ວິທີລົດນໍ້າໜັກໃຫ້ໄດ້ຕາມເປົ້າ ແຜນບໍ່ຫຼົ້ມກາງທາງ

ການອອກກຳລັງກາຍລົດນໍ້າໜັກທີ່ສາວໆຕ່າງກໍປະສົບກັບບັນຫາ ນັ້ນກໍຄືຄວາມລົ້ມເຫຼວຢ່າງບໍ່ເປັນທ່າ ກັບແຜນການລົດຫຸ່ນທີ່ກະກຽມມາດິບດີ ແຕ່ພໍເຮັດໄປໄດ້ໄລຍະໜຶ່ງກໍຮູ້ສຶກວ່າມັນເລີ່ມແຜ່ວໆ, ພະລັງທີ່ເຄີຍເຕັມປ່ຽມໃນສອງສາມມື້ທຳອິດກໍຫາຍໄປຈົນເກືອບໝົດ ແລະ ໃນທີ່ສຸດກໍລົ້ມເລີກໄປກາງທາງ ບໍ່ເຄີຍເຮັດໄດ້ຕາມແຜນທີ່ວາງໄວ້ເລີຍ.

ຫາກໃຜມີປະສົບການແບບນີ້ຕະຫຼອດຈົນເລີ່ມເບື່ອແລ້ວ ລອງມາເບິ່ງວິທີການແກ້ໄຂບັນຫາ ໃຫ້ຕົນເອງລົດນໍ້າໜັກໄດ້ສຳເລັດຕາມທີ່ໄດ້ຕັ້ງໃຈກັນດີກວ່າ.

ບໍ່ວາງແຜນໄວ້ໃຫຍ່ຈົນເກີນໄປ ການຕັ້ງໃຈລົດນໍ້າໜັກດ້ວຍການວາງແຜນເປັນສິ່ງທີ່ດີ ແຕ່ຢ່າລືມວ່າ ການຄາດຫວັງໄວ້ຫຼາຍຈົນເກີນໄປ, ເຄັ່ງຄັດຫຼາຍຈົນວ່າຊີວິດນີ້ຈະບໍ່ໄດ້ແຕະຕ້ອງຂອງຫວານ ຫຼື ຄາໂບໄຮເດຣດເລີຍ ເຖິງວ່າມັນຈະເປັນສິ່ງທີ່ດີຫາກສາມາດເຮັດໄດ້ ແຕ່ຢ່າລືມວ່າທ່ານ ແລະ ຄົນສ່ວນໃຫຍ່ອາດຈະເຮັດບໍ່ໄດ້.

ດັ່ງນັ້ນ ໃຫ້ເນັ້ນວິທີທີ່ຕົນເອງເຮັດໄດ້ຈິງ, ວາງແຜນໃຫ້ເໝາະສົມກັບຮູບແບບການດຳລົງຊີວິດ ແລະ ຢ່າບັງຄັບໂຕເອງຈົນເຮັດໃຫ້ເກີດຄວາມກົດດັນ ເພາະສຸດທ້າຍຈະຮູ້ສຶກເມື່ອຍ ແລະ ທໍ້, ຕາມມາດ້ວຍອາການໝົດໄຟ ຈົນຕ້ອງກັບມາກິນຫຼາຍແບບບໍ່ມີສະຕິຄືເກົ່າໃນທີ່ສຸດ.

ກິນຢ່າງອື່ນແທນເຂົ້າໜົມຫວານ ຖ້າເປັນຄົນທີ່ມັກກິນເຂົ້າໜົມຫວານເປັນຊີວິດຈິດໃຈ ຕ້ອງບອກກ່ອນເລີຍວ່າສິ່ງເຫຼົ່ານີ້ຄືໂຕການຂັດຂວາງການລົດນໍ້າໜັກຫຼາຍ.

ວິທີທີ່ງ່າຍຄືການທົດແທນດ້ວຍຂອງຫວານຢ່າງອື່ນທີ່ມີແຄລລໍລີຕໍ່າເຊັ່ນ ນໍ້າຕານຈາກຫຍ້າຫວານ, ໝາກໄມ້ບາງຊະນິດທີ່ມີລົດຊາດຫວານແຕ່ນໍ້າຕານບໍ່ສູງ ຫຼື ພວກຊາສະໝຸນໄພອຸ່ນໆ ທີ່ຈະຊ່ວຍໃຫ້ທ່ານຮູ້ສຶກຜ່ອນຄາຍໄດ້ບໍ່ໜ້ອຍໄປກວ່າການກິນຂອງຫວານເລີຍ.

ຖ້າເຮັດແລ້ວລົ້ມເຫຼວ ກໍພຽງລຸກຂຶ້ນສູ້ໃໝ່ອີກຄັ້ງ ຄົນທີ່ປະສົບຄວາມສຳເລັດສ່ວນໃຫຍ່ໃນການລົດນໍ້າໜັກ ບໍ່ແມ່ນວ່າຈະຕັ້ງໃຈລົດໃນຄັ້ງທຳອິດແລ້ວຈະເອົາຊະນະໂຕເອງໄດ້ເລີຍ ເພາະສ່ວນຫຼາຍແລ້ວມັກຈະລົ້ມເຫຼວກາງທາງ, ຢຸດການລົດນໍ້າໜັກມາແລ້ວຫຼາຍຄັ້ງ ແຕ່ສິ່ງທີ່ເຮັດໃຫ້ຄົນເຫຼົ່ານີ້ປະສົບຄວາມສຳເລັດ ໄດ້ຫຸ່ນງາມແບບທີ່ຝັນໄວ້ໄດ້ແທ້ໆ ນັ້ນກໍຍ້ອນວ່າທຸກຄັ້ງທີ່ຫຼຸດອອກຈາກວົງໂຄຈອນຂອງແຜນທີ່ວາງໄວ້ ກໍບໍ່ຕ້ອງໄປກັງວົນກັບມັນຫຼາຍຈົນລົ້ມເລີກຄວາມຕັ້ງໃຈໄປເລີຍ, ພຽງແຕ່ຫັນກັບມາເຂົ້າສູ່ແຜນເດີມອີກຄັ້ງ ພະຍາຍາມໃຫ້ຫຼາຍຂຶ້ນກວ່າເກົ່າ ພຽງເທົ່ານີ້ກໍຈະເຮັດໃຫ້ສາວໆມີຫຸ່ນງາມໄດ້ໃນແບບທີ່ຕ້ອງການແລ້ວ.

ຖ້າຮູ້ວ່າຕົນເອງເປັນຄົນທີ່ລົດນໍ້າໜັກໄດ້ຍາກ ຄວນຈະກັບມາເບິ່ງແຜນການຂອງຕົນເອງກ່ອນ.

ການຜິດພາດຈາກແຜນພຽງຄັ້ງດຽວ ບໍ່ໄດ້ໝາຍຄວາມວ່າທຸກຢ່າງຈະພັງລົງຈົນບໍ່ສາມາດແກ້ໄຂໄດ້.

ດັ່ງນັ້ນ ການລົດນໍ້າໜັກກໍຄືກັບຄວາມຕັ້ງໃຈໃນການເຮັດວຽກ ຖ້າບໍ່ຍອມແພ້ສຸດທ້າຍແລ້ວກໍຈະປະສົບຜົນສຳເລັດ ບໍ່ວ່າຈະລົ້ມຈັກເທື່ອກໍລຸກຂຶ້ນມາສູ້ໃໝ່ແບບບໍ່ຍອມແພ້ ຮັບຮອງເລີຍວ່າສາວໆຈະຮູ້ສຶກພູມໃຈກັບຄວາມພະຍາຍາມຂອງໂຕເອງຢ່າງແນ່ນອນ.

 

 

ຕອບກັບ

ເມວຂອງທ່ານຈະບໍ່ຖືກເຜີຍແຜ່ໃຫ້ໃຜຮູ້ ບ່ອນທີ່ຕ້ອງການແມ່ນຖືກຫມາຍໄວ້ *