ງານບຸນມະໂຫລານສົ່ງເສີມການອ່ານ ຄັ້ງທີ 2 ຈະຈັດຂຶ້ນທ້າຍເດືອນນີ້

ໃນວັນທີ 9 ຕຸລາ 2019 ນີ້, ທີ່ພະແນກສຶກສາທິການ ແລະ ກິລາ ນະຄອນຫລວງວຽງຈັນ, ໄດ້ມີພິທີຖະແຫລງຂ່າວ ກຽມຈັດງານບຸນມະໂຫລານ ສົ່ງເສີ່ມການອ່ານ ນະຄອນຫລວງວຽງຈັນ ຄັ້ງທີ 2 ໂດຍການຮ່ວມຖະແຫລງຂອງ ທ່ານ ສົມພອນ ສອນດາລາ ຮອງຫົວໜ້າພະແນກສຶກສາທິການ ແລະ ກິລາ ນະຄອນຫລວງວຽງຈັນ, ທ່ານ ແກ້ວວິໄລສັກ ແສນສັກດາ ຫົວໜ້າຫໍສະໝຸດນະຄອນຫລວງວຽງຈັນ ແລະ ທ່ານ ວຽງສະໄໝ ພາສະເຫລີມສຸກ ຮອງຫົວໜ້າຫ້ອງວ່າການນະ ຄອນຫລວງວຽງຈັນ, ພ້ອມດ້ວຍພາກສ່ວນກ່ຽວຂ້ອງເຂົ້າຮ່ວມ.

ທ່ານ ສົມພອນ ສອນດາລາ ໄດ້ໃຫ້ຮູ້ວ່າ: ເພື່ອເປັນການເປີດກວ້າງ ການສົ່ງເສີມການອ່ານ ໃຫ້ກວ້າງຂວາງ ແລະ ທົ່ວເຖິງຍິ່ງຂຶ້ນ, ເປັນການເປີດໂອກາດ ໃຫ້ຄົນລາວໄດ້ສຳພັດກັບປຶ້ມອ່ານນາໆຊາດ, ໃຫ້ຕ່າງຊາດໄດ້ສຳພັດກັບປຶ້ມອ່ານຂອງລາວ ແລະ ໃຫ້ທຸກຄົນ ໄດ້ເຫັນຄວາມສຳຄັນຂອງການອ່ານອີກດ້ວຍ. ພ້ອມນີ້, ເພື່ອເປັນ ການຊຸກຍູ້ສົ່ງເສີມ ແລະ ປຸກລະດົມໃຫ້ທຸກພາກສ່ວນໃນສັງຄົມ ມີສ່ວນຮ່ວມໃນການສົ່ງເສີມການອ່ານ ໂດຍສະເພາະການຊ່ວຍເຫລືອ, ສະໜັບສະໜູນ ບັນດາໂຮງຮຽນ ໃນນະຄອນຫລວງວຽງຈັນ ໃຫ້ໄດ້ມີປຶ້ມອ່ານຫລາກຫລາຍຊະນິດ ພ້ອມກັນນັ້ນຍັງແນ່ໃສ່ການສ້າງກິດ ຈະກຳທີ່ຫລາກຫລາຍ ຄ່ຽງຄູ່ກັບການພັດທະນາ ຊາວໜຸ່ມຂອງຊາດ.

ງານດັ່ງກ່າວ, ແມ່ນຈະຈັດຂຶ້ນໃນ ລະຫວ່າງ ວັນທີ 19-27 ຕຸລາ 2019 ນີ້, ທີ່ສູນການຄ້າວຽງຈັນເຊັນເຕີ້, ກິດຈະກຳພາຍໃນງານ ຈະມີການແຂ່ງຂັນປະ ກວດບົດຄວາມ “ຄູໃນດວງໃຈ” ເປັນພາສາລາວ ແລະ ພາສາອັງກິດ, ການແຂ່ງຂັນເວົ້າ “ຄູຄົນທຳອິດຂອງຂ້ອຍ” ເປັນພາສາລາວ ແລະ ພາສາອັງກິດ, ການແຂ່ງຂັນ ຖາມ-ຕອບ ຫົວຂໍ້ “ASEAN”, ການປະກວດຮູບເງົາສັ້ນ “ສຸດຍອດອາ ຈານໃນດວງໃຈ”, ມີການປະກວດຮ້ອງເພງ, ແຕ່ງເພງ, ປະກວດຟ້ອນ, ເຕັ້່ນ ແລະ ຍັງມີກິດຈະກໍາອື່ນໆອີກ. ພາຍໃນງານໄດ້ມີພາກສ່ວນຕ່າງໆ ນຳເອົາປຶ້ມໄປວາງສະແດງ ເປັນຕົ້ນແມ່ນ ສຳນັກພິມລາວ, ສຳນັກພິມໄທ, ພາກສ່ວນອົງການຈັດຕັ້ງສາກົນ, ທຸລະກິດ, ຮ້ານອາຫານ, ໂຮງຮຽນ, ສະມາ ຄົມຕ່າງໆ ແລະ ອົງການຈັດຕັ້ງ ຄາດວ່າມີຮ້ານວາງສະແດງປຶ້ມ ປະມານ 90 ຮ້ານ.

ຕອບກັບ

ເມວຂອງທ່ານຈະບໍ່ຖືກເຜີຍແຜ່ໃຫ້ໃຜຮູ້ ບ່ອນທີ່ຕ້ອງການແມ່ນຖືກຫມາຍໄວ້ *