ສະພາປະຊາຊົນ ນະຄອນຫຼວງ ລົງຊຸກຍູ້ວຽກງານຂົງເຂດ ຖວທ

ວັນ​ທີ 9 ຕຸ­ລາ 2019 ທ່ານ​ນາງ ເກດ​ມະ­ນີ ບັນ­ດາ­ສັກ ປະ­ທານ​ກຳ­ມະ­ການ​ວັດ­ທະ­ນະ­ທຳ?ສັງ­ຄົມ ແລະ ບັນ­ດາ­ເຜົ່າ ສະ­ພາ​ປະ­ຊາ­ຊົນ​ນະ­ຄອນ­ຫຼວງ​ວຽງ​ຈັນ (ນວ) ພ້ອມ​ດ້ວຍ​ຄະ­ນະ ໄດ້​ລົງ​ເຄື່ອນ​ໄຫວ​ຕິດ­ຕາມ​ຊຸກ­ຍູ້​ກ່ຽວ​ກັບ​ການ­ຈັດ­ຕັ້ງ​ປະ­ຕິ­ບັດ​ແຜນ​ພັດ­ທະ­ນາ​ເສດ­ຖະ­ກິດ?ສັງ­ຄົມ ປີ 2018 ແລະ ແຜນ­ການ​ປີ 2019  ຢູ່​ພະ​ແນກ​ຖະ­ແຫຼງ​ຂ່າວ ວັດ­ທະ­ນະ­ທຳ ແລະ ທ່ອງ​ທ່ຽວ ນະ­ຄອນ­ຫຼວງ​ວຽງ​ຈັນ (ຖວ​ທ ນວ) ຖືກ​ຕ້ອນ­ຮັບ​ໂດຍ​ທ່ານ​ນາງ ວິ­ໄລ​ວອນ ຈັນ­ທະ​ລາ­ຕີ ຫົວ­ໜ້າ​ພະ​ແນກ ຖວ​ທ ນວ ພ້ອມ​ດ້ວຍ​ຄະ­ນະ.

ທ່ານ​ນາງ ວິ­ໄລ​ວອນ ຈັນ­ທະ​ລາ­ຕີ ໄດ້​ລາຍ​ງານ​ສະ­ພາບ​ພົ້ນ​ເດັ່ນ ແລະ ຂໍ້­ຄົງ­ຄ້າງ ການ­ຈັດ­ຕັ້ງ​ປະ­ຕິ­ບັດ​ວຽກ​ງານ​ໃນ​ຂະ­ແໜງ ຖວ​ທ ວ່າ: ໃນ​ໄຕ​ມາດ​ທີ 4 ທ້າຍ​ປີ 2019 ພະ​ແນກ ຖວ​ທ ນວ ໄດ້​ສຸມ​ໃສ່​ຈັດ​ຕັ້ງ​ປະ­ຕິ­ບັດ​ແຜນ​ວຽກ​ທີ່​ໄດ້​ວາງ​ໃນ​ຄາດ­ໝາຍ ເຊິ່ງ​ຕິດ​ພັນ​ມະ­ຕິ 02 ຂອງ​ສະ­ພາ​ປະ­ຊາ­ຊົນ ນວ ໄດ້​ກຳ­ນົດ​ໄວ້​ໃນ 4 ຄາດ­ໝາຍ​ທີ່​ໃຫ້ ຖວ​ທ ນວ ຈັດ​ຕັ້ງ​ປະ­ຕິ­ບັດ​ນັ້ນ​ຖື​ວ່າ​ຢູ່​ໃນ 4 ຄາດ­ໝາຍ​ນີ້​ໂດຍ​ພື້ນ­ຖານ ປັດ­ຈຸ­ບັນ​ໄດ້​ສຸມ​ໃສ່​ຈັດ​ຕັ້ງ​ປະ­ຕິ­ບັດ ເປັນ­ຕົ້ນ ການ​ກະ­ກຽມ​ກອງ​ປະ­ຊຸມ​ໃຫຍ່ IX ໜ່ວຍ​ພັກ​ທີ່​ຂຶ້ນ​ກັບ ແລະ 1 ຄະ­ນະ​ພັກ​ຮາກ​ຖານ​ໃຫ້​ສຳ­ເລັດ​ໃນ​ຕົ້ນ​ເດືອນ​ທັນ­ວາ 2019 ກະ­ກຽມ​ຈັດ​ງານ​ບຸນ​ປະ­ເພ­ນີ​ຕ່າງໆ ໂດຍ​ສະ­ເພາະ ບຸນ​ອອກ​ພັນ​ສາ​ປະ​ວໍ­ລະ­ນາ ແລະ ບຸນ­ຊ່ວງ­ເຮືອ​ທ່າ​ວັດ​ຈັນ ນອກ​ນັ້ນ ຍັງ​ມີ​ກິດ­ຈະ­ກຳ​ສົ່ງ­ເສີມ​ການ­ທ່ອງ­ທ່ຽວ ແລະ ບຸນ​ນະ­ມັດ­ສະ­ການ​ພະ​ທາດ­ຫຼວງ ກະ­ກຽມ​ເປີດ​ກອງ​ປະ­ຊຸມ​ສຸດ​ຍອດ​ການ­ທ່ອງ­ທ່ຽວ​ເຈົ້າ​ຄອງ 5 ນະ­ຄອນ​ລຸ່ມ​ແມ່­ນ້ຳ​ຂອງ ທີ່​ຈະ​ຈັດ​ຂຶ້ນ​ໃນ​ໄວໆ​ນີ້ ແລະ ໄດ້​ສຸມ​ໃສ່​ວຽກ​ປິ່ນ​ອ້ອມ​ຕ່າງໆ​ເພື່ອ​ໃຫ້​ສຳ­ເລັດ​ຕາມ​ລະ­ດັບ​ຄາດ­ໝາຍ.

ໂອ­ກາດ​ນີ້ ທ່ານ​ນາງ ວິ­ໄລ​ວອນ ຈັນ­ທະ​ລາ­ຕີ ຍັງ​ໄດ້​ຊີ້​ແຈງ​ຕອບ​ຂໍ້​ຊັກ​ຖາມ​ເຈາະ​ຈີ້ມ​ຂອງ​ສະ­ພາ​ປະ­ຊາ­ຊົນ ນວ ໂດຍ​ສະ­ເພາະ ການ­ຈັດ­ຕັ້ງ​ປະ­ຕິ­ບັດ 4 ຄາດ­ໝາຍ​ທີ່​ໄດ້​ກຳ­ນົດ​ໄວ້​ໃນ​ມະ­ຕິ 02 ຂອງ​ສະ­ພາ ນວ ໄດ້​ກຳ­ນົດ​ອອກ​ນັ້ນ ໂດຍ​ສະ­ເພາະ ຄາດ­ໝາຍ​ຕໍ່​ກັບ​ການ​ຊຸກ­ຍູ້​ການ­ຈັດ­ຕັ້ງ​ປະ­ຕິ­ບັດ​ໂຄງ­ການ​ສ້າງ​ຄອບ­ຄົວ ບ້ານ​ວັດ­ທະ­ນະ­ທຳ ແລະ ສູ້​ຊົນ​ໃຫ້​ໄດ້​ຮັບ​ໃບ­ຢັ້ງ­ຢືນ​ຄອບ­ຄົວ​ວັດ­ທະ­ນະ­ທຳ 2.000 ຄອບ­ຄົວ ປະ­ກາດ​ບ້ານ​ວັດ­ທະ­ນະ­ທຳ​ໃຫ້​ໄດ້ 12 ບ້ານ ແລະ ຕິດ​ຕັ້ງ​ໂທລະ​ໂຄ່ງ​ໃຫ້​ໄດ້ 5 ບ້ານ ສຳ­ລັບ​ວຽກ​ງານ​ດັ່ງ­ກ່າວ​ໄດ້​ສືບ­ຕໍ່​ຈັດ​ຕັ້ງ​ຜັນ​ຂະ­ຫຍາຍ​ມາ​ຢ່າງ​ເປັນ​ຂະ​ບວນ ແລະ ມາ​ຮອດ​ປັດ­ຈຸ­ບັນ​ທົ່ວ ນວ ໄດ້​ເປີດ​ບ້ານ​ວັດ­ທະ­ນະ­ທຳ 465 ບ້ານ ຍັງ​ເຫຼືອ​ພຽງ 16 ບ້ານ​ຈະ​ບັນ­ລຸ​ເປົ້າ​ໝາຍ ມີ​ແຜນ​ຈະ​ເປີດ​ເພີ່ມ ຄາດ​ວ່າ​ທ້າຍ​ປີ​ນີ້​ຈະ​ໃຫ້​ສຳ­ເລັດ​ຫຼາຍ​ກວ່າ 90% ສຳ­ລັບ​ການ​ຕິດ​ຕັ້ງ​ໂທລະ​ໂຄ່ງ​ແຕ່​ລະ​ບ້ານ​ໄດ້​ດຳ­ເນີນ​ການ​ຕິດ​ຕັ້ງ ແລະ ຍັງ​ມີ​ບາງ​ບ້ານ​ສືບ­ຕໍ່​ຂໍ​ຕິດ​ຕັ້ງ​ເພີ່ມ​ຕື່ມ ສ່ວນ​ຄາດ­ໝາຍ​ທີ​ສອງ​ສຳ­ລັບ​ການ​ສູ້​ຊົນ​ໂຄງ­ການ​ຮຽກ​ການ​ລົງ­ທຶນ 14 ໂຄງ­ການ ປັດ­ຈຸ­ບັນ​ໄດ້​ຈັດ​ຕັ້ງ​ປະ­ຕິ­ບັດ ມີ​ຜູ້​ມາ​ສຳ​ປະ­ທານ 3 ໂຄງ­ການ ແລະ ອີກ 11 ໂຄງ­ການ​ຢູ່​ໃນ​ຂັ້ນ​ຕອນ​ສຶກ​ສາ​ຄວາມ​ເປັນ​ໄປ​ໄດ້ ໂດຍ​ສະ­ເພາະ ໃນ 14 ໂຄງ­ການ​ແມ່ນ​ຕິດ​ພັນ​ກັບ​ການ​ພັດ­ທະ­ນາ​ດ້ານ​ການ­ທ່ອງ­ທ່ຽວ​ທາງ​ທຳ​ມະ​ຊາດ ເຊິ່ງ​ນອນ​ຢູ່​ໃນ​ຍຸດ​ທະ​ສາດ​ຂອງ ນວ ທີ່​ເລັ່ງ​ໃສ່​ພັດ­ທະ­ນາ​ການ­ທ່ອງ­ທ່ຽວ​ຕິດ​ພັນ​ກັບ​ທຳ​ມະ​ຊາດ ຄາດ­ໝາຍ​ທີ 3 ກ່ຽວ​ກັບ​ການ​ດຶງ​ດູດ​ນັກ​ທ່ອງ​ທ່ຽວ​ໃຫ້​ໄດ້ 2 ລ້ານ​ຄົນ​ທີ່​ເຂົ້າ​ມາ​ທ່ອງ​ທ່ຽວ ນວ ປັດ­ຈຸ­ບັນ​ມີ​ນັກ​ທ່ອງ​ທ່ຽວ​ເດີນ­ທາງ​ເຂົ້າ​ມາ​ທ່ອງ​ທ່ຽວ ນວ ຮອດ​ເດືອນ​ສິງ­ຫາ 2019 ມີ 1.260.000 ຄົນ ຄາດ​ວ່າ​ຮອດ​ທ້າຍ​ປີ​ນີ້​ຈະ​ສາ­ມາດ​ບັນ­ລຸ​ເປົ້າ​ໝາຍ ເພາະ​ໃນ​ທ້າຍ​ປີ​ຈະ​ມີ​ຫຼາຍ​ກິດ­ຈະ­ກຳ​ດຶງ​ດູດ​ນັກ​ທ່ອງ​ທ່ຽວ ໄປ​ພ້ອມ​ກັບ​ມີ​ຫຼາຍ​ສະ­ຖານ­ທີ່​ທ່ອງ​ທ່ຽວ​ທີ່​ເກີດ​ຂຶ້ນ​ໃໝ່​ເພື່ອ​ດຶງ​ດູດ​ນັກ​ທ່ອງ​ທ່ຽວ ສ່ວນ​ຄາດ­ໝາຍ​ທີ 4 ກ່ຽວ​ກັບ​ການ​ກະ­ກຽມ​ການ​ດຳ­ເນີນ​ກອງ​ປະ­ຊຸມ​ສຸດ​ຍອດ​ການ­ທ່ອງ­ທ່ຽວ​ເຈົ້າ​ຄອງ 5 ນະ­ຄອນ​ລຸ່ມ​ແມ່­ນ້ຳ​ຂອງ​ເຫັນ​ວ່າ​ມີ​ຄວາມ​ພ້ອມ 100%.

ສຳ­ລັບ​ຂໍ້​ຫຍຸ້ງ­ຍາກ ປາ­ກົດ­ການ​ຫຍໍ້­ທໍ້​ທີ່​ເກີດ​ຂຶ້ນ​ໃນ​ຂົງ­ເຂດ​ວັດ­ທະ­ນະ­ທຳ ແລະ ທ່ອງ​ທ່ຽວ ເປັນ­ຕົ້ນ ບັນ­ຫາ​ຄວບ​ຄຸມ​ສຽງ​ເນືອງ​ນັນ​ຂອງ​ຮ້ານ​ອາ­ຫານ ຮ້ານ​ບັນ­ເທີງ ຜ່ານ​ມາ​ໄດ້​ມີ​ການ​ແຕ່ງ­ຕັ້ງ​ຄະ­ນະ​ຮັບ­ຜິດ­ຊອບ​ແຕ່​ລະ​ຂັ້ນ​ສົມ­ທົບ​ກັບ​ເຈົ້າ​ໜ້າ­ທີ່​ລົງ​ແກ້​ໄຂ ແຕ່​ການ​ແກ້​ໄຂ​ຍັງ​ບໍ່​ຂາດ​ຕົວ ເພາະ​ບັນ­ດາ​ຜູ້​ດຳ­ເນີນ​ທຸ­ລະ​ກິດ​ຍັງ​ບໍ່​ໃຫ້­ການ​ຮ່ວມ​ມື​ເທົ່າ​ທີ່​ຄວນ ຕໍ່​ບັນ­ຫາ​ນີ້ ຈະ​ເລັ່ງ​ແກ້​ໄຂ ໂດຍ​ຈະ​ເຮັດ​ທົດ​ລອງ​ແກ້​ໄຂ ໂດຍ​ຕັ້ງ​ສາຍ​ດ່ວນ​ຂອງ​ເຈົ້າ​ໜ້າ­ທີ່​ເພື່ອ​ລົງ​ໄປ​ແກ້​ໄຂ ເອົາ­ໃຈ­ໃສ່​ເຂັ້ມ​ງວດ​ລົງ​ກວດ­ກາ​ບັນ­ຫາ​ການ​ນຳ​ໃຊ້​ຢາ​ຊູ​ກຳ­ລັງ ນອກ​ນັ້ນ ໄດ້​ເອົາ­ໃຈ­ໃສ່​ແກ້​ໄຂ​ບັນ­ຫາ​ປ້າຍ ແລະ ບັນ­ຫາ​ອື່ນໆ​ອີກ​ຈຳ­ນວນ​ໜຶ່ງ.

ຕອນ​ທ້າຍ ທ່ານ​ນາງ ເກດ​ມະ­ນີ ບັນ­ດາ­ສັກ ໄດ້​ສະ­ແດງ​ຄວາມ​ຊົມ­ເຊີຍ​ຕໍ່​ພະ​ແນກ ຖວ​ທ ນວ ທີ່​ໄດ້​ເອົາ­ໃຈ­ໃສ່ ຈັດ​ຕັ້ງ​ປະ­ຕິ­ບັດ​ວຽກ​ງານ 4 ຄາດ­ໝາຍ​ທີ່​ສະ­ພາ​ວາງ​ອອກ​ໃຫ້​ສຳ­ເລັດ​ເປັນ​ສ່ວນ​ຫຼາຍ ພ້ອມ​ທັງ​ເນັ້ນ​ໃຫ້​ສືບ­ຕໍ່​ຈັດ​ຕັ້ງ​ປະ­ຕິ­ບັດ ໜ້າ​ວຽກ​ທີ່​ນອນ​ຢູ່​ໃນ​ຄາດ­ໝາຍ​ໃດ​ທີ່​ຍັງ​ບໍ່​ທັນ​ສຳ­ເລັດ ເປັນ­ຕົ້ນ ບັນ­ຫາ​ທີ່​ຍັງ​ຄົງ​ຄ້າງ​ໃນ​ຜ່ານ​ມາ ເພື່ອ​ເຮັດ​ໃຫ້​ຂົງ­ເຂດ​ວຽກ​ງານ​ທີ່​ຕົນ​ຮັບ­ຜິດ­ຊອບ​ມີ​ຜົນ­ສຳ­ເລັດ​ເປັນ​ກ້າວໆ.

ຕອບກັບ

ເມວຂອງທ່ານຈະບໍ່ຖືກເຜີຍແຜ່ໃຫ້ໃຜຮູ້ ບ່ອນທີ່ຕ້ອງການແມ່ນຖືກຫມາຍໄວ້ *