ຈັບ ຜົວ-ເມຍ ຄາລົດຣີໂວ້ ພ້ອມຢາບ້າ 7.000 ກວ່າເມັດ

ກອງບັນຊາການ ປກສ ເມືອງທ່າປາງທອງ ແຂວງສະຫວັນນະເຂດ ໄດ້ນຳກຳລັງເຈົ້າໜ້າທີ່ວິຊາສະເພາະຕິດຕາມ ຈັບ ຜົວ-ເມຍ ທີ່ເປັນເປົ້າໝາຍຄ້າຂາຍຢາເສບຕິດໄດ້ຄາລົດກະບະຣີໂວ້ ສີຂາວ ທະບຽນ ກຄ 8752 ສະຫວັນນະເຂດ ຢູ່ເສັ້ນທາງເຂດບ້ານພູຜາງນາງ ເມືອງທ່າປາງທອງ ແລະ ກວດຄົ້ນລົດພົບຢາບ້າ 2.500 ເມັດ ໃນວັນທີ 16 ກັນຍາ 2019. ຈາກນັ້ນ, ເຂົ້າກວດຄົ້ນເຮືອນຂອງພວກກ່ຽວ ພົບຢາບ້າອີກ 2.800 ເມັດ ລວມຢາບ້າທັງໝົດ 7.812 ເມັດ.

ເຈົ້າໜ້າທີ່ ປກສ ເມືອງທ່າປາງທອງ ໃຫ້ຮູ້ວ່າ: ຜູ້ຖືກຫາຊື່ ທ້າວ ຈ່ອຍ ອາຍຸ 36 ປີ ແລະ ນາງ ເພັດ (ຜົວເມຍ) ທັງ ສອງຢູ່ບ້ານ ຄໍາແສນໄຊ ເມືອງໄຊພູທອງ ແຂວງສະຫວັນນະເຂດ ພວກກ່ຽວຮັບສາລະພາບວ່າ: ຜ່ານມາພວກກ່ຽວເຄີຍເຄື່ອນໄຫວຊື້ ແລະ ຄ້າຂາຍຢາເສບຕິດມາແລ້ວຫຼາຍຄັ້ງ ໂດຍຊື້ຢາບ້ານຳຄົນຮູ້ຈັກທີ່ຢູ່ໃນເມືອງໄຊພູທອງ.

ຄັ້ງທີ 1 ຊື້ຈໍານວນ 1 ມັດ ເທົ່າກັບ 6.000 ເມັດ ແລ້ວເອົາໄປຂາຍຢູ່ບ້ານພູຜານາງ ເມືອງທ່າປາງທອງ; ຄັ້ງທີ 2 ໄປຊື້ຈໍານວນ 3 ມັດແລ້ວເອົາໄປຂາຍຢູ່ຫຼັກ 35 ເມືອງໄຊພູທອງ; ຕໍ່ມາໃນວັນທີ 14 ກັນຍາ 2019, ໄດ້ຊື້ຢາບ້າຈໍານວນ 4 ມັດ ແລ້ວ ໄປຂາຍໃຫ້ຄົນຮູ້ຈັກຢູ່ບ້ານພູຜານາງ. ຈາກນັ້ນ, ໃນວັນທີ 16 ກັນຍາ 2019 ພວກກ່ຽວ ກໍໄດ້ເອົາຢາບ້າຈໍານວນ 1 ມັດ ເທົ່າກັບ 2.000 ເມັດ ກັບ 5 ຖົງ ໃສ່ລົດກະບະຣີໂວ້ ສີຂາວ ໄປສົ່ງໃຫ້ຜູ້ ສັ່ງຊື້ຢູ່ບ້ານພູຜາງນາງ ເມືອງທ່າປາງທອງ ແຂວງສະຫວັນນະເຂດ.

ແຕ່ຍັງບໍ່ທັນໄປຮອດ ຖືກເຈົ້າໜ້າທີ່ຕຳຫຼວດ ປກສ ເມືອງທ່າປາງທອງ ກັກຕົວໄປດຳເນີນຄະດີ.

 

ແຫຼ່ງຂ່າວ: ຄວາມສະຫງົບລາຍວັນ

 

ຕອບກັບ

ເມວຂອງທ່ານຈະບໍ່ຖືກເຜີຍແຜ່ໃຫ້ໃຜຮູ້ ບ່ອນທີ່ຕ້ອງການແມ່ນຖືກຫມາຍໄວ້ *