ອົງການປົກຄອງ ນວ ພິຈາລະນາຫຼາຍບັນຫາພົ້ນເດັ່ນ

ກອງ​ປະ­ຊຸມ​ອົງ­ການ​ປົກ­ຄອງ ນະ­ຄອນ­ຫຼວງ​ວຽງ​ຈັນ (ນວ) ຄັ້ງ​ທີ 26 ຈັດ​ຂຶ້ນ​ວັນ​ທີ 1-2 ຕຸ­ລາ 2019 ຢູ່​ຫ້ອງ​ວ່າ­ການ​ປົກ­ຄອງ ນວ ໂດຍ​ເປັນ​ປະ­ທານ​ຂອງ​ທ່ານ ສິນ​ລະ​ວົງ ຄຸດ​ໄພ­ທູນ ເຈົ້າ​ຄອງ ນວ ມີ​ບັນ­ດາ​ຮອງ​ເຈົ້າ​ຄອງ ຄະ­ນະ​ປະ­ຈຳ​ພັກ ຄະ­ນະ​ພັກ​ຮາກ​ຖານ ເລ­ຂາ​ໜ່ວຍ​ພັກ ຫົວ­ໜ້າ​ພະ­ແນກ­ການ ແລະ ຂະ­ແໜງ­ການ​ກ່ຽວ­ຂ້ອງ​ເຂົ້າ​ຮ່ວມ.

ກອງ​ປະ­ຊຸມ​ຄັ້ງ​ນີ້ ໄດ້​ພິ­ຈາ­ລະ­ນາ ແລະ ໃຫ້​ທິດ​ຊີ້​ນຳ​ກ່ຽວ​ກັບ​ການ​ລົງ​ສຳ​ຫຼວດ​ເຂດ​ສະ­ຫງວນ​ກິດ​ຈະ ການ​ປິ່ນ​ອ້ອມ ເພື່ອ​ບໍ­ລິ­ການ​ໂຄງ­ການ​ທາງ​ດ່ວນ​ວຽງ​ຈັນ ໝາຍ​ເລກ 1 ແຜນ​ພັດ­ທະ­ນາ​ເສດ­ຖະ­ກິດ-ສັງ­ຄົມ ແລະ ແຜນ​ງົບ­ປະ­ມານ ປະ­ຈຳ​ປີ 2020 ຂອງ ນວ ການ​ເບີກ​ຈ່າຍ​ເງິນ​ຊົດ​ເຊີຍ​ທີ່​ດິນ ທີ່​ຖືກ​ຜົນ​ກະ­ທົບ​ຈາກ​ໂຄງ­ການ​ເຂດ​ພັດ­ທະ­ນາ​ກວມ​ລວມ​ໄຊ​ເສດ​ຖາ ການ​ຄຸ້ມ​ຄອງ​ລາ­ຄາ​ສິນ­ຄ້າ ແລະ ຄ່າ​ຄອງ​ຊີບ​ຕາມ​ຕະ ຫຼາດ ເຊິ່ງ​ປະ­ກອບ​ມີ​ບົດ​ສະ­ຫຼຸບ​ວຽກ​ງານ​ຄະ­ນະ​ຄຸ້ມ​ຄອງ​ລາ­ຄາ​ສິນ­ຄ້າ ແລະ ຄ່າ​ບໍ­ລິ­ການ​ຂັ້ນ ນວ 6 ເດືອນ​ຕົ້ນ​ປີ ແລະ ທິດ​ທາງ 6 ເດືອນ​ທ້າຍ​ປີ 2020.

ນອກ​ນີ້ ກອງ​ປະ­ຊຸມ​ຍັງ​ໄດ້​ພິ­ຈາ­ລະ­ນາ ແລະ ໃຫ້​ທິດ​ຊີ້​ນຳ​ກ່ຽວ​ກັບ​ການ​ສະ­ເໜີ​ຂໍ​ນຳ​ໃຊ້​ບໍ­ລິ­ເວນ​ສະ­ຖານ­ທີ່ ແລະ ອາ­ຄານ​ເກົ່າ​ກະ­ຊວງ​ຍຸ­ຕິ​ທຳ ເພື່ອ​ບູ­ລະ­ນະ​ສ້ອມ­ແປງ​ເປັນ​ສະ­ຖານ­ທີ່​ພິ​ພິ​ທະ​ພັນ​ມູນ­ເຊື້ອ​ມໍ­ລະ­ດົກ​ແຄນ​ລາວ ມໍ­ລະ­ດົກ​ໂລກ ແລະ ມໍ­ລະ­ດົກ​ເຄື່ອງ​ດົນ­ຕີ​ພື້ນ­ເມືອງ​ບັນ­ດາ­ເຜົ່າ​ຂອງ​ລາວ ຕິດ​ພັນ​ກັບ​ການ​ພັດ­ທະ­ນາ​ແຫຼ່ງ​ທ່ອງ​ທ່ຽວ ແລະ ບໍ​ລິ​ການ­ທ່ອງ­ທ່ຽວ​ປະ­ຫວັດ­ສາດ ແລະ ວັດ­ທະ­ນະ­ທຳ ສະ­ພາບ​ດິນ​ເຈື່ອນ ເມືອງ​ໄຊ​ທາ­ນີ ການ​ກະ­ກຽມ​ກິດ​ຈະ​ການ­ທ່ອງ­ທ່ຽວ ແລະ ມາດ​ຕະ­ການ​ປ້ອງ​ກັນ ແລະ ຈຳ­ກັດ​ສຽງ​ເນືອງ​ນັນ​ໃນ 3 ເດືອນ​ທ້າຍ​ປີ 2019 ພິ­ຈາ­ລະ­ນາ ແລະ ໃຫ້​ທິດ​ຊີ້​ນຳ​ກ່ຽວ​ກັບ​ປະ­ຊາ­ຊົນ 18 ຄອບ­ຄົວ ຢູ່​ບ້ານ​ໂພນ​ເງິນ ໂພ​ສີ ສະ­ຫວ່າງ ແລະ ບ້ານ​ປ່າ​ຝາງ ເຂດ​ບ້ານ​ຫ້ອມ ທີ່​ສະ­ເໜີ​ຂໍ​ໃຫ້​ຂັ້ນ​ເທິງ​ລົງ​ກວດ­ກາ ແລະ ດັດ­ແກ້​ເນື້ອ­ທີ່​ດິນ​ຄືນ ເຊິ່ງ​ດິນ​ຕັ້ງ​ຢູ່​ບ້ານ​ດອນ​ເກີດ ເມືອງ​ຫາດ​ຊາຍ​ຟອງ ແຜນ​ຮັບ​ຟັງ​ການ​ລາຍ​ງານ ແລະ ໃຫ້​ທິດ​ຊີ້​ນຳ​ກ່ຽວ​ກັບ​ສະ­ພາບ​ພົ້ນ​ເດັ່ນ ປະ­ຈຳ​ເດືອນ​ກັນ­ຍາ 2019 ແລະ ແຜນ​ຈຸດ​ສຸມ​ປະ­ຈຳ​ເດືອນ​ຕຸ­ລາ 2019.

ຕອບກັບ

ເມວຂອງທ່ານຈະບໍ່ຖືກເຜີຍແຜ່ໃຫ້ໃຜຮູ້ ບ່ອນທີ່ຕ້ອງການແມ່ນຖືກຫມາຍໄວ້ *