ເພີ່ມທັກສະການຂຽນຂ່າວ ແກ່ສື່ມວນຊົນເພື່ອການພັດທະນາແບບຍືນຍົງ

ໃນວັນທີ 2-4 ຕຸລາ 2019, ​ສູນເຕັກໂນໂລຊີ ຂໍ້ມູນຂ່າວສານ ຊາວໜຸ່ມ-ເຍົາວະຊົນ ແລະ ກົມ​ສື່ມວນ​ຊົນ​ໜຸ່ມ​ລາວ ສູນກາງຊາວໜຸ່ມ ປະຊາຊົນ ປະຕິວັດລາວ ໄດ້ຈັດ​ຊຸດ​ຝຶກ​ອົບ​ຮົມ​ການຂຽນ​ຂ່າວໃນ​ຮູບ​ແບ​ບວິ​ເຄາະ ພາຍ​ໃຕ້​ຫົວ​ຂໍ້ “ການ​ພັດ​ທະ​ນາ​ແບບ​ຍືນ​ຍົງ ຄັ້ງ​ທີ 2” ໂດຍ​ການ​ເປັນ​ປະ​ທານ​ຂອງ​ທ່ານນາງ ບົວໂຮມ ສົມວິຈິດ ຫົວໜ້າກົມສື່ມວນຊົນ ​ສູນ​ກາງ​ຊາວ​ໜຸ່ມ​ປະ​ຊາ​ຊົນ​ປະ​ຕິ​ວັດ​ລາວ, ມີ​ວິ​ທະ​ຍາ​ກອນມາຈາກ ປະເທດອິນໂດເນເຊຍ, ຝຣັ່ງ ແລະ ສຳ​ມະ​ນາ​ກອນ ​ພ້ອມ​ດ້ວຍພະ​ນັກ​ງານ​ຄະ​ນະ​ນຳ​ຂອງ​ສູນ​ກາງ​ຊາວ​ໜຸ່ມ ປະ​ຊາ​ຊົນ ​ປະ​ຕິ​ວັດ​ລາວ ເຂົ້າ​ຮ່ວມ.

ທ່ານນາງ ບົວໂຮມ ສົມວິຈິດ ຊີ້ໃຫ້​ເຫັນ​ວ່າ: ​ການ​ຝຶກ​ອົບ​ຮົມ​ໃນ​ຄັ້ງ​ນີ້ ແມ່ນສືບຕໍ່ຈາກການຝຶກອົບຮົມໃນເດືອນກັນຍາ ຜ່ານມາ ເຊິ່ງເປັນການສືບຕໍ່ບົດຮຽນ ໃນຫົວຂໍ້ເກົ່າທີ່ ສຳ​ມະ​ນາ​ກອນ​ຈະ​ໄດ້​ຮຽ​ນ​ຮູ້​ກ່ຽວ​ກັບ​ວຽກ​ງານ​ການ​ພັດ​ທະ​ນາ​ແບບ​ຍືນ​ຍົງ​, ໄລ​ຍະ​ການ​ປ່ຽນ​ແປງ​ສະ​ພາບ​ພາວ​ະ​ຂອງ​ໂລກ​ພາຍນອກ​ເຊັ່ນ: ດິນ​ຟ້າ​ອາ​ກາດ, ເສດ​ຖະ​ກິດ, ສັງ​ຄົມ, ວັດ​ທະ​ນະ​ທຳ, ​ໄພ​ພິ​ບັດ​ຕ່າງໆ ທີ່ຈະ​ມີ​ຜົນ​ຕໍ່​ການ​ພັດ​ທະ​ນາ​ຂອງ​ປະ​ເທດ​ລາວ​ ເຊິ່ງນັກ​ຂ່າວ​ແຕ່​ລະ​ຄົນ​ຕ້ອງ​ໃຫ້​ ຄວາມ​ສຳ​ຄັນ​ຕໍ່​ເນື້ອ​ຫາ​ດັ່ງ​ກ່າວ​, ທັງຮູ້​ວິ​ທີ​ຂຽນ​ຂ່າວ, ຜະ​ລິດ​ຂ່າວ​ທີ່​ຖືກ​ຕ້ອງ ແລະ ແທດ​ເໝາະ​ກັບ​ສະ​ພາບ​ໃນ​ປັດ​ຈຸ​ບັນ. ພ້ອມນັ້ນ ຈະໄດ້ຍົກລະດັບການລົງເລິກໃນຫົວຂໍ້ດັ່ງກ່າວ ໃຫ້ກວ້າງຂວາງກວ່າເກົ່າ, ມີການລົງພາກສະໜາມປະຕິບັດຕົວຈິງ, ເກັບກໍາຂໍ້ມູນຕ່າງໆ ເພື່ອນໍາໃຊ້ເຂົ້າໃນການຂຽນບົດ, ຂຽນຂ່າວໃຫ້ມີປະສິດທິຜົນ. ເພື່ອ​ແນ​ໃສ່​ຍົກ​ລະ​ດັບ​ຄວາມ​ຮູ້​ຄວາມ​ສາ​ມາດ​ ຂອງ​ບັນ​ດາ​ສື່​ຂ່າວ​ຕ່າງໆ ​ທີ່​ເປັນ​ກະ​ບອກ​ສຽງ​ຂອງ​ສັງ​ຄົມ ​ກໍຄື​ພັກ-ລັດ​ຖະ​ບານ ​ໃຫ້​ມີ​ຄວາມ​ທັນ​ສະ​ໄໝ, ຖືກ​ຕ້ອງ, ຊັດ​ເຈນແລະ ບໍ່​ບິດ​ເບືອນ​ກັບ​ແນວ​ທາງ​ຂອງ​ພັກ-ລັດ.

ທ່ານນາງ ບົວໂຮມ ສົມວິຈິດ ມີຄຳເຫັນຕື່ມອີກວ່າ: ປັດ​ຈຸ​ບັນ​ໃນ​ໂລກ​ສື່​ສັງ​ຄົມ​ອອນ​ລາຍ​ມີ​ຄວາມ​ສຳ​ຄັນຫລາຍ ເຊິ່ງຫລາຍ​ພາກ​ສ່ວນ​ຫັນ​ມາ ​ໃຫ້​ຄວາມ​ສົນ​ໃຈ​ໃນ​ການ​ຂຽນ​ຂ່າວ ​ໃຫ້​ດີ​ຂຶ້ນ​ຕື່ມ​ ເພື່ອ​ໃຫ້​ທັນ​ກັບຍຸກ​ທັນ​ສະ​ໄໝ. ເຖິງວ່າການ​ຂຽນ​ຂ່າວ ​ໃນໄລ​ຍະ​ຜ່ານ​ມາ​ແມ່ນ​ເຮັດ​ໄດ້​ດີ ແຕ່ຍັງ​ມີຫລາຍ​ຈຸດຕ້ອງ​ໄດ້​ປັບ​ປຸງ​ໃຫ້​ດີ​ຂຶ້ນ​ຕື່ມ ​ບໍ່​ວ່າ​ຈະ​ເປັນ​ການ​ຂຽນ​ຂ່າວ ​ໃນ​ຮູບ​ແບບ​ວິ​ເຄາະ ​ທີ່​ມີ​ການ​ນຳ​ເອົາ​ຂໍ້​ມູນ​ທາງ ​ດ້ານ​ວິ​ທະ​ຍາ​ສາດ, ຂໍ້​ມູນ​ທີ່​ມີ​ຄວາມ​ເປັນ​ຈິງ, ການໄຈ້​ແຍກ​ຂ່າວ​ທີ່​ມີ​ຄວາມ​ຖືກ​ຕ້ອງ ກັບຂ່າວ​ທີ່​ບິດ​ເບືອນ, ລວມເຖິງຮູບ​ແບບ​ການ​ຂຽນ​ຂ່າວ​​ໃຫ້​ຖືກ​ໃຈ​ຜູ້​ອ່ານ, ຜູ້​ຟັງ ແລະ ທີ່​ສຳ​ຄັນ​ຂຽນ​ຂ່າວ​ໄປ​ແລ້ວ​ ຈະ​ເຮັດ​ໃຫ້​ຜູ້​ອ່ານ​ສາ​ມາດ​ຮັບ​ຮູ້​ ແລະ ​ມີ​ຄວາມ​ໜ້າ​ເຊື່ອ​, ພ້ອມທັງມີຄວາມສົນໃຈ​ຕິດ​ຕາມ​ສົ່ງ​ຕໍ່​ຄື​ແນວ​ໃດ.

ຕອບກັບ

ເມວຂອງທ່ານຈະບໍ່ຖືກເຜີຍແຜ່ໃຫ້ໃຜຮູ້ ບ່ອນທີ່ຕ້ອງການແມ່ນຖືກຫມາຍໄວ້ *