ສະຖິຕິໃຫມ່! ກຳປູເຈຍ ເສຍຫລາຍສຸດໃນປະຫວັດສາດ ຫລັງຖືກ ອີຣານ ຖະຫລົ່ມເລະ 14-0! ບານໂລກ 2022 ຮອບຄັດເລືອກ!!

ການແຂ່ງຂັນເຕະບານຊາຍຊິງແຊ້ມໂລກ 2022 ຮອບຄັດເລືອກ ຂົງເຂດອາຊີ ຮອບທີ 2 ໃນມື້ວານນີ້ 10 ຕຸລາ 2019. ກຸ່ມ C ທິມຊາດອີຣານ ເບີ 1 ຂອງອາຊີ ລົງແຂ່ງນັດທີ 2 ເປີດສະໜາມອາຊາດີ້ ໃນນະຄອນຫລວງເຕຮາຣານ ຖະຫລົ່ມ ທິມຊາດກຳປູເຈຍ ມຸ່ນອຸ້ຍປຸ້ຍ 14-0 ໃນນີ້ ຄາຣິມ ອັນຊາຣີຟາດ ອະດີດກອງໜ້າ ນ໊ອດຕິ້ງແຮມ ຟໍເຣັສ ແລະ ໂອລິມເປຍກັອສ ຍິງຜູ້ດຽວ 4 ໜ່ວຍ, ຊາຣດ້າ ອັຊມູນ ກອງໜ້າ ເຊນິດ ເຊັນປີເຕີສະເບີກ ຍິງ 3 ປະຕູ, ເຕເຣມີ້ ແລະ ໂມເຮບີ້ ຜູ້ລະສອງປະຕູ, ນູໂຣລາຮີ ແລະ ໂມຮຳມາດີ້ ຜູ້ລະປະຕູ.

ພິເສດໃນນັດນີ້ ລັດຖະບານອີຣານ ຮັບຄຳແນະນຳຈາກຟີຟ້າ ໃຫ້ກອງເຊຍເພດຍິງເຂົ້າຊົມການແຂ່ງຂັນອີກຄັ້ງໃນຮອບ 40 ປີ ຕໍ່ຈາກປີ 1979 ພ້ອມກັບມີສະຖິຕິໃຫມ່ ກຳປູເຈຍ ເສຍຫລາຍສຸດໃນປະຫວັດສາດ ກ່ອນໜ້ານີ້ເສຍຂາດສຸດແມ່ນເສຍໃຫ້ ອິນໂດເນເຊຍ 0-10 ໃນປີ 1995. ແລະ ນີ້ຍັງບໍ່ແມ່ນສະຖິຕິຊະນະຫລາຍສຸດຂອງ ອີຣານ ເພາະການຊະນະຫລາຍສຸດຂອງ ອີຣານ ແມ່ນຊະນະ ກວມ 19-0 ໃນວັນທີ 24 ພະຈິກ 2000.

ອີຣານ ຊະນະສອງນັດລວດ ເກັບ 6 ຄະແນນເຕັມເປັນທິມນຳຂອງກຸ່ມ, ສ່ວນ ກຳປູເຈຍ ແຂ່ງ 3 ນັດ ມີ 1 ຄະແນນ. ອີກໜຶ່ງຄູ່ໃນກຸ່ມດຽວກັນ ອີຣັກ ຊະນະ ຮົງກົງ 2-0 ອີຣັກ ມີ 4 ຄະແນນຈາກ 2 ນັດ, ຮົງກົງ ມີ 1 ຄະແນນຈາກ 3 ນັດ, ສ່ວນ ບາເຣນ ອີກໜຶ່ງທິມໃນກຸ່ມນີ້ມີ 4 ຄະແນນຈາກ 2 ນັດ. ນັດຕໍ່ໄປຂອງກຸ່ມນີ້ ກຳປູເຈຍ ພົບ ອີຣັກ ແລະ ບາເຣນ ພົບກັບ ອີຣານ ຈະແຂ່ງຂັນໃນວັນທີ 15 ຕຸລານີ້.

 

 

ຂໍ້ມູນມາຈາກ : ຂ່າວກິລາໂທລະພາບແຫ່ງຊາດລາວ

ຕອບກັບ

ເມວຂອງທ່ານຈະບໍ່ຖືກເຜີຍແຜ່ໃຫ້ໃຜຮູ້ ບ່ອນທີ່ຕ້ອງການແມ່ນຖືກຫມາຍໄວ້ *