ເລັ່ງແກ້ໄຂບັນຫາລະດັບນ້ຳງື່ມ-ນ້ຳຂອງຫຼຸດລົງ ເພື່ອບໍ່ໃຫ້ກະທົບຕໍ່ການຜະລິດ

ປັດ­ຈຸ­ບັນ ລະ­ດັບ​ນ້ຳ​ງື່ມ ແລະ ນ້ຳ­ຂອງ ໄດ້​ບົກ​ແຫ້ງ​ລົງ​ຈາກ​ລະ­ດັບ​ປົກ­ກະ­ຕິ​ຫຼາຍ​ສົມ­ຄວນ ສົ່ງ​ຜົນ​ກະທົບ​ຕໍ່​ການ​ສະ­ໜອງ​ນ້ຳ​ໃຫ້​ເນື້ອ­ທີ່​ການ​ຜະ­ລິດ​ເຂົ້າ­ນາ​ປີ ເຊິ່ງ​ພະ​ແນກ​ກະ­ສິ­ກຳ ແລະ ປ່າ­ໄມ້ ນະ­ຄອນ­ຫຼວງ​ວຽງ​ຈັນ (ນວ) ແລະ ຫ້ອງ​ວ່າ­ການ​ປົກ­ຄອງ ນວ ໄດ້​ຊີ້​ນຳ​ໃຫ້​ເລັ່ງ​ແກ້​ໄຂ​ໂດຍ​ໄວ ເພື່ອ​ບໍ່​ໃຫ້​ເກີດ​ມີ​ສະ­ພາບ​ແຫ້ງ­ແລ້ງ ແລະ ສົ່ງ​ຜົນ​ຮ້າຍ​ແຮງ​ຕໍ່​ການ​ຜະ­ລິດ​ຂອງ​ປະ­ຊາ­ຊົນ.

ທ່ານ ສາຍ​ຄຳ ແພງ​ຄຳ​ມີ ຫົວ­ໜ້າ​ຂະ­ແໜງ​ຊົນ­ລະ­ປະ­ທານ ພະ​ແນກ​ກະ­ສິ­ກຳ ແລະ ປ່າ­ໄມ້ ນວ ໃຫ້​ສຳພາດ ໃນຕົ້ນອາທິດທີ່ຜ່ານມາວ່າ: ຂະ­ແໜງ​ຊົນ­ລະ­ປະ­ທານ ໄດ້​ຮັບ​ແຈ້ງ​ເຕືອນ​ຈາກ​ກົມ​ອຸ­ຕຸ­ນິ­ຍົມ ແລະ ອຸ​ທົກ​ກະ​ສາດ ວ່າ​ຈະ​ເກີດ​ໄພ​ແຫ້ງ­ແລ້ງ ຈຶ່ງ​ໄດ້​ສົມ­ທົບ​ກັບ​ອຳ­ນາດ​ການ​ປົກ­ຄອງ​ບ້ານ ຜູ້­ນຳ​ໃຊ້​ນ້ຳ​ແຕ່​ລະ­ສະ ຖາ​ນີ ແລະ ພາກ­ສ່ວນ​ກ່ຽວ­ຂ້ອງ​ລົງ​ກວດ­ກາ​ຕົວ​ຈິງ ແລະ ພົບ​ເຫັນ​ສະ­ພາບ​ແຫ້ງ­ແລ້ງ​ຫຼາຍ​ເມືອງ ຄື: ເມືອງ​ນາ​ຊາຍ​ທອງ ອ່າງ­ເກັບ­ນ້ຳ-ນ້ຳ​ຫຸມ ມີ​ປະ­ລິ­ມານ​ນ້ຳ​ຫຼຸດ​ລົງ​ຜິດ​ປົກ­ກະ­ຕິ ຈາກ 60 ລ້ານ​ແມັດ​ກ້ອນ ເຫຼືອ 26 ລ້ານ​ແມັດ​ກ້ອນ ອ່າງ​ໂຕ່ງ​ຂອງ​ບ້ານ​ແສນ​ດິນ ບໍ່​ສາ­ມາດ​ສະ­ໜອງ​ນ້ຳ​ສູ່​ການ​ຜະ­ລິດ​ໄດ້ ເມືອງ​ໄຊ​ທາ­ນີ 13 ສະ­ຖາ­ນີ ໄດ້​ຮັບ​ຜົນ​ກະ­ທົບ ສະ­ໜອງ​ນ້ຳ​ໃຫ້​ເນື້ອ­ທີ່​ການ​ຜະ­ລິດ​ເຂົ້າ­ນາ​ປີ​ບໍ່​ພຽງ­ພໍ​ໄດ້​ຕາມ​ຄວາມ​ຕ້ອງ­ການ ເມືອງ​ປາກ​ງື່ມ ສະ­ຖາ­ນີ​ບ້ານ​ໂດນ ຫ້ວຍ​ໝາກ​ຮຽວ ສະ­ຖາ­ນີ​ບ້ານ​ໂນນ​ຊາຍ ພົບ​ບັນ­ຫາ​ແຫ້ງ­ແລ້ງ ເມືອງ​ຫາດ​ຊາຍ​ຟອງ ມີ​ຜົນ​ກະ­ທົບ​ເລັກ​ໜ້ອຍ ເມືອງ​ນາ​ຊາຍ​ທອງ ແລະ ສັງ​ທອງ ກໍ​ພົບ​ຄວາມ​ຫຍຸ້ງ­ຍາກ ແຕ່​ກໍ​ຢູ່​ໃນ​ຄວາມ​ຮັບ­ຜິດ­ຊອບ​ຂອງ​ເອ­ກະ​ຊົນ ທີ່​ສຳ​ປະ­ທານ​ກໍ່­ສ້າງ​ລະ­ບົບ​ຊົນ­ລະ­ປະ­ທານ ໂດຍ​ຄາດ​ວ່າ​ຈະ​ຫາ​ວິ­ທີ​ແກ້​ໄຂ​ໃຫ້​ລຸ​ລ່ວງ​ໂດຍ​ໄວ.

ຂະ­ແໜງ​ຊົນ­ລະ­ປະ­ທານ ໄດ້​ສົມ­ທົບ​ກັບ​ພາກ­ສ່ວນ​ກ່ຽວ­ຂ້ອງ​ລົງ​ແກ້​ໄຂ ເປັນ­ຕົ້ນ ເສີມ​ທໍ່ ຕໍ່​ສາຍ​ໄຟ ນຳ​ກົນ​ຈັກ ລວງ​ຄອງ​ໃຫ້​ນ້ຳ​ໄຫຼ​ສູ່​ຈັກ​ສູບ​ແຕ່​ລະ​ສະ­ຖາ­ນີ​ທີ່​ໄດ້​ຮັບ​ຜົນ​ກະ­ທົບ ເພື່ອ​ແກ້​ໄຂ​ແບບ​ສຸກ​ເສີນ ແຕ່​ກໍ​ມີ​ຄວາມ​ຫຍຸ້ງ­ຍາກ ເນື່ອງ​ຈາກ​ງົບ­ປະ­ມານ​ມີ​ຈຳ­ກັດ ເຮັດ​ໃຫ້​ບໍ່​ພຽງ­ພໍ​ຕໍ່​ການ­ຈັດ­ຕັ້ງ​ປະ­ຕິ­ບັດ​ວຽກ​ງານ​ຕົວ​ຈິງ ແຕ່​ຂະ­ແໜງ​ຊົນ­ລະ­ປະ­ທານ​ຈະ​ໄດ້​ສົມ­ທົບ​ກັບ​ທຸກ​ພາກ­ສ່ວນ ຕິດ­ຕາມ​ສະ­ພາບ​ການ​ຢ່າງ​ໃກ້­ຊິດ ເພື່ອ​ລາຍ​ງານ​ຕໍ່​ຂັ້ນ​ເທິງ ແລະ ຫາ​ວິ­ທີ​ແກ້​ໄຂ​ໃຫ້​ລຸ​ລ່ວງ​ໂດຍ​ໄວ ໂອ­ກາດ​ນີ້ ກໍ​ຂໍ​ຮຽກ­ຮ້ອງ​ເຖິງ​ທຸກ​ພາກ­ສ່ວນ​ທີ່​ກ່ຽວ ຂ້ອງ ກໍ​ຄື ປະ­ຊາ­ຊົນ​ທີ່​ອາ­ໄສ​ຢູ່​ໃນ​ເຂດ​ທີ່​ພົບ​ບັນ­ຫາ ໂດຍ​ສະ­ເພາະ ຜູ້​ທີ່​ອາ­ໄສ​ຢູ່​ເຂດ​ລຽບ​ນ້ຳ​ງື່ມ ຊ່ວຍ​ສັງ ເກດ​ປະ­ລິ­ມານ​ນ້ຳ ຫາກ​ມີ​ການ​ຫຼຸດ​ລົງ​ຜິດ​ປົກ­ກະ­ຕິ ກໍ​ໃຫ້​ລາຍ​ງານ​ສະ­ພາບ​ຕໍ່​ພາກ­ສ່ວນ​ຮັບ­ຜິດ­ຊອບ ແລະ ອຳ­ນາດ​ການ​ປົກ­ຄອງ​ບ້ານ​ໂດຍ​ໄວ ເພື່ອ​ຫາ​ວິ­ທີ​ແກ້​ໄຂ​ໃຫ້​ທັນ​ເວ­ລາ.

 

ຕອບກັບ

ເມວຂອງທ່ານຈະບໍ່ຖືກເຜີຍແຜ່ໃຫ້ໃຜຮູ້ ບ່ອນທີ່ຕ້ອງການແມ່ນຖືກຫມາຍໄວ້ *