່ມີຜົນການຮຽນດີເດັ່ນແມ່ນຈະມີໂອກາດໄປເຮັດວຽກຢູ່   ສ.ເກົາຫຼີ ໃນໄລຍະ 6 ເດືອນຂຶ້ນໄປ ແລະ ຫວັງວ່ານັກຮຽນທີ່ມີປະສົບການຈາກການເຮັດວຽກໃນປະເທດເກົາຫຼີ ເມື່ອພັດທະນາຕົນເອງແລ້ວຄາດວ່າຈະກັບມາລາວ ແລະ ມີບົດບາດສຳຄັນໃນການພັດທະນາອຸດສາຫະກຳໄອທີໃນລາວ.

ສະຖາບັນ ໄອຊີທີ ມິດຕະພາບ ລາວ – ເກົາຫຼີ ແມ່ນສະຖາບັນການສຶກສາທີ່ເປັນມືອາຊີບທາງດ້ານ ໄອຊີທີ ເຊິ່ງເປັນບໍລິສັດຮ່ວມທຶນລະຫວ່າງ ບໍລິສັດ ດາຕາຄອມ ຈຳກັດຜູ້ດຽວ, ບໍລິສັດ ໄອຊີທີ ຊັ້ນນຳໃນປະເທດລາວ ແລະ ບໍລິສັດ ໄນເນັດ, ບໍລິສັດ ໄອຊີທີ ໃນເກົາຫຼີ ເຊິ່ງມີຈຸດປະສົງໃນການສົ່ງເສີມຜູ້ຊ່ຽວຊານ ໄອຊີທີ ໃນລາວ.

ທ່ານ ລີຢົງຮຸນ ປະທານ ບໍລິສັດ ໄນເນັດ ທັງເປັນຜູ້ອຳນວຍການ ສະຖາບັນ ໄອຊີທີ ມິດຕະພາບ ລາວ – ເກົາຫຼີ ກ່າວວ່າ: ຂ້າພະເຈົ້າມີຄວາມພາກພູມໃຈກັບນັກສຶກສາທີ່ໄດ້ສຳເລັດການສຶກສາທີ່ຕ້ອງຮຽນຮູ້ກ່ຽວກັບເນື້ອໃນທີ່ຍາກສຳລັບໄລຍະສັ້ນໃນ 3 ເດືອນ, ຂ້າພະເຈົ້າຫວັງວ່ານັກຮຽນທຸກຄົນເມື່ອໄດ້ໄປເຮັດວຽກຢູ່ທີ່ປະເທດເກົາຫຼີແລ້ວ ຈະສາມາດປັບຕົວເຂົ້າກັບສະຖານະການ ແລະ ຄົນໃນພື້ນທີ່ໄດ້ດີ ເຊິ່ງພວກເຮົາຈະພາຍາຍາມໃຫ້ດີທີ່ສຸດເພື່ອຈະສ້າງໂອກາດໃຫ້ນັກຮຽນຊຸດໃໝ່ສາມາດໄປເຮັດວຽກຢູ່ທີ່ ສ.ເກົາຫຼີໄດ້.

ໂອກາດດຽວກັນນີ້ ທ່ານ ທະນົງສິນ ກັນລະຍາ ປະທານ ບໍລິສັດ ດາຕາຄອມ ກ່າວວ່າ: ພວກເຮົາຄາດຫວັງວ່າຊາວໜຸ່ມລາວທີ່ໄດ້ຮຽນຮູ້ກ່ຽວກັບ ໄອຊີທີ ຢູ່ ສ.ເກົາຫຼີ ແລ້ວຈະກາຍເປັນພື້ນຖານສຳລັບການພັດທະນາເຕັກໂນໂລຊີ ໄອຊີທີ ຂອງລາວໃນອະນາຄົດອັນມໍ່ໆນີ້ ແລະ ໃນນັ້ນ, ບັນດາກະຊວງທີ່ສຳຄັນ ເຊັ່ນ: ກະຊວງສາທາລະນາສຸກ, ກະຊວງອຸດສາຫະກຳ ແລະ ການຄ້າ, ສະພາການຄ້າ ແລະ ອຸດສາຫະກຳແຫ່ງຊາດລາວ ກໍ່ໄດ້ໃຫ້ສະໜັບສະໜູນນັກສຶກສາທ້າທາຍໃນອະນາຄົດ ໃໝ່.

ໃນພິທີດັ່ງກ່າວ ທ່ານ ລີຢົງຮຸນ ປະທານ ບໍລິສັດ ໄນເນັດ ແລະ ເປັນຜູ້ອຳນວຍການສະຖາບັນ ໄອຊີທີ ມິດຕະພາບ ລາວ – ເກົາຫຼີ ເປັນກຽດຂຶ້ບມອບໃບຢັ້ງຢືນໃຫ້ແກ່ນັກສຶກສາທີ່ສຳເລັດຫຼັກສູດການຮຽນຄັ້ງນີ້, ຈຳນວນ 49 ຄົນ ແລະ ທ່ານ ທະນົງສິນ ກັນລະຍາ ປະທານ ບໍລິສັດ ດາຕາຄອມ ເປັນກຽດມອບໃບຍ້ອງຍໍໃຫ້ນັກສຶກສາທີ່ມີຜົນການຮຽນດີເດັ່ນ ຈຳນວນ 3 ຄົນ. ສຳລັບນັກສຶກສາທີ່ສຳເລັດການສຶກສາຄັ້ງນີ້ ແມ່ນຈະຖືກຄັດເລືອກເອົານັກຮຽນທີ່ມີຜົນການຮຽນດີເດັ່ນເພື່ອໄປເຮັດວຽກຢູ່ທີ່ ສ.ເກົາຫຼີ ອີກດ້ວຍ.

 

ແຫຼ່ງຂ່າວ: ເສດຖະກິດ-ການຄ້າ

 

 

Leave a Reply

Your email address will not be published. Required fields are marked *

Facebook