ຈຳປາສັກ ພ້ອມແລ້ວທີ່ຈະຈັດງານບຸນອອກພັນສາ-ຊ່ວງເຮືອ ປະຈຳປີນີ້

ມາຮອດປັດຈຸບັນ, ການກະກຽມຈັດງານບຸນອອກພັນສາປະວໍລະນາ-ບຸນຊ່ວງເຮືອ ທີ່ນະຄອນປາກເຊ ແຂວງຈໍາປາສັກ ແມ່ນມີຄວາມພ້ອມແລ້ວ ທັງນີ້ກໍ່ຍ້ອນແຕ່ລະອະນຸກໍາມະການ ຮັບຜິດຊອບມີຄວາມເອົາໃຈໃສ່ຊ່ວຍກັນຢ່າງຈິງຈັງ.
ທ່ານ ສຸລິ ວັນ ສະຫວັດທະສິນ, ກຳມະການຄະນະປະຈຳ ອົງຄະນະພັກແຂວງ, ເຈົ້ານະຄອນປາກເຊ ໃຫ້ສຳພາດໃນທ້າຍອາທິດຜ່ານມາ ນີ້ ວ່າ: ງານບຸນອອກພັນສາ ແລະ ບຸນຊ່ວງເຮືອປະເພນີປະຈຳປີ 2019 ທີ່ນະຄອນປາກເຊ ຈະຈັດຂຶ້ນໃນວັນທີ 13-14 ຕຸລາ 2019 ເຊິ່ງຈະມີຫຼາຍກິດຈະກໍາດ້ວຍກັນເຊັ່ນ: ການຈັດບຸນຕັກບາດ, ແຫ່ໂຄມໄຟ-ໄຫຼເຮືອໄຟ ໃນວັນທີ 13 ຕຸລາ ຊຶ່ງກົງກັບມື້ຂຶ້ນ 15 ຄໍ່າ ເດືອນ 11, ການຈັດງານວາງສະແດງ ແລະ ຈໍາໜ່າຍສິນຄ້າພາຍໃນ ແລະ ຕ່າງປະເທດ, ການແຂ່ງຂັນກີລາບານສົ່ງ, ເປຕັງ, ກ໊ອຟ ແລະອື່ນໆ. ສິ່ງໜຶ່ງທີ່ຂາດບໍ່ໄດ້ກໍແມ່ນ ການແຂ່ງຂັນຊ່ວງເຮືອຊຶ່ງຈະຈັດໃນວັນທີ 14 ຕຸລາ ທີ່ປາກແມ່ນໍ້າເຊໂດນ.

ສຳລັບການແຂ່ງຂັນຊ່ວງເຮືອປີນີ້ ຈະມີການແຂ່ງຂັນໃນ 3 ປະເພດ ຄື: ເຮືອ 55 ສີພາຍ (ຊາຍ) ມີ 3 ລໍາ, ເຮືອປະເພນີ 33 ສີພາຍ ມີ 14 ລໍາ, ຍິງ 5 ລໍາ, ເຮືອສູດ 33 ສີພາຍ ມີ 9 ລໍາ, ຍິງ 2 ລໍາ ແລະ ເຮືອ 24 ສີພາຍ ລວມທັງໝົດ 29 ລໍາ. ສົມທຽບໃສ່ປີຜ່ານມາເຮືອທີ່ເຂົ້າຮ່ວມແຂ່ງຂັນແມ່ນມີຈໍານວນຫຼຸດລົງຫຼາຍ ໂດຍສະເພາະແມ່ນບໍ່ມີການແຂ່ງຂັນປະເພດເຮືອກີລາ 12 ສີພາຍ ແລະ ເຮືອໃຫຍ່ແມ່ນບໍ່ໄດ້ເຊີນຈາກຕ່າງແຂວງ ແລະ ຕ່າງປະເທດເຂົ້າຮ່ວມແຂ່ງຂັນຄືກັບທຸກໆປີຜ່ານມາ. ທັງນີ້ກໍ່ຍ້ອນນະຄອນປາກເຊ ກໍ່ຄື ແຂວງຈໍາປາສັກ ແມ່ນມີເງື່ອນໄຂຫຍຸ້ງຍາກຍ້ອນປະສົບກັບສະພາບໄພພິບັດນໍ້າຖ້ວມ.
ຢ່າງໃດກໍ່ດີ, ສຳລັບງານບຸນອອກພັນສາ-ບຸນຊ່ວງເຮືອປີນີ້, ທາງຄະນະຮັບຜິດຊອບຈັດງານກໍ່ແນໃສ່ຮັກສາໃຫ້ໄດ້ຮີດຄອງປະເພນີວັດທະນະທໍາອັນດີງາມຂອງຊາດ, ຮັກສາໄດ້ຄວາມສະຫງົບປອດໄພ, ທັງປະຢັດມັດທະຍັດ ແລະ ຫຼີກເວັ້ນບໍ່ໃຫ້ມີການເກັບເງິນກັບປະຊາຊົນ.

 

ຕອບກັບ

ເມວຂອງທ່ານຈະບໍ່ຖືກເຜີຍແຜ່ໃຫ້ໃຜຮູ້ ບ່ອນທີ່ຕ້ອງການແມ່ນຖືກຫມາຍໄວ້ *