ຍີ່ປຸ່ນ, ຈີນ ແລະ ເກົາຫລີໃຕ້ ຖະຫລົ່ມຄູ່ແຂ່ງຫລັກເຄິ່ງໂຫລ! ບານໂລກ 2022 ຮອບຄັດເລືອກ!!

ການແຂ່ງຂັນເຕະບານຊາຍຊິງແຊ້ມໂລກ 2022 ຮອບຄັດເລືອກ ຂົງເຂດອາຊີ ຮອບທີ 2 ໃນມື້ນີ້ 10 ຕຸລາ 2019. ກຸ່ມ H ສາທາລະນະລັດເກົາຫລີ (ເກົາຫລີໃຕ້) ທີ່ສາມາດຜ່ານເຂົ້າສູ່ຮອບສຸດທ້າຍ 9 ຄັ້ງຫລັງສຸດ ລົງແຂ່ງນັດທີ 2 ເປີດບ້ານໄລ່ຖະຫລົ່ມ ສຣີລັງກາ 8-0 ຄິມຊິນວຸກ ກອງໜ້າຈາກ ຊ່ຽງໄຮ້ ເສິນຫົວ ຍິງແຮັດທຣິກ 3 ປະຕູ, ຊອນເຮືອງມິນ ກອງໜ້າຈາກສະເປີ ຍິງ 2 ປະຕູ, ປິດທ້າຍຈາກສອງນັກເຕະຈາກລີກເຢຍລະມັນ ຫວາງຮີຊານ ຈາກຮຳບວກ ແລະ ວອນຊາງຮຸນ ຈາກໄຟຣບວກ.

ເກົາຫລີໃຕ້ ຊະນະສອງນັດລວດ ເກັບ 6 ຄະແນນເຕັມ ເປັນທິມນຳຂອງກຸ່ມ ເທົ່າກັບ ສປປ ເກົາຫລີ (ເກົາຫລີເໜືອ) ແຕກຕ່າງພຽງປະຕູໄດ້ເສຍ, ອີກຄູ່ໜຶ່ງໃນກຸ່ມດຽວກັນ ເລບານອນ (ລີບັງ) ຈະພົບກັບ ເຕີກມິນິດສະຖານ ໃນເວລາ 23:00. ກຸ່ມ F ຍີ່ປຸ່ນ ເປີດບ້ານຖະຫລົ່ມ ມົງໂກລີ 6-0 ຍິງແບບບໍ່ຊ້າໜ້າ ມິນາມິໂນະ, ໂຢຊີດະ, ນາກາໂຕໂມະ, ນາກາອິ, ເອັນໂດະ ແລະ ນາມາດະ ຍີ່ປຸ່ນຊະນະສອງນັດລວດ ເປັນທິມນຳຂອງກຸ່ມ, ຄະແນນເທົ່າກັບ ທາຈີກິດສະຖານ ແຕ່ປະຕູໄດ້ເສຍຍີ່ປຸ່ນດີກວ່າ, ອີກຄູ່ໜຶ່ງໃນກຸ່ມດຽວກັນ ກີກິດສະຖານ ພົບ ມຽນມາ.

ກຸ່ມ A ສປ ຈີນ ເປີດບ້ານຖະຫລົ່ມ ກວມ 7-0 ຢາງຊູ້ ຍິງຜູ້ດຽວ 4 ປະຕູ, ຫວູເລ່ຍ, ຫວູສີ ແລະ ເອເຄວສັນ ກອງໜ້າຊາວເບຣຊິນ ທີ່ໂອນສັນຊາດມາເປັນຈີນ ຍິງຜູ້ລະປະຕູ, ຈີນ ຊະນະສອງນັດລວດເຊັ່ນດຽວກັບ ຍີ່ປຸ່ນ ແລະ ເກົາຫລີໃຕ້, ອີກໜຶ່ງຄູ່ໃນກຸ່ມດຽວກັນ ຊີເຣຍ (ຊີຣີ) ພົບ ເມົາດິຟ. ຂະນະທີ່ ອົດສະຕຣາລີ ຊະນະ ເນປານ 5-0 ແລະ ອຸດສະເບກິດສະຖານ ຊະນະເຢເມັນ 5-0 ເຊັ່ນກັນ.

ສຳລັບນັດຕໍ່ໄປ ສປ ຈີນ ຈະບຸກໄປຢາມ ຟີລິບປິນ ໃນວັນທີ 15 ຕຸລານີ້, ຂະນະທີ່ ຍີ່ປຸ່ນ ຈະໄປຢາມ ທາຈີກິດສະຖານ ໃນວັນດຽວກັນ ສ່ວນ ເກົາຫລີໃຕ້ ຈະໄປຢາມເກົາຫລີເໜືອ ໃນມື້ດຽວກັນ.

 

 

ຂໍ້ມູນມາຈາກ : ຂ່າວກິລາໂທລະພາບແຫ່ງຊາດລາວ

ຕອບກັບ

ເມວຂອງທ່ານຈະບໍ່ຖືກເຜີຍແຜ່ໃຫ້ໃຜຮູ້ ບ່ອນທີ່ຕ້ອງການແມ່ນຖືກຫມາຍໄວ້ *