ຍ້ອງຍໍຜູ້ທີ່ສ້າງເງື່ອນໄຂໃຫ້ ສປປ ລາວ ອອກຈາກບັນຊີສີເທົາ

ລັດ­ຖະ­ບານ​ລາວ ຈັດ​ພິ­ທີ​ຍ້ອງ­ຍໍ​ກົມ​ກອງ ແລະ ບຸກ­ຄົນ​ຜູ້​ທີ່​ມີ​ຜົນ­ງານ ປະ­ກອບ­ສ່ວນ​ໃນ​ການ​ສ້າງ​ເງື່ອນໄຂ​ໃຫ້ ສປປ ລາວ ອອກ​ຈາກ​ບັນ­ຊີ​ສີ​ເທົາ ກໍ​ຄື ການ­ຈັດ­ຕັ້ງ​ປະ­ຕິ­ບັດ​ວຽກ​ງານ​ຕ້ານ​ການ​ຟອກ​ເງິນ ແລະ ການ​ສະ­ໜອງ​ທຶນ​ໃຫ້­ການ​ກໍ່​ການ​ຮ້າຍ ເພື່ອ​ອອກ​ຈາກ​ບັນ­ຊີ​ສີ​ເທົາ​ຂອງ​ອົງ­ການ​ຕ້ານ​ການ​ຟອກ​ເງິນ​ສາ­ກົນ ປີ 2017 ຈຳ­ນວນ 129 ຄົນ ທີ່​ມາ​ຈາກ​ສູນ​ກາງ ແລະ ທ້ອງ­ຖິ່ນ ຂຶ້ນ​ວັນ​ທີ 1 ຕຸ­ລາ 2019 ຢູ່​ກະ­ຊວງ​ການ​ເງິນ ເຊິ່ງ​ມອບ​ໂດຍ​ທ່ານ ສົມ​ດີ ດວງ​ດີ ຮອງ​ນາ­ຍົກ­ລັດ­ຖະ­ມົນ­ຕີ ລັດ­ຖະ­ມົນ­ຕີ​ກະ­ຊວງ​ການ​ເງິນ ປະ ທານ​ຄະ­ນະ​ກຳ­ມະ­ການ​ແຫ່ງ​ຊາດ ເພື່ອ​ຕ້ານ​ການ​ຟອກ​ເງິນ ແລະ ການ​ສະ­ໜອງ​ທຶນ​ໃຫ້­ການ​ກໍ່​ການ​ຮ້າຍ (ຄຕຟງ).

ໄລ­ຍະ​ຜ່ານ​ມາ​ລັດ­ຖະ­ບານ ແລະ ປະ­ຊາ­ຊົນ​ລາວ ໄດ້​ພະ­ຍາ­ຍາມ​ຢ່າງ​ຕັ້ງ­ໜ້າ​ປະ­ຕິ­ບັດ​ເງື່ອນ­ໄຂ​ຕ່າງໆ​ທີ່​ສາ­ກົນ​ວາງ​ໄວ້ ໂດຍ​ສະ­ເພາະ ວຽກ​ງານ​ຕ້ານ​ການ​ຟອກ​ເງິນ ແລະ ການ​ສະ­ໜອງ​ທຶນ​ໃຫ້­ການ​ກໍ່​ການ​ຮ້າຍ ເຊິ່ງ​ມີ​ຄວາມ​ຄືບ​ໜ້າ​ເປັນ​ກ້າວໆ ສປປ ລາວ ໄດ້​ຖືກ​ຖອນ​ອອກ​ຈາກ​ບັນ­ຊີ​ຕິດ­ຕາມ (ບັນ­ຊີ​ສີ​ເທົາ) ຂອງ​ອົງ ການ​ຕ້ານ​ການ​ຟອກ​ເງິນ​ສາ­ກົນ ມາ​ຢູ່​ບັນ­ຊີ​ປົກ­ກະ­ຕິ ໃນ​ກອງ​ປະ­ຊຸມ​ຄົບ​ຄະ­ນະ (FATF Plenary meeting) ປະ­ຈຳ​ເດືອນ​ມິ­ຖຸ­ນາ 2017 ຢູ່​ປະ­ເທດ​ແອັດ​ສະ​ປາຍ ເວ­ລາ​ຕໍ່​ມາ​ໄດ້​ຈັດ​ກອງ​ປະ­ຊຸມ​ສະ­ໄໝ​ສາ­ມັນ ຄັ້ງ​ທີ II ປະ­ຈຳ​ປີ 2019 ຂອງ ຄຕຟງ ໂດຍ​ເປັນ​ປະ­ທານ​ຂອງ​ທ່ານ ສົມ​ດີ ດວງ​ດີ ປະ­ທານ ຄຕຟງ ມີ​ສະ­ມາ­ຊິກ ຄຕຟງ ແລະ ກະ­ຊວງ​ກ່ຽວ­ຂ້ອງ​ເຂົ້າ​ຮ່ວມ ເຊິ່ງ​ກອງ​ປະ­ຊຸມ​ໄດ້​ປຶກ­ສາ​ຫາ­ລື​ຫຼາຍ​ບັນ­ຫາ​ທີ່​ມີ​ຄວາມ​ສຳ­ຄັນ ຕິດ​ພັນ​ກັບ​ວຽກ​ງານ​ຕ້ານ​ການ​ຟອກ​ເງິນ ແລະ ສະ­ໜອງ​ທຶນ​ໃຫ້​ແກ່​ການ​ກໍ່​ການ​ຮ້າຍ​ຂອງ​ລາວ ໂດຍ​ສະ­ເພາະ ການ​ກຽມ​ຄວາມ​ພ້ອມ​ໃນ​ການ​ປະ​ເມີນ​ຮອບ­ດ້ານ​ຂອງ​ລາວ ປີ 2020-2021.

ກອງ​ປະ­ຊຸມ​ໄດ້​ຜ່ານ​ແຜນ​ວຽກ​ກະ­ກຽມ​ຄວາມ​ພ້ອມ ການ​ປະ​ເມີນ​ຮອບ­ດ້ານ​ວຽກ​ງານ​ຕ້ານ​ການ​ຟອກ​ເງິນ ແລະ ສະ­ໜອງ​ທຶນ​ໃຫ້­ການ​ກໍ່​ການ​ຮ້າຍ​ຂອງ​ລາວ ໂດຍ​ສຸມ​ໃສ່​ດ້ານ​ນິ­ຕິ​ກຳ​ທີ່​ຍັງ​ບໍ່​ທັນ​ໄດ້​ຕາມ​ມາດ​ຕະ ຖານ​ສາ­ກົນ ປັບ­ປຸງ​ບັນ­ດາ​ກົນ​ໄກ​ໃຫ້​ສອດ­ຄ່ອງ ພ້ອມ​ນີ້ ຍັງ​ໄດ້​ສຸມ​ໃສ່​ແກ້​ໄຂ​ຈຸດ​ຄົງ​ຄ້າງ​ບັນ­ດາ​ຂະ­ແໜງ ການ​ທີ່​ມີ​ຄວາມ​ສ່ຽງ​ຕໍ່​ການ​ຟອກ​ເງິນ ແລະ ການ​ສະ­ໜອງ​ທຶນ​ໃຫ້­ການ​ກໍ່​ການ​ຮ້າຍ ເພື່ອ​ຈັດ​ຕັ້ງ​ປະ­ຕິ­ບັດ​ມາດ​ຕະ­ການ​ປ້ອງ​ກັນ ແລະ ແກ້​ໄຂ ເພື່ອ​ຮອງ​ຮັບ​ການ​ປະ​ເມີນ​ຈາກ​ກຸ່ມ​ອາ­ຊີ​ປາ​ຊີ​ຟິກ ເພື່ອ​ຕ້ານ​ການ​ຟອກ​ເງິນ ແລະ ການ​ສະ­ໜອງ​ທຶນ​ໃຫ້­ການ​ກໍ່​ການ​ຮ້າຍ ໃນ​ເດືອນ​ມີ­ນາ 2020-ກໍ­ລະ­ກົດ 2021 ນອກ​ນີ້ ຍັງ​ໄດ້​ຊຸກ­ຍູ້​ໃຫ້​ທຸກ​ພາກ­ສ່ວນ​ກ່ຽວ­ຂ້ອງ ເອົາ­ໃຈ­ໃສ່​ຈັດ​ຕັ້ງ​ປະ­ຕິ­ບັດ​ຕາມ​ພາ­ລະ​ບົດ­ບາດ​ຂອງ​ຕົນ ໃນ​ວຽກ​ງານ​ຕ້ານ​ການ​ຟອກ​ເງິນ ແລະ ສະ­ໜອງ​ທຶນ​ໃຫ້­ການ​ກໍ່​ການ​ຮ້າຍ​ໃຫ້​ສຳ­ເລັດ​ຕາມ​ແຜນ ແລະ ຄາດ­ໝາຍ​ທີ່​ວາງ​ໄວ້.

ຕອບກັບ

ເມວຂອງທ່ານຈະບໍ່ຖືກເຜີຍແຜ່ໃຫ້ໃຜຮູ້ ບ່ອນທີ່ຕ້ອງການແມ່ນຖືກຫມາຍໄວ້ *