ແຂວງບໍ່ແກ້ວທຳລາຍຢາເສບຕິດ 3,341,072 ກິໂລກຣາມ

ເນື່ອງໃນວັນແຫ່ງຊາດຕ້ານຢາເສບຕິດຄົບຮອບ 18 ປີ ( ວັນທີ 12 ຕຸລາ 2001 – 12 ຕຸລາ 2019 ປີ ) ໃນວັນທີ 10 ຕຸລາ 2019 ຢູ່ເດີນກິລາ ບ້ານ ປ່າອ້ອຍ ເມືອງຫ້ວຍຊາຍ ແຂວງບໍ່ແກ້ວ ໄດ້ພິທີທຳລາຍຢາເສບຕິດ ໃນນີ້ ມີປະເພດຢາບ້າ ຈໍານວນ 1.791.720 ເມັດ, ໜັກ 179 ກິໂລ, ກັບ 172,6 ກຣາມ, ເຮໂລອິນ ຈໍານວນ 58 ແຫ່ງ, ໜັກ 23 ກິໂລກຣາມ ແລະ ຢາໄອສ໌ ຈໍານວນ 653 ກິໂລ, ກັບ 500,59 ກຣາມ ໂດຍການເຂົ້າຮ່ວມ ຂອງທ່ານ ຈອມສີ ລັດຕະນະປັນ ຄະນະປະຈຳພັກແຂວງ ຮອງເຈົ້າແຂວງບໍ່ແກ້ວ, ການນໍາແຂວງ, ເມືອງ ສອງກອງບັນຊາການ ປກຊ – ປກສ, ນັກທຸລະກິດ, ພໍ່ຄ້າ – ຊາວຂາຍ, ອໍານາດການປົກຄອງຂັ້ນບ້ານ ເຂົ້າຮ່ວມ. ທ່ານ ພັນເອກ ອິນສົມ ທໍລະສິນ ຮັກສາການຫົວຫນ້າກອງບັນຊາການ ປກສ ແຂວງບໍ່ ແກ້ວ ໄດ້ເວົ້າວ່າ: ຢາເສບຕິດກໍ່ໃຫ້ເກີດຜົນສະທ້ອນຕໍ່ຄອບຄົວ ແລະ ບຸກຄົນອ້ອມຂ້າງ ເຮັດໃຫ້ເກີດມີຄວາມສັບສົນວຸ້ນວາຍໃນສັງຄົມ, ເປັນຕົ້ນພາໃຫ້ເກີດມີອາຊະຍາກໍາປະເພດຕ່າງໆ, ອາລະວາດ, ປຸ້ນຈີ້, ເກີດມີຂີ້ລັກງັດແງະ, ເຮັດໃຫ້ເຊື່ອມເສຍ ວັດທະນະທໍາອັນຂອງຊາດ. ຕໍ່ກັບສະພາບການດັ່ງກ່າວ ພັກ – ລັດ ຖະບານ ໄດ້ເອົາໃຈໃສ່ຊອກທຸກວິທີທາງ ເພື່ອແກ້ໄຂບັນຫາຢາເສບຕິດຢ່າງຕໍ່ເນື່ອງຕະຫຼອດມາ, ຫ້ອງການກວດກາ ແລະ ຄວບຄຸມຢາເສບຕິດ, ກະຊວງປ້ອງກັນຄວາມສະຫງົບ ກໍ່ໄດ້ຈັດສ້າງລະບຽບກົດຫມາຍວ່າດ້ວຍຢາເສບຕິດ ແລະ ມະຕິ, ຄໍາສັ່ງ, ແຈ້ງການອອກເຜີຍແຜ່ເວົ້າລວມ, ເວົ້າສະເພາະແຂວງບໍ່ແກ້ວ ກໍ່ໄດ້ມີການຈັດຕັ້ງຄະນະກໍາມະການກວດກາ ແລະ ຄວບຄຸມຢາເສບຕິດແຂວງ, ພະແນກສະກັດກັ້ນ ແລະ ຕ້ານຢາເສບຕິດຂຶ້ນ ເພື່ອເຮັດໜ້າທີ່ໃນການກວດກາ ແລະ ຄວບຄຸມ, ເພື່ອຫຼຸດຜ່ອນຜູ້ທີ່ຜະລິດ, ຜູ້ທີ່ລັກລອບຄ້າຂາຍ, ຈໍາໜ່າຍຢາເສບຕິດພາຍໃນແຂວງ.

ຕອບກັບ

ເມວຂອງທ່ານຈະບໍ່ຖືກເຜີຍແຜ່ໃຫ້ໃຜຮູ້ ບ່ອນທີ່ຕ້ອງການແມ່ນຖືກຫມາຍໄວ້ *