ເມືອງຊົນນະບູລີ ຕ້ອງການແນວພັນເຂົ້າ-ພືດ ເພື່ອຜະລິດລະດູແລ້ງ

ປັດຈຸບັນ ເມືອງຊົນນະບູລີ ແຂວງສະຫວັນນະເຂດ ມີຄວາມຕ້ອງການແນວພັນເຂົ້າປູກ 264 ໂຕນ ເພື່ອເຮັດນາແຊງໃນລະດູແລ້ງໃກ້ຈະມາເຖິງນີ້, ພ້ອມນັ້ນ ຍັງຕ້ອງການແນວພັນສາລີ 16,8 ໂຕນ, ຖົ່ວດິນ 21 ໂຕນ, ຖົ່ວຍາວ 3.500 ກະປ໋ອງ, ໝາກແຕງ 3.500 ກະປ໋ອງ ແລະ ພືດຜັກອື່ນໆອີກ 5.000 ກະປ໋ອງ ເພື່ອປູກເປັນສະບຽງອາຫານ ເພື່ອແກ້ໄຂຊີວິດການເປັນຢູ່ ປະຈຳວັນໃນໄລຍະຟື້ນຟູເບື້ອງຕົ້ນ. ທັງນີ້ ກໍເພື່ອເປັນການຮັບປະກັນ ໃຫ້ມີເຂົ້າກິນທີ່ພຽງພໍ ຫລື ໃຫ້ຂາດແຄນໜ້ອຍທີ່ສຸດ, ພາຍ ຫລັງທີ່ໄດ້ຮັບຜົນກະທົບຈາກໄພນ້ຳຖ້ວມ.

ທ່ານ ສຸວິໄລ ຫລວງຊະລາດ ເຈົ້າເມືອງຊົນນະບູລີ ໄດ້ໃຫ້ສຳພາດໃນວັນທີ 2 ຕຸລາ 2019 ນີ້ວ່າ: ເມືອງຊົນນະບູລີ ຕັ້ງເປົ້າໝາຍສູ້ຊົນປູກເຂົ້ານາແຊງໃນປີນີ້ ໃຫ້ບັນລຸ 3.300 ເຮັກຕາ ເຊິ່ງມີຄວາມຕ້ອງການເຂົ້າປູກເຖິງ 264 ໂຕນ ເພາະວ່າ ເຂົ້າທີ່ເກັບມ້ຽນໄວ້ໄດ້ຖືກນ້ຳຖ້ວມແຊ່ ແລະ ຊຸໄຫລໜີ ໃນໄລຍະໄພພິບັດນ້ຳຖ້ວມ ນັບຕັ້ງແຕ່ທ້າຍເດືອນສິງຫາ ຫາຕົ້ນເດືອນກັນຍາຜ່ານມາ. ເມືອງຊົນນະບູລີ ມີບ້ານທີ່ຖືກນ້ຳຖ້ວມທັງໝົດ 16 ບ້ານ ມີ 3.638 ຄອບຄົວ ໃນຈຳນວນບ້ານທັງໝົດ 48 ບ້ານ, ເລົ້າເຂົ້າຖືກນ້ຳຖ້ວມ 2.500 ຫລັງ, ເນື້ອທີ່ນາ 10.000 ກວ່າເຮັກຕາ ເຊິ່ງກວມເອົາ 76% ຂອງເນື້ອທີ່ປັກດຳຕົວຈິງ, ພືດ 440 ກວ່າເຮັກຕາ, ຊົນລະປະທານ 8 ແຫ່ງ, ເສັ້ນທາງ 9 ເສັ້ນ, ຂົວ 8 ແຫ່ງ ແລະ ຂະແໜງການອື່ນໆ ລວມມູນຄ່າເສຍຫາຍ ເບື້ອງຕົ້ນເກືອບ 16 ຕື້ກີບ.

ນອກຈາກ ຄວາມຕ້ອງການແນວພັນເຂົ້າ ແລະ ພືດ ແລ້ວ ຍັງຕ້ອງການງົບປະມານ ເພື່ອມາສ້ອມແປງໂຮງຮຽນທີ່ເປ່ເພຈຳນວນ 35 ຫລັງ, ພ້ອມຊື້ອຸປະກອນການຮຽນ-ການສອນ, ສ້ອມແປງວິດ ຖ່າຍ,ນ້ຳປະປາຊຸມຊົນ, ນ້ຳສ້າງ, ນ້ຳບາດານ, ສຸກສາລາ, ເສັ້ນທາງ, ຂົວ, ລະບົບໄຟຟ້າ ແລະ ອື່ນໆ.

 

ຕອບກັບ

ເມວຂອງທ່ານຈະບໍ່ຖືກເຜີຍແຜ່ໃຫ້ໃຜຮູ້ ບ່ອນທີ່ຕ້ອງການແມ່ນຖືກຫມາຍໄວ້ *