9 ເຄັດລັບສຸຂະພາບດີ ບໍ່ຕ້ອງເສຍເງິນຈັກກີບກໍມີຮ່າງກາຍ ແລະ ຈິດໃຈທີ່ມີຄວາມສຸກໄດ້

ທ່ານຮູ້ບໍ່ວ່າ ການມີສຸຂະພາບກາຍ ແລະ ສຸຂະພາບຈິດທີ່ດີນັ້ນ ບໍ່ຈຳເປັນຕ້ອງເພິ່ງພາວິຕາມິນຫາຍາກ, ການອອກກຳລັງກາຍຢ່າງໜັກໜ່ວງ ຫຼື ການເຂົ້າສະປາແພງເພື່ອຟື້ນຟູຮ່າງກາຍ.

ມື້ນີ້ ພວກເຮົາມີ 9 ຄຳແນະນຳງ່າຍໆ ທີ່ຈະເຮັດໃຫ້ຊີວິດຂອງເຮົາສະຫງົບສະບາ່ຍ ແລະ ມີຄວາມສຸກ.

1.ປູກ​ຕົ້ນ​ໄມ້​ໃນເຮືອນ ມີ​ການ​ພິສູດ​ແລ້ວ​ວ່າ​ ຕົ້ນ​ໄມ້​ໃນເຮືອນ​ຊ່ວຍ​ຄາຍຄວາມເຄັ່ງຕຶງ​ ແລະ ​ເຮັດໃຫ້​ທ່ານ​ມີ​ຄວາມ​ສຸກ​ຂຶ້ນ​ໄດ້.​ ໃນ​ຂັ້ນທຳອິດ​ ຕົ້ນ​ໄມ້​ສາມາດ​ຊ່ວຍ​ເລື່ອງ​ການ​ຫາຍ​ໃຈ​ຂອງ​ເຮົາ​ເພາະ​ດູດ​ຊັບ​ຄາບອນ​ໄດອັອກໄຊ ແລະ ​ປົດ​ປ່ອຍ​ອັອກ​ຊິ​ເຈນ​ອອກ​ມາ.

​ ພືດ​ບາງ​ຊະນິດຍັງ​ສາມາດ​ເຮັດ​ຄວາມ​ສະ​ອາດ​ສານ​ເຄ​ມີ​ໃນ​ອາ​ກາດ​ໄດ້​ອີກ​ດ້ວຍ.​ ນອກ​ຈາກ​ນີ້​ ສີ​ສັນ​ຂອງ​ໃບ​ໄມ້ ​ແລະ ​ດອກ​ໄມ້​ກໍ​ຈະ​ຊ່ວຍ​ໃຫ້​ຫ້ອງ​ ແລະ ​ຕົວ​ເຮົາ​ຮູ້ສຶກ​ສົດ​ຊື່ນ​ຂຶ້ນອີກ​ດ້ວຍ.​

2.ດື່ມ​ນ້ຳ​ຫຼາຍໆ​ ນ້ຳ​ເປັນ​ສ່ວນ​ປະກອບ​ສຳຄັນ​ຂອງ​ຮ່າງກາຍ​ ຄິດ​ເປັນ​ 55 ເປີ​ເຊັນ​ຂອງ​ຮ່າງກາຍ​ຜູ້ຍິງ​ ແລະ​ 60 ເປີ​ເຊັນ​​ສຳລັບ​ຮ່າງກາຍ​ຜູ້​ຊາຍ​. ຈຶ່ງ​ບໍ່​ໜ້າ​ແປກ​ໃຈ​ເລີຍ​ວ່າ ​ການ​ດື່ມ​ນ້ຳ​ໃຫ້​ພຽງ​ພໍ​ຈະ​ຊ່ວຍ​ໃຫ້​ເຮົາ​ມີ​ສຸຂະພາບ​ດີ​, ມີ​ພະລັງ​ງານ​ ແລະ​ຊ່ວຍ​ໃຫ້​ມີສະ​ມາ​ທິ.​ ຫາກ​ນ້ຳລ້າ​ດື່ມ​ບໍ່ແຊບ​ ທ່ານ​ອາດຈະ​ຊອຍໝາກ​ນາວ,​ ໝາກແຕງ​​ ຫຼື ​ຂີງ​ ແຕ່ງ​ກິ່ນ​ກໍ​ໄດ້.​

3.ຈັດ​ຫ້ອງ​ໃໝ່ ຮວງ​ຈຸ້ຍ​ ເຊິ່ງ​ຄວາມໝາຍ​ໃນ​ພາສາ​ລາວ​ຄື​ ລົມ ​(ຮວງ​) ແລະ​ ນ້ຳ​(ຈຸ້ຍ​) ຄື​ ເປັນ​ຄະ​ຕິ​ຄວາມ​ເຊື່ອ​ຂອງ​ຊາວ​ຈີນ​ທີ່​ຄິດ​ພິຈາລະນາ​ວ່າ​ພະລັງ​ງານ​ໄຫຼ​ວຽນ​ໃນ​ຫ້ອງ​ແນວໃດ​ເພື່ອ​ພະຍາຍາມ​ທີ່​ຈະ​ສ້າງ​ເສີມ​ສຸຂະພາບ​ ແລະ ​ຄວາມ​ເປັນ​ຢູ່​ທີ່​ດີ.​ ໂດຍ​ເຊື່ອ​ວ່າ​ການ​ຈັດ​ເຮືອນ​ມີ​ຜົນ​ຕໍ່​ອາລົມ​ ແລະ​ ຊ່ວຍ​ໃຫ້​ເຮົາ​ຫຼັບ​ນອນ​ໄດ້​ດີ.​

ເຮົາ​ອາດ​ເລີ່ມ​ຕົ້ນ​ທີ່​ຫ້ອງ​ນອນ​ຂອງ​ເຮົາ.​ ເປີດ​ປ່ອງຢ້ຽມໃຫ້​ລົມ​ຖ່າຍ​ເທ​ ແລະ​ ໃຫ້​ມີ​ແສງ​ຈາກ​ທຳມະຊາດ​ເຂົ້າ​ມາ​ໃຫ້​ຫຼາຍ​ທີ່ສຸດ​ ແລະ​ຈັດເຄື່ອງ​ເທິງ​ຕູ້ ​ແລະ ​ໂຕະ​ຂ້າງ​ຕຽງ​ໃຫ້ເປັນ​ລະບຽບ.​

4.ແຕ່ງເຕີມ​ສີ​ສັນ​ໃຫ້​ຫ້ອງ​ ສີ​ໃນ​ຫ້ອງ​ມີ​ຜົນ​ຕໍ່​ອາລົມ​ຂອງທ່ານຫຼາຍ​ ສີ​ຂຽວ​ ເຊິ່ງ​ເປັນ​ສີ​ຂອງ​ທຳມະຊາດ​ ຈະ​ຊ່ວຍ​ໃຫ້​ທ່ານ​ຮູ້ສຶກ​ມີສົ​ມ​ດຸນ ​ແລະ​ ສະບາຍ​ຕົວ​ ສີ​ໂທນ​ຟ້າ​ຈະ​ຊ່ວຍ​ໃຫ້​ຮູ້ສຶກ​ສະບາຍ​ ແລະ ​ຊ່ວຍ​ໃຫ້​ນອນ​ຫຼັບ​ໄດ້​ດີ​ຂຶ້ນ.

​ ແນວໃດ​ກໍ​ຕາມ​ ຄວນ​ຫຼີກເວັ້ນ​ສີ​ແດງ​ເຊິ່ງ​ອາດ​ເຮັດໃຫ້​ເຮົາ​ຫາຍ​ໃຈຮ້ອນ​ຂຶ້ນ​ ແລະ​ເພີ່ມ​ອັດຕາ​ການ​ເຕັ້ນ​ຂອງ​ຫົວ​ໃຈ​ ແລະ​ເຮັດໃຫ້​ຄວາມ​ດັນ​ເລືອດ​ສູງ.​

5.ຟັງ​ສຽງ​ນົກ​ຮ້ອງ​ ນີ້​ອາດຈະ​ຟັງ​ເບິ່ງຄື​ເວົ້າ​ກັນ​ຫຼິ້ນ​ໆ​ ແຕ່​ງານ​ວິ​ໄຈໂດຍ​ນັກ​ວິທະຍາ​ສາດ​ປະຈຳ​ຄິງ​ສົຄໍ​ເລັດ​ ມະຫາ​ວິທະຍາ​ໄລ​ລອນ​ດອນ​ ລະ​ບຸ​ວ່າ​ ການ​ຟັງ​ສຽງ​ນົກ​ຮ້ອງ​ສາມາດ​ເຮັດໃຫ້​ເຮົາ​ມີ​ສຸຂະພາບ​ຈິດ​ທີ່​ດີ​ໄດ້​ດົນ​ເຖິງ​ 4 ຊົ່ວ​ໂມງ.​

ອາ​ສາ​ສະໝັກ​ທີ່​ເຂົ້າ​ຮ່ວມ​ການ​ທົດລອງ​ບັນ​ທຶກ​ອາລົມ​ໃນ​ແອັບ​ພລິ​ເຄ​ຊັນ​ຂະນະ​ໄປ​ສະຖານທີ່​ຕ່າງ​ໆ​ ໃນ​ເມືອງ​ ແລະ​ຜົນ​ທີ່​ໄດ້​ຄື​ ການ​ຟັງ​ສຽງ​ນົກ​ຮ້ອງ​ ສຳ​ຜັດ​ກັບ​ຕົ້ນ​ໄມ້​ ແລະ ເບິ່ງ​ທ້ອງ​ຟ້າ​ ມີ​ຜົນ​ຕໍ່​ສຸຂະພາບ​ຈິດ​ ກ​ະ​ທັ້ງ​ຫຼາຍ​ຊົ່ວ​ໂມງ​ຕໍ່ມາ​. ແຕ່​ຖ້າ​ທ່ານ​ຍັງ​ບໍ່​ມີ​ໂອ​ກາດ​ອອກ​ໄປ​ຂ້າງ​ນອກ​ຕອນ​ນີ້​ ກໍ​ອາດຈະ​ໂຫຼດ​ເພງ​ມາ​ຟັງ.​ ຫຼັບ​ຕາ​ ແລະ ​ຄິດ​ເຖິງ​ທິວທັດ​ຂອງພູ​ໄປ​ກ່ອນ​ກໍໄດ້.​

6.ຫຼິ້ນ​ກັບ​ແມວ​ ງານ​ວິ​ໄຈສະແດງ​ໃຫ້​ເຫັນ​ວ່າ ​ແມວ​ສາມາດ​ເຮັດໃຫ້​ທ່ານ​ຮູ້ສຶກ​ສະຫງົບ​ໄດ້​. ງານ​ວິໄຈ​ດົນ​ 10 ປີ​ ຂອງ​ນັກ​ວິໄຈ​ທີ່ສະ​ຖາ​ບັນ​ສະ​ໂຕກ​ ທີ່​ມະຫາ​ວິທະຍາ​ໄລ​ມິ​ເນ​ໂຊ​ຕາ​ ເຊິ່ງ​ສຶກ​ສາ​ຊາວ​ອາ​ເມລິ​ກາ​ກວ່າ​ 4,000 ຄົນ​ ແລະ​ພົບ​ວ່າ​ເຈົ້າ​ຂອງ​ແມວ​ມີ​ແນວ​ໂນ້ມ​ທີ່​ຈະ​ຫົວ​ໃຈ​ວາຍ​ ຫຼື ​ເສັ້ນ​ເລືອດ​ໃນ​ສະໝອງ​ແຕກ​ໜ້ອຍ​ກວ່າ​ຄົນທີ່​ບໍ່​ໄດ້​ລ້ຽງ​ແມວ​ 30 ເປີ​​ເຊັນ​.​

7.ຫົວ​​ໃຫ້ຫຼາຍ​ຂຶ້ນ​ ການ​ຫົວ​​ເຮັດໃຫ້​ກ້າມ​ຊີ້ນ​ເຮົາ​ຈັງ​ໂຕ​ ຊ່ວຍ​ໃຫ້​ເລືອດ​ໝຸນ​ວຽນ​ດີ​ ແລະ​ຊ່ວຍ​ໃຫ້​ປ່ອຍ​ສານ​ໄນ​ຕ​ຣິກ​ອັອກ​ໄຊ​ ເຊິ່ງ​ຊ່ວຍ​ກະຕຸ້ນ​ພູ​ມຄຸ້ມ​ກັນ.​ ການ​ຫົວ​​ຊ່ວຍຫຼຸດ​ຄວາມ​ເຄັ່ງຕຶງ ​ແລະ ​ເຮັດໃຫ້​ຫຼັ່ງ​ສານ​ເອັນ​ດໍ​​ຟິນ​ ທີ່​ເຮັດໃຫ້​ເຮົາ​ມີ​ຄວາມ​ສຸກ​ ແລະ​ເປັນ​ຄືກັບ​ຢາ​ແກ້​ປວດ​ໂດຍ​ທຳມະຊາດ​. ເພາະ​ສະ​ນັ້ນ​ ການ​ຫົວ​​ຄື​ຢາ​ທີ່​ດີ​ທີ່ສຸດ.

​ 8.ເຮັດວຽກ​ແບບຄົນສະ​ແກນ​ດິ​ເນ​ເວຍ​ ປະເທດ​ໃນ​ແຖບ​ສ​ແກນ​ດິ​ເນ​ເວຍ​ຖືກ​ຈັດ​ວ່າ​ເປັນ​ປະເທດ​ທີ່​ມີ​ຄວາມ​ສຸກ​ທີ່ສຸດ​ໃນ​ໂລກ​ ຊາວ​ສ​ວີ​ເດນ​ມີ​ທຳນຽມ​ທີ່​ຮຽກ​ກັນ​ວ່າ​ “ຟິ​ກາ​”(fika) ຊຶ່ງ​ຄື​ໄລຍະພັກ​ດື່ມ​ກາ​ແຟ​ ແລະ​ ໄລຍະ​ພັກ​ກິນ​ເຄັກ​ກັບ​ເພື່ອນ​ຮ່ວມ​ງານ​ ແລະ​ເອົາ​ຂະໜົມ​ມາ​ແບ່ງ​ກັນ​. ນີ້ເປັນ​ທຳນຽມ​ທີ່​ເຮັດ​ກັນ​ຢ່າງ​ບັງຄັບ​ເລີຍ​ດ້ວຍ​ຊ້ຳ.

​ ເປັນຫຍັງ​ທ່ານ​ບໍ່​ລອງ​ນັດ​ກັບ​ເພື່ອນ​ຮ່ວມ​ງານ​ເຮັດ​ແບບ​ນີ້​ກັນ​ລອງເບິ່ງລະ​?

9.ນອນ​ຫຼາຍ​ຂຶ້ນ​ ການ​ນອນ​ຫຼັບ​ສຳຄັນ​ຕໍ່​ສຸຂະພາບ​ຮ່າງກາຍ ​ແລະ ​ຈິດ​ໃຈ​ ພໍໆ​ກັບ​ອາຫານ​ ແລະ​ ການ​ອອກ​ກຳ​ລັງ​ກາຍ.​ ການ​ນອນໜ້ອຍ​ຈະ​ເຮັດໃຫ້​ຮ່າງກາຍ​ທ່ານ​ມີ​ພູ​ມ​ຄຸ້ມ​ກັນ​ຕ່ຳ​ ແລະ​ເຮັດໃຫ້​ເຄັ່ງຕຶງ,​ ວິຕົ​​ກັງ​ວົນ​ ແລະ ​ຊຶມ​ເສົ້າ​ໄດ້​. ທ່ານ​ຄວນ​ຈະ​ພະຍາຍາມ​ຫຼັບ​ໃຫ້​ດີ​ຂຶ້ນ​ ຈັດ​ຫ້ອງ​ໃຫ້​ສະ​ອາດ​ຮຽບຮ້ອຍ​ ຢ່າ​ກິນ​ຕອນ​ເດິກ​ ແລະ ​ຫຼີກ​ເວັ້ນ​ແສງ​ຈາກ​ໂທລະ​ສັບ ຫຼື ​ຄອມພິວເຕີ​ທີ່​ເຮັດໃຫ້ທ່ານ​ນອນ​ບໍ່​ຫຼັບ.​ ຫາກ​ທ່ານ​ບໍ່​ດື່ມ​ກາ​ເຟ​ຕອນ​ບ່າຍນຳ​ ກໍ​ຈະ​ດີຫຼາຍ​.

 

ຕອບກັບ

ເມວຂອງທ່ານຈະບໍ່ຖືກເຜີຍແຜ່ໃຫ້ໃຜຮູ້ ບ່ອນທີ່ຕ້ອງການແມ່ນຖືກຫມາຍໄວ້ *