ບາຣຊ້າມາແລ້ວ! ເປີດບ້ານທຸບ ເຊບີຢ້າ! ຫຍັບຂຶ້ນທີ 2 ລາລີກ້າ ນັດທີ 8

ການແຂ່ງຂັນເຕະບານ ລາລີກ້າ ສະເປນ (ແອັສປາຍ) ລະດູການ 2019-20 ນັດທີ 8 ຄືນຜ່ານມາ, ບາຣເຊໂລນ້າ ແຊ້ມເກົ່າ ເປີດບ້ານດວນກັບ ເຊບີຢ້າ ທີ່ມີ 13 ຄະແນນເທົ່າກັນຈາກ 7 ນັດ, ຊຶ່ງນັດນີ້ ບາຣຊ້າ ໄດ້ ອຸສມານ ເດັມເບເລ້ ເຊົາເຈັບກັບມາເປັນຕົວຈິງ ປະສານງານຮ່ວມກັບ ເມັສຊີ້ ແລະ ຊົວເຣຊ.

ຕົ້ນເກມທັງສອງທິມເດີນໜ້າແລກກັນຢ່າງໜ້າຕື່ນເຕັ້ນ ແຕ່ເປັນເຈົ້າບ້ານ ບາຣຊ້າ ສ້າງສັນໂອກາດ ແລະ ຍິງໄດ້ຄົມກ່ວາ ໄດ້ 3 ປະຕູໃນ 8′ ນາທີຈາກ ລຸຍ ຊົວເຣຊ ນາທີ 27′ ອາຣຕູໂຣ້ ວີດາວ ນາທີ 32′ ແລະ ອຸສມານ ເດັມເບເລ້ ນາທີ 35′ ຈົບຕັ້ງທີໜຶ່ງ ບາຣຊ້າ ຂຶ້ນນຳ ເຊບີຢ້າ 3-0. ມາເຄິ່ງຫລັງເຖິງວ່າ ເຊບີຢ້າ

ຈະພະຍາຍາມທວງປະຕູຄືນ ແຕ່ຖືກບາຣຊ້າ ປິດເກມ, ທ້າຍເກມເຈົ້າບ້ານມາໄດ້ປະຕູສົ່ງທ້າຍຈາກຫົວໜ້າທິມ ລີໂອເນວ ເມັສຊີ້ ນາທີ 78′ ທ້າຍເກມບາຣຊ້າເຫລືອຜູ້ຫລິ້ນ 10 ຄົນ, ອຸສມານ ເດັມເບເລ້ ແລະ ໂຣໂນ້ ອາຣານໂຄ ໄດ້ໃບແດງ, ຈົບເກມ ບາຣຊ້າ ຊະນະ ເຊບີຢ້າ 4-0 ຄວ້າ 3 ຄະແນນ ຫຍັບຂຶ້ນທີ 2 ມີ 16 ຄະແນນຈາກ 8 ນັດ, ຕາມຫລັງ ຣຽວ ມາດຣິດ ທິມນຳ 2 ຄະແນນ. ບາຣຊ້າ ຊະນະ ເຊບີຢ້າ 3 ນັດລວດ: 4-0, 4-2 ແລະ 6-1. ນັດຕໍ່ໄປ ບາຣຊ້າ ຈະບຸກໄປຢາມ ເອບ້າ ໃນວັນທີ 19 ຕຸລານີ້ ເວລາ 18:00 ຫລັງເກມທິມຊາດໃນອາທິດນີ້ ແລະ ກາງອາທິດໜ້າ. ສ່ວນ ເຊບີຢ້າ ຈະເປີດບ້ານຕ້ອນຮັບ ເລບັນເຕ້ ໃນວັນທີ 20 ຕຸລານີ້.

 

 

ຂໍ້ມູນມາຈາກ : ສະປອດອັບເດດ

ຕອບກັບ

ເມວຂອງທ່ານຈະບໍ່ຖືກເຜີຍແຜ່ໃຫ້ໃຜຮູ້ ບ່ອນທີ່ຕ້ອງການແມ່ນຖືກຫມາຍໄວ້ *