ປີ 2019 ຕົວເລກນັກສຶກສາລາວໄປຮຽນຈີນເພີ່ມຂຶ້ນເຖິງ 10,000 ກວ່າຄົນ

ສະຖານທູດ ສປປ ລາວ ປະຈໍາ ນະຄອນຫຼວງປັກກິ່ງ ສປ ຈີນ ສະຫຼອງວັນຄູແຫ່ງຊາດຄົບຮອບ 25 ປີຢ່າງເປັນຂະບວນຟົດຟື້ນພາຍໃຕ້ສາຍພົວພັນລາວ-ຈີນເຕີບໃຫຍ່ ແລະ ເບັ່ງບານຢ່າງບໍ່ຢຸດຢັ້ງ.

ຂະນະທີ່ ປັດຈຸບັນ ຕົວເລກຈໍານວນນັກສຶກສາລາວເດີນທາງເຂົ້າໄປສຶກສາຮໍ່າຮຽນຢູ່ ສປ ຈີນເພີ່ມຂຶ້ນເຖິງ 10,000 ຄົນ ເຊິ່ງພວມຈະກາຍເປັນກໍາລັງແຮງສໍາຄັນປະກອບສ່ວນເຂົ້າໃນການພັດທະນາ ແລະ ສ້າງສາປະເທດຊາດ.

ພິທີສະເຫຼີມສະຫຼອງວັນຄູແຫ່ງຊາດຄົບຮອບ 25 ປີໄດ້ຈັດຂຶ້ນໃນວັນທີ 5 ຕຸລາ 2019 ທີ່ສະຖານທູດ ສປປ ລາວ ປະຈໍາປັກກິ່ງ ທາມກາງບັນຍາກາດທີ່ ສປ ຈີນ ຫາກໍສໍາເລັດການສະຫຼອງວັນຊາດຂອງຕົນຄົບຮອບ 70 ປີ, ສປປ ລາວພວມດໍາເນີນກອງປະຊຸມ 3 ຂັ້ນ ແລະ ວັນສໍາຄັນຂອງຊາດອື່ນໆ, ໂດຍໃຫ້ກຽດເຂົ້າຮ່ວມຂອງ ທ່ານ ນາງ ຄໍາເພົາ ເອີນທະວັນ ເອກອັກຄະລັດຖະທູດແຫ່ງ ສປປ ລາວ ຄົນໃໝ່ປະຈໍາ ສປ ຈີນ ພ້ອມດ້ວຍນັກສຶກສາລາວຫຼາຍກວ່າ 200 ຄົນເຂົ້າຮ່ວມ.

ທ່ານ ແສງສັນໄຊ ຂັດຕິຍະວົງ ຫົວຄະນະນັກສຶກສາປະຈໍາ ສປ ຈີນ ໄດ້ລາຍງານສະພາບລວມວ່າ: ຄະນະນັກສຶກສາລາວ ທີ່ປັກກິ່ງ ສປ ຈີນເປັນອົງການຈັດຕັ້ງໜຶ່ງໄດ້ຮັບການຊີ້ນໍາຈາກຫ້ອງການທີ່ປຶກສາ ຝ່າຍສຶກສາ-ວັດທະນະທໍາໂດຍໄດ້ຮັບການແຕ່ງຕັ້ງຈາກສະຖານທູດລາວ, ເປັນເສນາທິການໃຫ້ແກ່ສະຖານທູດ, ມີບົດບາດໃນການຄຸ້ມຄອງ, ເຕົ້າໂຮມຄວາມສາມັກຄີ, ສ້າງຄວາມເຂົ້າໃຈ, ກໍ່ສ້າງ-ສຶກສາອົບຮົມໃຫ້ກາຍເປັນມະຫາຊົນກ້າວໜ້າ, ອໍານວຍຄວາມສະດວກ ແລະ ມີການເຄື່ອນໄຫວກິດຈະກໍາຕ່າງໆທີ່ເປັນປະໂຫຍດລະຫວ່າງພາຍໃນ-ຕ່າງປະເທດ ແລະ ອື່ນໆລະຫວ່າງນັກສຶກສາລາວພາຍຢູ່ປັກກິ່ງ ແລະ ນັກສຶກສາລາວພາຍໃນ ສປ ຈີນ.

ປັດຈຸບັນສະເພາະຕົວເລກນັກສຶກສາລາວທັງໝົດພວມຮຽນຢູ່ປັກກິ່ງປະມານ 433 ຄົນ ໃນນັ້ນ ປະລິນຍາຕີ 198 ຄົນ, ປະລິນຍາໂທ 152 ຄົນ, ປະລິນຍາເອກ 14 ຄົນ, ກຽມພາສາ 49 ຄົນ, ຊັ້ນສູງ 10 ຄົນ ແລະ ອື່ນໆ.

ໃນໂອກາດດັ່ງກ່າວນີ້ ທ່ານ ນາງ ຄໍາເພົາ ເອີນທະວັນ ເອກອັກຄະລັດຖະທູດແຫ່ງ ສປປ ລາວ ຄົນໃໝ່ປະຈໍາ ສປ ຈີນໄດ້ໂອ້ລົມ ແລະ ໃຫ້ທິດຊີ້ນໍາຕໍ່ນັກສຶກສາລາວໂດຍກ່າວຍ້ອງຍໍ ແລະ ຊົມເຊີຍຜົນສໍາເລັດອັນຍິ່ງໃຫຍ່ ລວມທັງຄຸນງາມຄວາມດີອັນປະເສີດຂອງຄູ-ອາຈານພາຍໃຕ້ແນວທາງນະໂຍບາຍຂອງພັກ-ລັດອັນສະຫຼາດສ່ອງໄສໄດ້ນໍາພາປະເທດຊາດຍາດເອົາໄຊຊະນະອັນຍິ່ງໃຫຍ່ນັບບໍ່ຖ້ວນ ແລະ ເຮັດໃຫ້ປະເທດຊາດຄ່ອຍຫຼຸດພົ້ນອອກຈາກຄວາມດ້ອຍພັດທະນາກ້າວຂຶ້ນສູ່ສັງຄົມເປັນກ້າວໆ.

ດັ່ງທີ່ຮູ້ນໍາກັນແລ້ວ ຄູປຽບເໝືອນແມ່ພິມຂອງຊາດສ້າງຄົນ ແລະ ຝຶກຝົນຫຼໍ່ຫຼອມຄົນໃຫ້ກາຍເປັນຜູ້ທີ່ມີຄວາມຮູ້ຄວາມສາມາດ, ມີຄຸນສົມບັດສິນທໍາປະຕິວັດ, ຮູ້ຮັກເຊື້ອແພງຊາດ ແລະ ບ້ານເກີດເມືອງນອນ ອັນໄດ້ປະກອບສ່ວນເຂົ້າໃນພາລະກິດປົກປັກຮັກສາ ແລະ ພັດທະນາປະເທດຊາດຢ່າງໜັກແໜ້ນ. ແນວໃດກໍດີ ຕົວເລກຂອງນັກສຶກສາລາວໄດ້ຮັບທຶນພາຍໃນແຜນຂອງລັດຖະບານເຂົ້າມາສຶກສາຮໍ່າຮຽນຢູ່ ສປ ຈີນໄດ້ສືບຕໍ່ເພີ່ມຂຶ້ນຈາກ 300 ຄົນໃນປີ 2018 ມາເປັນ 350 ຄົນໃນປີ 2019 ນອກຈາກນັ້ນ, ຍັງມີທຶນນອກແຜນທີ່ບັນດາແຂວງຊາຍແດນ, ບໍລິສັດ ແລະ ຫົວໜ່ວຍທຸກລະກິດອື່ນສະໜອງທຶນໂດຍກົງໃຫ້ຕື່ມອີກລວມທັງໝົດ 10,000 ຄົນ ແລະ ຄາດວ່າການສະໜອງທຶນຂອງລັດຖະບານຈີນເພື່ອກໍ່ສ້າງບຸກຄະລາກອນ ແລະ ຖ່າຍທອດຄວາມຮູ້ຄວາມສາມາດໃຫ້ຄົນລາວຈະສືບຕໍ່ເພີ່ມຂຶ້ນຢ່າງຕໍ່ເນື່ອງ.

 

ແຫຼ່ງຂ່າວ: ຂ່າວສານປະເທດລາວ

ຕອບກັບ

ເມວຂອງທ່ານຈະບໍ່ຖືກເຜີຍແຜ່ໃຫ້ໃຜຮູ້ ບ່ອນທີ່ຕ້ອງການແມ່ນຖືກຫມາຍໄວ້ *