ອຳ​ນາດ​ການ​ປົກ​ຄອງ​ເຂດ​ບໍ​ລິ​ຫານ​ພິ​ເສດ​ຮົງ​ກົງ ​ສະ​ແດງ​ຄວາມ​ຄຽດ​ແຄ້ນ​ຕໍ່​ເຫດ​ການ​ໃຊ້​ຄວາມ​ຮຸນ​ແຮງ​

ວັນ​ທີ 2 ຕຸ​ລາ​ນີ້ ໂຄ​ສົກ​ອຳ​ນາດ​ການ​ປົກ​ຄອງ​ເຂດ​ບໍ​ລິ​ຫານ​ພິ​ເສດ​ຮົງ​ກົງ (ຈີນ) ​ໄດ້​ສະ​ແດງ​ຄວາມ​ຄຽດ​ແຄ້ນ​ຢ່າງ​ຮຸນ​ແຮງ​ຕໍ່​ເຫດ​ການ​ໃຊ້​ຄວາມ​ຮຸນ​ແຮງ​ທີ່​ເກີດ​ຂຶ້ນ​ຢູ່ຫຼາຍ ​ເຂດ​ຂອງ​ຮົງ​ກົງ​ໃນ​ວັນ​ທີ 1 ຕຸ​ລາ​ນີ້ ໂດຍ​ຊີ້​ອອກວ່າ ການ​ໃຊ້​ຄວາມ​ຮຸນ​ແຮງ​ແບບ​ນີ້​ໄດ້​ເປັນ​ໄພ​ຂົ່ມ​ຂູ່​ຢ່າງ​ຮ້າຍ​ແຮງ​ຕໍ່​ຄວາມ​ປອດ​ໄພ​ຂອງ​ປະ​ຊາ​ຊົນ​ຮົງ​ກົງ ໄດ້​ທຳ​ລາຍ​ຄວາມ​ເປັນ​ລະ​ບຽບຮຽບ​ຮ້ອຍ​ຂອງສັງ​ຄົມ​ຢ່າງ​ຮ້າຍ​ແຮງ.

ໂຄ​ສົກ​ກ່າວ​ຕື່ມ​ວ່າ ວັນ​ທີ 1 ຕຸ​ລາ​ນີ້ ມີ​ກຸ່ມ​ຄົນ​ໂຮມ​ຊຸມ​ນຸມ​ ແລະ ​ເດີນຂະ​ບວນ​ຢ່າງ​ຜິດ​ກົດ​ໝາຍ​ຢູ່ຫຼາຍ​ເຂດ​ຂອງ​ຮົງ​ກົງ ພາຍຫຼັງ​ມາ​ໄດ້​ກາຍ​ເປັນ​ເຫດ​ການ​ໃຊ້​ຄວາມ​ຮຸນ​ແຮງ​ທີ່​ອັນ​ຕະ​ລາຍ​ທີ່​ສຸດ, ກຸ່ມ​ຫົວ​ຮຸນ​ແຮງ​ໄດ້​ຈູດ​ໄຟ ແລະ  ແກວ່ງລະ​ເບີດ​ນ້ຳ​ມັນ​ແອັດ​ຊັງ​ຢູ່ຫຼາຍ​ບ່ອນ  ລວມ​ທັງ​ສະ​ຖາ​ນີ​ລົດ​ໄຟ​ໃຕ້​ດິນ ພ້ອມ​ທັງ​ໄດ້​ທຳ​ລາຍ​ຮ້ານ​ຄ້າ ແລະ  ​ເຄື່ອງ​ຂອງ​ສ່ວນ​ລວມ​ ອັດ​ຕັນ​ຖະ​ໜົນ​ສາຍຫຼັກຫຼາຍ​ສາຍ​ດ້ວຍ​ວັດ​ຖຸ​ຕ່າງໆ ກີດ​ຂວາງວຽກ​ງານ​ດັບ​ເພີງ ແລະ  ວຽກ​ງານ​ຊ່ວຍ​ເຫຼືອ​ເປັນ​ຕົ້ນ. ນອກ​ນີ້ ​ກຸ່ມ​ຫົວ​ຮຸນ​ແຮງ​​ຍັງໄດ້​ທຳ​ລາຍ​ຕຶກ​ຫ້ອງ​ການຫຼາຍ​ບ່ອນ ​ເຜົາທຳ​ລາຍ​ທຸງ​ຊາດ ແລະ  ທ້າ​ທາຍ​​ອຳ​ນາດອະ​ທິ​ປະ​ໄຕ​ແຫ່ງ​ຊາດ.

ເພື່ອ​ຮັບ​ປະ​ກັນ​ຄວາມ​ປອດ​ໄພ​ຂອງ​ຊາວ​ເມືອງ ແລະ  ຟື້ນ​ຟູ​ຄວາມ​ເປັນ​ລະ​ບຽບ​​ຮຽບ​ຮ້ອຍ​ຂອງສັງ​ຄົມ ເຈົ້າ​ໜ້າ​ທີ່​ຕຳຫຼວດ​ໄດ້​ໃຊ້​ກຳ​ລັງ​​ຕອບ​ໂຕ້ຢ່າງ​ເໝາະ​ສົມ ໂດຍຂັບ​ໄລ່ ແລະ  ຈັບ​ກຸມກຸ່ມ​ຫົວ​ຮຸນ​ແຮງດັ່ງ​ກ່າວ​ຢ່າງ​ຂາດ​ຕົວ.

ຕອບກັບ

ເມວຂອງທ່ານຈະບໍ່ຖືກເຜີຍແຜ່ໃຫ້ໃຜຮູ້ ບ່ອນທີ່ຕ້ອງການແມ່ນຖືກຫມາຍໄວ້ *