ທ່ານຮອງນາຍົກລັດຖະມົນຕີ ຊີ້ນຳວຽກງານຟື້ນຟູຫຼັງງນ້ຳຖ້ວມຢູ່ແຂວງຄຳມ່ວນ

ທ່ານ ສອນ​ໄຊ ສີ​ພັນ​ດອນ ຮອງ​ນາ­ຍົກ­ລັດ­ຖະ­ມົນ­ຕີ ພ້ອມ​ຄະ­ນະ ລົງ​ຢ້ຽມ­ຢາມ ແລະ ເຮັດ​ວຽກ​ຢູ່​ແຂວງ​ຄຳ​ມ່ວນ ໂດຍ​ໄດ້​ຮັບ​ການ​ຕ້ອນ­ຮັບ​ຈາກ​ທ່ານ ສົມ​ໃຈ ເພັດ​ສີ​ນວນ ຮອງ​ເຈົ້າ­ແຂວງ​ຄຳ​ມ່ວນ ພ້ອມ​ດ້ວຍ​ຄະ­ນະ​ນຳ​ຂອງ​ແຂວງ ແລະ ຂະ­ແໜງ ການ​ກ່ຽວ­ຂ້ອງ.

ທ່ານ ສົມ​ໃຈ ເພັດ​ສີ​ນວນ ກ່າວ​ວ່າ: ປີ 2019 ໄດ້​ອະ­ນຸ­ມັດ​ໂຄງ­ການ​ລົງ­ທຶນ​ຂອງ​ລັດ 341 ໂຄງ­ການ ມູນ​ຄ່າ 113 ຕື້​ກວ່າ​ກີບ ເຊິ່ງ​ໃນ 9 ເດືອນ​ຜ່ານ​ມາ ສາ­ມາດ​ປະ­ຕິ­ບັດ​ໄດ້ 265 ໂຄງ­ການ ມູນ​ຄ່າ 79 ຕື້​ກີບ ເທົ່າ​ກັບ 70% ປຸກ­ລະ­ດົມ​ນັກ​ລົງ­ທຶນ​ພາຍ​ໃນ ແລະ ຕ່າງ­ປະ­ເທດ​ເຂົ້າ​ມາ​ລົງ­ທຶນ​ໃນ​ກິດ­ຈະ­ການ​ຕ່າງໆ 20 ໂຄງ­ການ ມີ​ທຶນ 27 ຕື້​ໂດ​ລາ​ສະ­ຫະ­ລັດ ຫຼື ປະ­ມານ 237.221 ຕື້​ກີບ ທຶນ​ຈົດ​ທະ­ບຽນ​ເກືອບ 19 ຕື້​ໂດ​ລາ​ສະ­ຫະ­ລັດ ຫຼື ປະ­ມານ 166.927 ຕື້​ກີບ ນອກ​ນີ້ ຂົງ­ເຂດ​ວຽກ​ງານ​ອື່ນໆ​ກໍ​ໄດ້​ຮັບ​ການ​ພັດ­ທະ­ນາ ແລະ ມີ​ຜົນ­ສຳ­ເລັດ​ໃນ​ຫຼາຍ​ດ້ານ ໄພ​ນ້ຳ​ຖ້ວມ​ໄລ­ຍະ​ຕົ້ນ​ເດືອນ​ສິງ­ຫາ-ຕົ້ນ​ເດືອນ​ກັນ­ຍາ ຜ່ານ​ມາ ໄດ້​ສ້າງ​ຜົນ​ເສຍ​ຫາຍ​ໃຫ້ 6 ເມືອງ ຄື: ບົວ­ລະ­ພາ ຍົມ​ມະ​ລາດ ໄຊ​ບົວ­ທອງ ມະ­ຫາ​ໄຊ ແລະ ໜອງ​ບົກ ກວມ​ເອົາ 231 ບ້ານ 16.600 ກວ່າ​ຄອບ­ຄົວ 68.800 ກວ່າ​ຄົນ ໄດ້​ຮັບ​ຜົນ​ກະ­ທົບ ເນື້ອ­ທີ່​ນາ­ປີ​ຖືກ​ນ້ຳ​ຖ້ວມ 19.500 ກວ່າ​ເຮັກ­ຕາ ເນື້ອ­ທີ່​ປູກ​ພືດ 900 ກວ່າ​ເຮັກ­ຕາ ສັດ­ລ້ຽງ​ຕາຍ​ເປັນ​ຈຳ­ນວນ​ຫຼາຍ ໜອງ​ປາ 326 ໜອງ ໂຄງ­ການ​ຊົນ­ລະ­ປະ­ທານ​ຖືກ​ນ້ຳ​ຖ້ວມ 52 ຫົວ​ງານ ຄອງ­ເໝືອງ​ຍຸບ 12 ຈຸດ ເສັ້ນ­ທາງ​ຖືກ​ນ້ຳ​ຖ້ວມ 31 ເສັ້ນ ຍາວ 77.600 ກວ່າ​ແມັດ ໂຮງ­ຮຽນ​ຖືກ​ນ້ຳ​ຖ້ວມ 26 ແຫ່ງ ໂຮງ​ໝໍ­ນ້ອຍ 11 ແຫ່ງ ນ້ຳ​ປະ­ປາ 9 ແຫ່ງ ນ້ຳ​ບາ​ດານ 723 ບໍ່ ນ້ຳ­ສ້າງ 119 ບໍ່ ວິດ­ຖ່າຍ 4.900 ກວ່າ​ໜ່ວຍ ລວມ​ມູນ​ຄ່າ​ຜົນ​ເສຍ​ຫາຍ​ທາງ​ພາກ​ລັດ 155 ຕື້​ກີບ ພາກ​ເອ­ກະ​ຊົນ 11,6 ລ້ານ​ໂດ​ລາ​ສະ­ຫະ­ລັດ ຫຼື ປະ­ມານ 109,9 ຕື້​ກີບ.

ທ່ານ ສອນ​ໄຊ ສີ​ພັນ​ດອນ ໄດ້​ຊີ້​ນຳ​ໃຫ້​ຄະ­ນະ​ນຳ​ແຂວງ​ຄຳ​ມ່ວນ ໃຫ້​ສືບ­ຕໍ່​ຊີ້​ນຳ-ນຳ­ພາ​ຈັດ​ຕັ້ງ​ປະ­ຕິ­ບັດ​ວຽກ​ງານ​ຕ່າງໆ​ທຸກ​ຂະ­ແໜງ­ການ​ທີ່​ຍັງ​ບໍ່​ທັນ​ສອດ­ຄ່ອງ ໂດຍ​ສະ­ເພາະ ວຽກ​ງານ ປກຊ-ປກສ ເອົາ­ໃຈ­ໃສ່​ແກ້​ໄຂ​ປາ­ກົດ­ການ​ຫຍໍ້­ທໍ້​ຕ່າງໆ​ທີ່​ເກີດ​ຂຶ້ນ ເປັນ­ຕົ້ນ ບັນ­ຫາ​ຢາ​ເສບ​ຕິດ ຂີ້­ລັກ​ງັດ​ແງະ ລວມ​ທັງ​ອຸ­ບັດ­ເຫດ ແລະ​ອື່ນໆ ສຸມ​ໃສ່​ປະ­ຕິ­ບັດ​ຄຳ​ສັ່ງ​ວ່າ​ດ້ວຍ​ການ​ປະ­ຕິ­ບັດ 8 ມາດ​ຕະ­ການ​ຊຸກ­ຍູ້​ເສດ­ຖະ­ກິດ ການ​ລົງ­ທຶນ​ພາກ​ລັດ ແລະ ເອ­ກະ​ຊົນ​ພາຍ​ໃນ ແລະ ຕ່າງ­ປະ­ເທດ​ໃຫ້​ເຂັ້ມ​ງວດ ຈັດ​ຕັ້ງ​ປະ­ຕິ­ບັດ​ບັນ­ດາ​ໂຄງ­ການ​ຕາມ​ທີ່​ສະ­ພາ​ອະ­ນຸ­ມັດ ຫຼີກ​ລ່ຽງ​ບໍ່​ໃຫ້​ມີ​ໂຄງ­ການ​ນອກ​ແຜນ ແລະ ປະ­ຕິ­ບັດ​ຕາມ​ທິດ​ຂອງ​ລັດ­ຖະ­ບານ​ໃນ​ການ​ກວດ­ກາ​ຄືນ ໂຄງ­ການ​ລົງ­ທຶນ​ຂອງ​ລັດ ສະ­ເພາະ​ໂຄງ­ການ​ນອກ​ແຜນ­ທີ່​ໄດ້​ຈັດ​ຕັ້ງ​ປະ­ຕິ­ບັດ​ຜ່ານ​ມາ​ໃຫ້​ສຳ­ເລັດ ແລະ ໃຫ້​ເປັນ​ຮູບ​ປະ​ທຳ ພ້ອມ​ນີ້ ທ່ານ​ຍັງ​ໄດ້​ເນັ້ນ​ໃຫ້​ສຸມ​ໃສ່​ຊ່ວຍ­ເຫຼືອ​ບັນ­ເທົາ​ທຸກ ຜູ້​ໄດ້​ຮັບ​ຜົນ​ກະ­ທົບ​ຈາກ​ໄພ​ນ້ຳ​ຖ້ວມ​ປັບ­ປຸງ-ຟື້ນ​ຟູ​ພື້ນ­ຖານ​ໂຄງ​ລ່າງ ແລະ ເນື້ອ­ທີ່​ການ​ຜະ­ລິດ​ທີ່​ໄດ້​ຮັບ​ຜົນ​ເສຍ​ຫາຍ​ດ້ານ​ກະ­ສິ­ກຳ​ເປັນ​ຫຼັກ ພ້ອມ​ທັງ​ຕິດ­ຕາມ​ເຝົ້າ​ລະ­ວັງ​ພະ­ຍາດ​ລະ­ບາດ ສຳ­ລັບ​ໂຮງ­ຮຽນ ສຸກ­ສາ­ລາ ຊົນ­ລະ­ປະ­ທານ ຕ້ອງ​ແກ້​ໄຂ​ຢ່າງ​ຮີບ​ດ່ວນ ນອກ​ນີ້ ທ່ານ ສອນ​ໄຊ ສີ​ພັນ​ດອນ ຍັງ​ໄດ້​ມອບ​ເງິນ 100 ລ້ານ​ກີບ ໃຫ້​ແຂວງ​ຄຳ​ມ່ວນ ເພື່ອ​ນຳ­ໄປ​ຊ່ວຍ­ເຫຼືອ​ບັນ­ເທົາ​ທຸກ​ໃຫ້​ຜູ້​ໄດ້​ຮັບ​ຜົນ​ກະ­ທົບ​ຈາກ​ໄພ​ນ້ຳ​ຖ້ວມ.

ຕອບກັບ

ເມວຂອງທ່ານຈະບໍ່ຖືກເຜີຍແຜ່ໃຫ້ໃຜຮູ້ ບ່ອນທີ່ຕ້ອງການແມ່ນຖືກຫມາຍໄວ້ *