ທີມນັກສະແດງ “ພອນຮັກ” ຈາກລາວຮ່ວມເຟຣມ “ຕໍ່-ຝົນ-ເບວ” ຈາກ Hormones the Series ທີ່ເກົາຫຼີໃຕ້

ເປັນພາບທີ່ຫາຊົມໄດ້ຍາກ ແລະ ດົນໆມີຄັ້ງສຳລັບການຮ່ວມເຟຣມຂອງດາລານັກສະແດງຈາກສອງຝັ່ງຂອງ ໂດຍຫຼ້າສຸດເປັນຄິວຂອງທີມນັກສະແດງຈາກຊີຣີລາວຢ່າງ “ພອນຮັກ ເດິ ຊີຣີ” ເຊິ່ງໄດ້ຮ່ວມຖ່າຍພາບກັບນັກສະແດງລະດັບແຖວໜ້າຂອງໄທຢ່າງ ຕໍ່ ທະນະພົບ, ຝົນ ສະນັນທະສັດ ແລະ ເບວ ເຂມມິສະລາ ຈາກຊີຣີໄວລຸ້ນຍອດນິຍົມແຫ່ງຍຸກຢ່າງ Hormones the Series.

ການຖ່າຍພາບຮ່ວມກັນໃນຄັ້ງນີ້ແມ່ນເກີດຂຶ້ນໄດ້ຈາກການເຂົ້າຮ່ວມງານເທດສະການຮູບເງົານານາຊາດປູຊານ 2019 ທີ່ປະເທດເກົາຫຼີໃຕ້ ໂດຍລະຄອນຊີຣີຂອງລາວ ກໍຄື “ພອນຮັກ ເດິ ຊີຣີ” ໄດ້ຖືກຄັດເລືອກໃຫ້ເປັນຕົວແທນປະເທດຮ່ວມຊີງລາງວັນ Asia Content Awards ໃນງານດັ່ງກ່າວ.

ນັກສະແດງ ພອນຮັກ ທັງ 3 ທີ່ຮ່ວມຖ່າຍຮູບກັບທີມນັກສະແດງຈາກໄປ ກໍບໍ່ແມ່ນຄົນອື່ນຄົນໄກ ເປັນນັກສະແດງນຳຂອງເລື່ອງ ປະກອບດ້ວຍ: ອາລິຍາ ສຸທຳມະວົງ (ຮັບບົດ ນາເດຍ), ອານຸສິດ ວິໄລ (ຮັບບົດ ວາໂດ້) ແລະ ສຸລິນດາ ເທບພະວົງສາ (ຮັບບົດ ວາລີນ).

ພ້ອມນີ້ກໍມີ ຜູ້ກຳກັບຄົນດັງຢ່າງ ພອນສະຫວັນ ແສງພະຈັນ ຫຼື ລຸງໜວດ ເດີນທາງຮ່ວມງານດັ່ງກ່າວນຳ. ທັງນີ້ ການປະກາດລາງວັນ Asia Content Awards ມີຊີຣີ 13 ເລື່ອງຈາກ 13 ປະເທດສົ່ງເຂົ້າຊີງລາງວັນ ແລະ ຊີຣີຈາກໄທທີ່ຮ່ວມແຂ່ງຂັນກໍແມ່ນ Hormones the Series ນັ້ນເອງ.

Asia Contents Awards ເປັນງານມອບລາງວັນໃຫ້ແກ່ລະຄອນຊີຣີທາງໂທລະພາບທີ່ໂດດເດັ່ນໃນຂະແໜງການອຸດສາຫະກຳໂທລະພາບທົ່ວທະວີບເອເຊຍ ເຊິ່ງມີຈຸດປະສົງເພື່ອຊ່ວຍຂະຫຍາຍຊ່ອງທາງເຂົ້າສູ່ຕະຫຼາດເນື້ອຫາທີ່ບໍ່ແມ່ນຮູບເງົາ ແລະ ຊີຣີທາງໂທລະພາບ.

ລາງວັນດັ່ງກ່າວນີ້ຈະມອບໃຫ້ແກ່ລະຄອນໂທລະພາບດີເດັ່ນຈາກ 10 ປະເທດອາຊຽນ, ເກົາຫຼີໃຕ້, ຈີນ ແລະ ຍີ່ປຸ່ນ ໂດຍແບ່ງອອກເປັນ 8 ປະເພດຄື: ລາງວັນສ້າງສັນດີເດັ່ນ, ລາງວັນລະຄອນເອເຊຍດີເດັ່ນ, ລາງວັນນັກສະແດງຊາຍດີເດັ່ນ, ລາງວັນນັກສະແດງຍິງດີເດັ່ນ, ລາງວັນນັກຂຽນບົດດີເດັ່ນ, ລາງວັນນັກສະແດງດາວຮຸ່ງດີເດັ່ນ, ລາງວັນນັກສະແດງໜ້າໃໝ່ ແລະ ລາງວັນ Lifetime Achievement.

 

ຂໍ້ມູນຈາກ: ມ່ວນ

ຕອບກັບ

ເມວຂອງທ່ານຈະບໍ່ຖືກເຜີຍແຜ່ໃຫ້ໃຜຮູ້ ບ່ອນທີ່ຕ້ອງການແມ່ນຖືກຫມາຍໄວ້ *