ການຄ້າແຂວງເຊກອງເອົາໃຈໃສ່ຄຸ້ມຄອງການຂຶ້ນລາຄາສິນຄ້າໄລຍະເກີດໄພພິບັດນໍ້າຖ້ວມ

ພະແນກອຸດສະຫະກໍາ ແລະ ການຄ້າແຂວງເຊກອງ ເອົາໃຈໃສ່ການຄຸ້ມຄອງ ລາຄາສິນຄ້າ ທີ່ຈະມີການສວາຍໂອກາດ ຂຶ້ນລາຄາໃນໄລຍະເກີດ ໄພພິບັດນໍ້າຖ້ວມທີ່ຜ່ານມາ ໂດຍສະເພາະປະເພດສະ ບຽງອາຫານເຂົ້າ, ຊີ້ນ, ປາ ເພາະລາຄາປະເພດນີ້ຈະກະທົບຕໍ່ກັບຊີວິດປະຈໍາວັນຂອງປະຊາຊົນໂດຍໄວ.

ທ່ານ ພັນສອນ ແສນສົ່ງເສີມ ຫົວໜ້າພະແນກອຸດສະຫະກໍາ ແລະ ການຄ້າແຂວງ ໄດ້ໃຫ້ສໍາພາດຕໍ່ສື່ມວນຊົນເມື່ອບໍ່ນານມານີ້ວ່າ: ແຂວງເຊກອງ ກໍເປັນແຂວງໜຶ່ງທີ່ ໄດ້ຮັບຜົນກະທົບນໍ້າຖ້ວມ ສະນັ້ນຕໍ່ກັບການຄຸ້ມຄອງລາຄາສິນຄ້າ ການດັດສົມການ ແຊກແຊງສິນຄ້ານັ້ນ ທາງພະແນກການພວກເຮົາໄດ້ມີມາດຕະການ, ແຜນທິດຊີ້ນໍາຂອງລັດຖະບານ ກໍຄື ກະຊວງອຸດສະຫະກໍາ ແລະ ການຄ້າ ໃນການອອກແຈ້ງການເຖິງ ບັນດາເມືອງຜູ້ປະກອບການ, ຄ້າຂາຍເພື່ອບໍ່ໃຫ້ສວາຍໂອກາດຂຶ້ນລາຄາສິນຄ້າ ໃນໄລຍະເກີດໄພພິບັດນໍ້າຖ້ວມທີ່ຜ່ານມາ. ໃນນັ້ນພວກເຮົາໄດ້ນໍາເອົາ ສິນຄ້າບາງປະເພດ ອອກມາແຊກແຊງດັດສົມສິນຄ້າເປັນຕົ້ນ: ເຂົ້າໂດຍລາຄາຕໍ່າກວ່າ ທ້ອງຕະຫລາດປະມານ 12% ເຊິ່ງໃນທ້ອງຕະຫລາດທົ່ວໄປເຂົ້າປະເພດໜຶ່ງແມ່ນ 1000 ກີບ/ກິໂລ, ປະເພດສອງ 8000 ກີບ ແຕ່ການຂາຍເຂົ້າຄັງແຮ່ນີ້ແຊກແຊງ ລາຄາການດັດສົມຕະຫລາດເຮົາຂາຍ 7000 ກີບ/ກິໂລ ອັນນີ້ ກໍເພື່ອເຮັດໃຫ້ປະຊາຊົນ, ທະຫານ, ຕໍາຫລວດ, ພໍ່ຄ້າຊາວຂາຍຜູ້ບໍລິໂພກ ກໍຄື ບັນດາເມືອງປະຊາຊົນ ທີ່ຖືກຜົນກະທົບໃນຄັ້ງນີ້ ໃຫ້ໄດ້ສົມໃຊ້ດ້ວຍຄວາມຍຸ ຕິທໍາ ແລະ ມີຄວາມພໍໃຈຊີື້ເຂົ້າໄປບໍລິໂພກ ເພື່ອແກ້ໄຂຊີວິດການເປັນຢູ່.

ທ່ານ ຍັງໃຫ້ຮູ້ຕື່ມວ່າ: ພວກເຮົາຍັງມີແຜນສົ່ງຂາຍໄປບັນດາເມືອງ ເຂດທີ່ໄດ້ຮັບຜົນກະທົບຕ່າງໆ ແລະ ຈະສືບຕໍ່ຈັດຕັ້ງປະຕິບັດຈົນກວ່າ ສະພາບກ້າວເຂົ້າສູ່ປົກກະຕິ. ສໍາລັບເຂົ້າທີ່ນໍາມາແຊກແຊງ ແມ່ນມີຫລາຍຮ້ອຍໂຕນ, ເຊິ່ງທາງບໍລິສັດການຄ້າ ຂາອອກ-ຂາເຂົ້າ ເມືອງລະມາມ ໄດ້ທຶນແຮ່ຄັງເຂົ້າລັດຖະບານປະມານ 20 ກວ່າຕື້ ໃນປີຜ່ານມາເພື່ອເຮັດໜ້າທີ່ແຊກແຊງ ແລະ ດັດສົມລາຄາສິນຄ້າ. ໃນໂອກາດນີ້ທ່ານຍັງໄດ້ຮຽກຮ້ອງມາ ຍັງຜູ້ປະກອບການຄ້າຂາຍ, ນັກທຸລະກິດ ທີ່ໄດ້ດໍາເນີນປະກອບ ອາຊີບຄ້າຂາຍ, ບໍ ລິການຮັບໃຊ້ສັງຄົມ ຈົ່ງເຫັນໃຈພໍ່ແມ່ປະຊາຊົນ ຜູ້ທີ່ໄດ້ຮັບຜົນກະທົບໃຫ້ບໍລິການຂາຍ ຢູ່ໃນລາຄາປົກກະຕິ ຫລື ວ່າຕາມກໍານົດລາຄາພາກລັດວາງອອກ, ບໍ່ໃຫ້ສວຍໂອກາດຂຶ້ນລາຄາ ຫລື ການກັກຕຸນສິນຄ້າບໍ່ອອກ ຈໍາໜ່າຍໃນ ສະພາບຈໍາເປັນ. ພ້ອມນີ້ ກໍເຊີນຊວນພໍ່ແມ່-ປະຊາຊົນ, ທະຫານ, ຕໍາຫລວດ ຜູ້ປະກອບການ ສົນໃຈເຂົ້າມາຊື້ເຂົ້າ ໄດ້ທີ່ຈຸດການຄ້າຂອງແຂວງເຊກອງ, ນອກຈາກນີ້ທາງພວກເຮົາ ມີແຜນສົ່ງເຂົ້າໄປອີກຈຸດໜຶ່ງ ຢູ່ທີ່ເມືອງກະລືມ ທີ່ເຫັນວ່າເມືອງກະລືມ ຍັງເປັນເມືອງທີ່ຫຍຸ້ງຍາກ ແລະ ຂາດເຂົ້າກິນ.

ຕອບກັບ

ເມວຂອງທ່ານຈະບໍ່ຖືກເຜີຍແຜ່ໃຫ້ໃຜຮູ້ ບ່ອນທີ່ຕ້ອງການແມ່ນຖືກຫມາຍໄວ້ *