ຍທຂ ເມືອງຊະນະສົມບູນ ເລັ່ງສ້ອມແປງເສັ້ນທາງ ຈຸດເປ່ເພ-ເສຍຫາຍ

ຫ້ອງການໂຍທາທິການ ແລະ ຂົນສົ່ງ ເມືອງຊະນະສົມບູນ ແຂວງຈໍາປາສັກ ກໍາລັງເລັ່ງສ້ອມແປງເສັ້ນທາງ ໃຫ້ຄືນສູ່ສະພາບປົກກະຕິໂດຍໄວ ຫລັງຈາກທີ່ ໄດ້ຮັບຜົນກະທົບຈາກໄພພິບັດ ນໍ້າຖ້ວມ ເມື່ອຕົ້ນເດືອນກັນຍາທີ່ຜ່ານມາ ຄາດວ່າຈະໃຫ້ສໍາເລັດພາຍໃນ 2 ອາທິດຕໍ່ໜ້ານີ້. ໂດຍແມ່ນບໍລິສັດ ປັນຍາທິລາດ ເປັນຜູ້ຮັບເໝົາ.

ທ່ານ ຢາຊູກິ ບູນທະວີສານ ວິຊາການຕິດຕາມພາກສະໜາມ ໂຄງການບູລະນະຮັກສາທາງຫລວງແຫ່ງຊາດທີ 20 ເປີດເຜີຍໃນວັນທີ 4 ຕຸລາ 2019ວ່າ: ເສັ້ນທາງຫລວງເຂດ ເມືອງຊະນະສົມບູນ ທີ່ໄດ້ຮັບຄວາມເສຍຫາຍໜັກກວ່າໝູ່ແມ່ນຈຸດ ບ້ານສິວິໄລ ເຊິ່ງມີຄວາມຍາວກວ່າ 200 ແມັດ ປັດຈຸບັນແມ່ນຜູ້ຮັບເໝົາໂຄງການ ໄດ້ເລັ່ງສ້ອມແປງເສັ້ນທາງດັ່ງກ່າວ ເພື່ອໃຫ້ມີການສັນຈອນໄປມາສະດວກສະບາຍຂຶ້ນ ເຊິ່ງຕອນນີ້ແມ່ນຢູ່ໃນຂັ້ນຕອນ ໂລໜ້າດິນຂຶ້ນມາເປັນຊັ້ນໆ ເພື່ອໃຫ້ຢູ່ໃນ ລະດັບໜ້າທາງ ໃນສະພາບປົກກະຕິ ໂດຍໄດ້ເລີ່ມລົງມືແລ້ວມາໄດ້ 3-4 ມື້, ຄາດວ່າຈະໃຫ້ສໍາເລັດໃນ 2 ອາທິດ.

ທ່ານ ຢາຊູກິ ບູນທະວີສານ ໄດ້ຮຽກຮ້ອງມາຍັງຜູ້ໃຊ້ລົດ ໃຊ້ຖະໜົນ ເດີນທາງຜ່ານເສັ້ນທາງດັ່ງ ກ່າວໃຫ້ມີສະຕິ ລະມັດລະວັງ ໃຫ້ລົດຜ່ອນຄວາມໄວໃນໄລຍະ ທີ່ມີການສ້ອມແປງນີ້ ເພື່ອຫລຸດຜ່ອນການເກີດອຸບັດເຫດທີ່ອາດເກີດຂຶ້ນ.

ຕອບກັບ

ເມວຂອງທ່ານຈະບໍ່ຖືກເຜີຍແຜ່ໃຫ້ໃຜຮູ້ ບ່ອນທີ່ຕ້ອງການແມ່ນຖືກຫມາຍໄວ້ *