ສະຫຼອງວັນສະຖາບັນຂົງຈືໂລກ ຄົບຮອບ 15 ປີ

ພິ­ທີ​ສະ­ເຫຼີມ­ສະ­ຫຼອງ​ວັນ​ສະ​ຖາ​ບັນ​ຂົງ​ຈື​ໂລກ ຄົບ­ຮອບ 15 ປີ ຫົວ­ຂໍ້ “ຮັດ​ແໜ້ນ​ສາຍ­ສຳ­ພັນ-ເຊື່ອມ​ຕໍ່​ຄວາມ​ຝັນ” ສະ­ຫຼຸບ​ສົກ­ຮຽນ 2018-2019 ແລະ ເປີດ​ສົກ­ຮຽນ​ໃໝ່ ສົກ​ປີ 2019-2020 ຂອງ​ສະ​ຖາ​ບັນ​ຂົງ​ຈື ຈັດ​ຂຶ້ນ​ວັນ​ທີ 2 ຕຸ­ລາ 2019 ຢູ່​ສະ​ຖາ​ບັນ​ດັ່ງ­ກ່າວ ໂດຍ​ມີ​ທ່ານ ອຸ­ດົມ ພອນ​ຄຳ​ເພັງ ຮອງ​ອະ­ທິ­ການ​ບໍ­ດີ ມະ­ຫາ­ວິ­ທະ­ຍາ­ໄລ​ແຫ່ງ​ຊາດ (ມຊ) ທ່ານ​ນາງ ຍອນ​ວິ­ໄລ ໄຊ​ຍະ​ເລີດ ວ່າ­ການ​ຜູ້­ອຳ­ນວຍ­ການ​ສະ​ຖາ​ບັນ​ຂົງ​ຈື​ຝ່າຍ​ລາວ ພ້ອມ​ດ້ວຍ​ຄູ-ອາ­ຈານ ແລະ ນັກ​ສຶກ​ສາ​ເຂົ້າ​ຮ່ວມ.

ການ​ສະ­ເຫຼີມ­ສະ­ຫຼອງ​ສະ​ຖາ​ບັນ​ຂົງ​ຈື​ໃນ​ປີ​ນີ້ ສູນ​ໃຫຍ່​ຂອງ​ສະ​ຖາ​ບັນ​ຢູ່​ນະ­ຄອນ­ຫຼວງ​ປັກ​ກິ່ງ ສປ ຈີນ ກໍ​ຄື ໃນ​ທົ່ວ​ໂລກ ໄດ້​ພ້ອມ​ກັນ​ຈັດ​ກິດ­ຈະ­ກຳ​ການ​ຮຽນ​ຮູ້ ເຜີຍ­ແຜ່​ບົດ​ຄວາມ​ກ່ຽວ​ກັບ​ກາ­ນວາງ­ສະ­ແດງ​ປື້ມ​ຕຳ­ລາ ການ​ຮຽນ​ຮູ້​ວັດ­ທະ­ນະ­ທຳ ສະ­ແດງ​ສິ­ລະ​ປະ ແລະ ກິດ­ຈະ­ກຳ​ອື່ນໆ ເພື່ອ​ສ້າງ​ຂະ​ບວນ​ການ​ໃຫ້​ມີ​ຄວາມ​ໝາຍ​ສຳ­ຄັນ ໃນ​ໂອ­ກາດ​ວັນ­ຊາດ ສປ ຈີນ ຄົບ­ຮອບ 70 ປີ.

ສົກ​ປີ 2018-2019 ສະ​ຖາ​ບັນ​ຂົງ​ຈື ມຊ ໄດ້​ເອົາ­ໃຈ­ໃສ່​ຊີ້​ນຳ-ນຳ­ພາ​ຢ່າງ​ໃກ້­ຊິດ ເພື່ອ​ປະ­ຕິ­ບັດ​ຫຼັກ­ສູດ​ການ​ຮຽນ-ການ​ສອນ ໃຫ້​ໄດ້​ຕາມ​ຄາດ­ໝາຍ​ຮັບ­ປະ­ກັນ​ດ້ານ​ຄຸນ​ນະ​ພາບ ໂດຍ​ເນັ້ນ​ໃສ່​ການ​ປັບ­ປຸງ​ຫຼັກ­ສູດ​ໃຫ້​ແທດ­ເໝາະ​ກັບ​ຄວາມ​ຕ້ອງ­ການ​ຂອງ​ສັງ­ຄົມ ແລະ ສົກ­ຮຽນ​ນີ້​ໄດ້​ຮັບ​ນັກ​ສຶກ​ສາ 3.535 ຄົນ ນອກ­ຈາກ​ເຝີກ​ອົບ­ຮົມ​ພາ­ສາ​ຈີນ​ຢູ່​ສະ​ຖາ​ບັນ ຍັງ​ໄດ້​ສ້າງ​ຫ້ອງ​ຮຽນ​ຂົງ​ຈື ຢູ່​ໂຮງ­ຮຽນ​ມັດ­ທະ­ຍົມ ຄື: ມສ ສາ­ທິດ ມສ ວຽງ​ຈັນ ມສ ຊົນ­ເຜົ່າ​ວັງ​ວຽງ ສະ​ຖາ​ບັນ​ການ­ເມືອງ ແລະ ການ​ປົກ­ຄອງ​ແຫ່ງ​ຊາດ ແລະ ຫ້ອງ​ວ່າ­ການ​ປົກ­ຄອງ​ນະ­ຄອນ­ຫຼວງ ມີ​ນັກ­ຮຽນ 1.463 ຄົນ ເປັນ​ສູນ​ບຳ­ລຸງ​ພາ­ສາ​ຈີນ​ໃຫ້​ໂຮງ­ຮຽນ​ມັດ­ທະ­ຍົມ ມີ​ຜູ້​ເຂົ້າ​ຮ່ວມ 54 ຄົນ ຊອກ​ແຫຼ່ງ​ທຶນ​ໃຫ້​ຄູ​ສອນ​ໄປ​ເຝີກ​ອົບ­ຮົມ​ຢູ່​ຈີນ 22 ຄົນ ຜູ້​ດ້ອຍ​ໂອ­ກາດ​ແຕ່​ຮຽນ​ດີ-ຮຽນ​ເກ່ງ 141 ຄົນ ແລະ ເປັນ​ສູນ​ສອບ­ເສັງ​ທຽບ​ລະ­ດັບ​ພາ­ສາ​ຈີນ ມີ​ນັກ­ຮຽນ​ເຂົ້າ​ຮ່ວມ 2.376 ຄົນ.

ຕອບກັບ

ເມວຂອງທ່ານຈະບໍ່ຖືກເຜີຍແຜ່ໃຫ້ໃຜຮູ້ ບ່ອນທີ່ຕ້ອງການແມ່ນຖືກຫມາຍໄວ້ *