ຍົກສູງຄວາມສາມາດ ການເຝົ້າລະວັງພະຍາດຈາກສັດປ່າ ເພື່ອຮັບປະກັນຄວາມຍືນຍົງ

ພິ­ທີ​ລົງ​ນາມ​ບົດ​ບັນ­ທຶກ​ຄວາມ​ເຂົ້າ­ໃຈ​ກ່ຽວ​ກັບ​ໂຄງ­ການ​ພັດ­ທະ­ນາ​ເຄືອ​ຄ່າຍ​ການ​ເຝົ້າ​ລະ­ວັງ​ພະ­ຍາດ​ສັດ­ປ່າ​ລະ­ດັບ​ຊາດ ຈັດ​ຂຶ້ນ​ວັນ​ທີ 4 ຕຸ­ລາ 2019 ຢູ່​ໂຮງ­ແຮມ​ລາວ​ພລາ​ຊາ ລະ­ຫວ່າງ​ທ່ານ ສີ​ທອງ ພິ​ພັກ­ຂະ​ວົງ ຮອງ​ຫົວ­ໜ້າ​ກົມ​ລ້ຽງ­ສັດ ແລະ ການ​ປະ­ມົງ ກະ­ຊວງ​ກະ­ສິ­ກຳ ແລະ ປ່າ­ໄມ້ ແລະ ທ່ານ ສັນ­ຕິ ໄຊ​ປັນ­ຍາ ຜູ້­ອຳ­ນວຍ­ການ​ອົງ­ການ​ອະ­ນຸ​ຮັກ​ສັດ­ປ່າ ປະ­ຈຳ​ລາວ ມີ​ທ່ານ​ນາງ Marthar M stokes ຜູ້​ຈັດ­ການ​ພາກ​ພື້ນ​ອົງ­ການ​ປ້ອງ​ກັນ ແລະ ຫຼຸດ­ຜ່ອນ​ໄພ​ຂົ່ມ­ຂູ່ ທ່ານ Colin T Crosby ອຸ ປະ​ທູດ ສ ອາ​ເມ​ຣິ​ກາ ປະ­ຈຳ ສປປ ລາວ ພ້ອມ​ດ້ວຍ​ພາກ­ສ່ວນ​ກ່ຽວ­ຂ້ອງ​ເຂົ້າ​ຮ່ວມ.

ໂຄງ­ການ​ນີ້ ດຳ­ເນີນ​ພາຍ​ໃຕ້​ການ​ຊີ້​ນຳ​ຂອງ​ກົມ​ລ້ຽງ­ສັດ ແລະ ການ​ປະ­ມົງ ເຊິ່ງ​ແມ່ນ​ສູນ​ວິ­ໄຈ​ພະ­ຍາດ​ສັດ ແລະ ອົງ­ການ​ອະ­ນຸ​ຮັກ​ສັດ­ປ່າ​ປະ­ຈຳ​ລາວ ເປັນ​ຜູ້​ຈັດ​ຕັ້ງ​ປະ­ຕິ­ບັດ​ຫຼັກ ແລະ ໄດ້​ຮັບ​ການ​ຮ່ວມ​ມື​ຈາກ​ບັນ­ດາ​ພະ­ແນກ­ການ​ກ່ຽວ­ຂ້ອງ​ຕ່າງໆ​ຂອງ​ລັດ­ຖະ­ບານ ສະ​ຖາ​ບັນ​ປັດ​ສະ​ເຕີ​ລາວ ສູນ​ຮ່ວມ​ມື​ຄົ້ນ­ຄວ້າ​ດ້ານ​ພະ­ຍາດ​ເຂດ​ຮ້ອນ ໂຮງ­ໝໍ​ມະ­ໂຫ­ສົດ ສູນ​ຟື້ນ​ຟູ​ສັດ­ປ່າ ແລະ ປ່າ​ສະ­ຫງວນ​ແຫ່ງ​ຊາດ ໂດຍ​ຈະ​ສຸມ​ໃສ່​ເພີ່ມ​ຄວາມ​ສາ­ມາດ​ໃຫ້​ລັດ­ຖະ­ບານ ໃນ​ການ​ດຳ­ເນີນ​ການ​ເຝົ້າ​ລະ­ວັງ​ພະ­ຍາດ​ຈາກ​ສັດ­ປ່າ​ໃນ​ທົ່ວ​ປະ­ເທດ ຊອກ​ຫາ​ບັນ­ດາ​ເຊື້ອ​ພະ­ຍາດ​ທີ່​ມີ​ຄວາມ​ສຳ­ຄັນ​ຕໍ່​ສຸ­ຂະ­ພາບ​ສັດ ແລະ ຄົນ ໃນ ສປປ ລາວ ແລະ ສອດ­ຄ່ອງ​ກັບ​ບຸ­ລິ­ມະ­ສິດ​ທີ່​ລັດ­ຖະ­ບານ​ຂອງ​ລາວ​ໄດ້​ກຳ­ນົດ​ໄວ້ ໂຄງ­ການ​ດັ່ງ­ກ່າວ​ໄດ້​ຮັບ​ທຶນ​ສະ­ໜັບ­ສະ­ໜູນ​ຈາກ​ອົງ­ການ​ປ້ອງ​ກັນ​ຫຼຸດ­ຜ່ອນ​ໄພ​ຂົ່ມ­ຂູ່ ມູນ​ຄ່າ 617.744 ໂດ​ລາ​ສະ­ຫະ­ລັດ ຫຼື ປະ ມານ 5,4 ຕື້​ກີບ ຈະ​ເລີ່ມ​ຈັດ​ຕັ້ງ​ປະ­ຕິ­ບັດ​ແຕ່​ວັນ​ລົງ​ນາມ-ເດືອນ​ທັນ­ວາ 2022.

ສຳ­ລັບ​ກິດ­ຈະ­ກຳ​ຫຼັກ​ປະ­ກອບ​ມີ ການ​ພັດ­ທະ­ນາ​ນະ­ໂຍ­ບາຍ​ຍຸດ​ທະ​ສາດ​ການ​ເຝົ້າ​ລະ­ວັງ​ພະ­ຍາດ​ສັດ­ປ່າ ສຳ­ລັບ ສປປ ລາວ ພັດ­ທະ­ນາ​ເຄືອ​ຄ່າຍ​ການ​ເຝົ້າ​ລະ­ວັງ​ພະ­ຍາດ​ຈາກ​ສັດ­ປ່າ​ລະ­ດັບ​ຊາດ ທີ່​ມີ​ປະ​ສິດ­ທິ​ຜົນ ສ້າງ​ຄວາມ​ສາ­ມາດ​ໃນ​ດ້ານ​ທີ່​ລັດ­ຖະ­ບານ ສປປ ລາວ ມີ​ຄວາມ​ຕ້ອງ­ການ ເພື່ອ​ຮັບ​ປະ ກັນ​ຄວາມ​ຍືນ​ຍົງ​ຂອງ​ເຄືອ​ຄ່າຍ​ການ​ເຝົ້າ​ລະ­ວັງ​ພະ­ຍາດ​ຈາກ​ສັດ­ປ່າ.

ຕອບກັບ

ເມວຂອງທ່ານຈະບໍ່ຖືກເຜີຍແຜ່ໃຫ້ໃຜຮູ້ ບ່ອນທີ່ຕ້ອງການແມ່ນຖືກຫມາຍໄວ້ *