ໂຮງຮຽນສິນໄຊ ຈັດກິດຈະກຳແຂ່ງຂັນເລົ່າຄາຖາເຊົາຢາສູບ

ພະອາຈານ ບຸນຍາດ ຄຳຜຸ ເຈົ້າອາວາດ ວັດນາກໃຫຍ່ ເມືອງສີສັດຕະນາກ ພ້ອມດ້ວຍຄະນະ ໄດ້ລົງຈັດກິດຈະກຳກ່ຽວກັບປອດຄວັນຢາສູບ ແລະ ຕ້ານຢາເສບຕິດ ຢູ່ທີ່ໂຮງຮຽນສິນໄຊ ໃນວັນທີ 31 ຕຸລາຜ່ານມາ ເພື່ອໃຫ້ນ້ອງໆພາຍໃນໂຮງຮຽນໄດ້ຮັບຮູ້ສິນຫ້າ ເຊິ່ງເປັນພື້ນຖານຂອງພະພຸດທະສາສະໜາ ພ້ອມທັງໃຫ້ນັກຮຽນໄດ້ເຂົ້າໃຈຜົນຮ້າຍຂອງຢາເສບຕິດ ເປັນຕົ້ນແມ່ນ ຢາສູບ, ຢາບ້າ, ສິ່ງມຶນເມົາ ແລະ ອື່ນໆ.

ທ່ານ ນາງ ອາລີ ພົນເສນາ ຜູ້ອຳນວຍການ ໂຮງຮຽນສິນໄຊ ໃຫ້ຮູ້ວ່າ: ມື້ນີ້ໂຮງຮຽນສິນໄຊ ໄດ້ຈັດກິດຈະກຳກ່ຽວກັບປອດຄວັນຢາສູບ ແລະ ຕ້ານຢາເສບຕິດ ຖືວ່າເປັນກິດຈະກຳໜຶ່ງທີ່ນອນຢູ່ໃນແຜນພັດທະນາການຮຽນ – ການສອນ ໂດຍອີງໃສ່ການປະຕິບັດຄຳຂວັນ 3 ຂໍ້ແຂ່ງຂັນຂອງກະຊວງສຶກສາທິການ ແລະ ກີລາວາງອອກ ຄື: ສອນດີ – ຮຽນເກັ່ງ, ຕ້ານປະກົດການຫຍໍ້ທໍ້ໃນໂຮງຮຽນ ແລະ ສ້າງສະພາບແວດລ້ອມທີ່ດີໃຫ້ສະຖາບັນການສຶກສາ.

ໃນພິທີດັ່ງກ່າວ ທາງໂຮງຮຽນຍັງໄດ້ຄັດເລືອກເອົານັກຮຽນຈໍານວນ 10 ນ້ອງ ຂຶ້ນເລົ່າຄາຖາເຊົາຢາສູບ ໂດຍເນັ້ນເລືອກສະເພາະຜູ້ທີ່ເລົ່າໄດ້ຄ່ອງແຄ້ວ, ເປັນຈັງຫວະ ແລະ ຖືກຕ້ອງຕາມຫຼັກໄວຍາກອນ ( ຈຸດ, ຈໍ້າ, ວັກ, ຕອນ ) ມີນໍ້າສຽງແຈ່ມແຈ້ງ, ການແນະນໍາຕົນເອງ ແລະ ບຸກຄະລິກກະພາບ ເພື່ອຊີງລາງວັນເອົາລົດຖີບ.

ຜ່ານການຄັດເລືອກຈາກຄະນະກໍາມະການ ຜູ້ທີ່ສາມາດເລົ່າໄດ້ມ່ວນ ແລະ ຖືກຈັງຫວະ ຊະນະເລີດໄດ້ແກ່ ນາງ ສີລິວັນ ອິນທະວົງ ຮຽນຊັ້ນ ປ 1 ໄດ້ຮັບລາງວັນລົດຖີບ 1 ຄັນ ພ້ອມອຸປະກອນການຮຽນຈຳນວນໜຶ່ງ ແລະ ຈຳນວນ 9 ຄົນ ທີ່ເຂົ້າຮ່ວມແຂ່ງຂັນແມ່ນໄດ້ຮັບລາງວັນເປັນອຸປະກອນການຮຽນຈຳໜຶ່ງ ແລະ ນ້ອງໆທີ່ເຂົ້າຮ່ວມກິດຈະກຳກໍ່ໄດ້ຮັບອຸປະກອນການຮຽນເປັນປຶ້ມ, ບິກ, ສໍ ແລະ ອື່ນໆຕິດມືກັບບ້ານເຊັ່ນດຽວກັນ.

 

ແຫຼ່ງຂ່າວ: ເສດຖະກິດ-ການຄ້າ

 

 

Leave a Reply

Your email address will not be published. Required fields are marked *

Facebook