ກະຊວງການເງິນ ຈັດເຝິກອົບຮົມສ້າງພະນັກງານສືບທອດ ວຽກງານບັນຊີ ກົມການເງິນ

ຫ້ອງວ່າການສູນກາງພັກຮ່ວມກັບກົມບັນຊີ ກະຊວງການເງິນ ຈັດພິທີປິດຊຸດອົບຮົມກ່ຽວກັບວຽກງານບັນຊີ ແລະ ການນໍາໃຊ້ລະບົບຖານຂໍ້ມູນໂປຼແກຼມບັນຊີ ຂຶ້ນວັນທີ 8 ຕຸລາ 2019 ທີ່ຫ້ອງວ່າການສູນກາງພັກ (ຫຼັກ 6) ມອບໃບຢັ້ງຢືນໂດຍທ່ານ ບົວພັນ ອ່ອນນາລີ ຫົວໜ້າກົມການເງິນຫ້ອງວ່າການສູນກາງພັກ ມີທ່ານ ຈັນທະບູນ ລັດຕະນະວົງ ຮອງຫົວໜ້າຫ້ອງວ່າການສູນກາງພັກ ພ້ອມດ້ວຍພະນັກງານຈາກກົມການເງິນ ກົມຄຸ້ມຄອງເງິນບໍາລຸງພັກ ແລະ ຕາງໜ້າຈາກແຕ່ລະກົມທີ່ຂຶ້ນກັບຫ້ອງວ່າການສູນກາງພັກເຂົ້າຮ່ວມ.

ການເຝິກອົບຮົມຄັ້ງນີ້ໃຊ້ເວລາ 15 ວັນ ເພື່ອຍົກລະດັບວຽກງານວິຊາສະເພາະດ້ານການບັນຊີໃຫ້ສາມາດຮັບປະກັນທາງດ້ານປະລິມານ ແລະ ຄຸນນະພາບຕາມທິດຫັນເປັນທັນສະໄໝເທື່ອລະກ້າວ ເຊິ່ງເນື້ອໃນການເຝິກອົບຮົມປະກອບມີເອກະສານກ່ຽວກັບເຕັກນິກການຈົດ-ກ່າຍບັນຊີ ແລະ ຄູ່ມືນໍາໃຊ້ໂປຼແກມບັນຊີອອນລາຍ.

ທ່ານ ຈັນທະບູນ ລັດຕະນະວົງ ໄດ້ເນັ້ນໃຫ້ກົມການເງິນເອົາໃຈໃສ່ສຶກສາອົບຮົມວຽກການເມືອງແນວຄິດ ແລະ ສ້າງແຜນຕິດຕາມກວດກາການຈັດຕັ້ງປະຕິບັດວຽກງານຂອງຕົນໃຫ້ເປັນປົກກະຕິ ເພື່ອກໍາຈັດ ແລະ ແກ້ໄຂປາກົດການຫຍໍ້ທໍ້ຕ່າງໆທີ່ຈະເກີດຂຶ້ນໃນຖັນແຖວສະມາຊິກພັກ, ພະນັກງານ-ລັດຖະກອນ ພາຍໃນກົມກອງຂອງຕົນກໍຄືການຈັດຕັ້ງພັກ-ລັດ.

ພ້ອມນັ້ນ, ເພື່ອແນໃສ່ເຮັດໃຫ້ການລົງບັນຊີສອດຄ່ອງກັນບັນຊີສາກົນ ແລະ ມີຖານຂໍ້ມູນທີ່ແນ່ນອນກ່ຽວກັບວຽກງານການບັນຊີ, ສາມາດນໍາໄປຈັດຕັ້ງປະຕິບັດໃຫ້ເກີດຜົນປະໂຫຍດສູງສຸດ, ແທດເໝາະກັບສະພາບການພັດທະນາຂອງແຕ່ລະໄລຍະ ແລະ ເພື່ອໃຫ້ໃຫ້ການບັນຊີມີຄວາມເຂັ້ມແຂງ, ປອດໃສ, ສາມາດກວດສອບໄດ້.

ກົມການເງິນ ຄວນສ້າງພະນັກງານໃຫ້ຊໍານານງານທາງດ້ານວິຊາສະເພາະດ້ວຍການເຝິກອົບຮົມກັບທີ່ ຫຼື ສົ່ງໄປຍົກລະດັບຕາມສະຖານທີ່ກ່ຽວພັນກັບວິຊາສະເພາະຂອງຕົນ ພາຍຫຼັງມີການເຝິກອົບຮົມແລ້ວຄວນເບິ່ງພອນສະຫວັນຂອງພະນັກງານ, ສາມາດຊັບຊ້ອນປ່ຽນແທນກັນໄດ້ຈຶ່ງເຮັດໃຫ້ພະນັກງານມີຄວາມເຂັ້ມແຂງ ແລະ ສ້າງໃຫ້ໄດ້ພະນັກງານສືບທອດ.

 

 

ຕອບກັບ

ເມວຂອງທ່ານຈະບໍ່ຖືກເຜີຍແຜ່ໃຫ້ໃຜຮູ້ ບ່ອນທີ່ຕ້ອງການແມ່ນຖືກຫມາຍໄວ້ *