ໄຊທານີ ຮັບຮອງເອົາ 2 ບ້ານ ເປັນບ້ານວັດທະນະທຳ

ພິ­ທີ​ປະ­ກາດ​ບ້ານ​ຫ້ວຍ​ເຕີຍ ແລະ ບ້ານ​ຫ້ວຍ​ແດນ​ເມືອງ ເປັນ​ບ້ານ​ວັດ­ທະ­ນະ­ທຳ ແຫ່ງ​ທີ 88 ແລະ 89 ຂອງ​ເມືອງ​ໄຊ​ທາ­ນີ ເປັນ​ແຫ່ງ​ທີ 364 ແລະ 465 ຂອງ​ນະ­ຄອນ­ຫຼວງ​ວຽງ​ຈັນ (ນວ) ຈັດ​ຂຶ້ນ​ວັນ​ທີ 27 ກັນ­ຍາ 2019 ທີ່​ວັດ​ບ້ານ​ຫ້ວຍ​ເຕີຍ ມີ​ທ່ານ ຄຳ​ປະ­ດິດ ເຂັມ​ມາ­ນິດ ເຈົ້າ­ເມືອງ​ໄຊ​ທາ­ນີ ທ່ານ​ນາງ ວິ­ໄລ​ວອນ ຈັນ­ທະ​ລາ­ຕີ ຫົວ­ໜ້າ​ພະ​ແນກ​ຖະ ແຫຼງ​ຂ່າວ ວັດ­ທະ­ນະ­ທຳ ແລະ ທ່ອງ​ທ່ຽວ ນວ ຫົວ­ໜ້າ​ຂະ­ແໜງ ຫົວ­ໜ້າ​ຫ້ອງ­ການ​ກ່ຽວ­ຂ້ອງ ອຳ­ນາດ​ການ​ປົກ­ຄອງ​ບ້ານ​ອ້ອມ​ຂ້າງ ແລະ ປະ­ຊາ­ຊົນ​ເຂົ້າ​ຮ່ວມ.

ກຸ່ມ​ດົງ​ໂດກ ປະ­ກອບ​ມີ 8 ບ້ານ ແລະ ໃນ​ຜ່ານ​ມາ​ໄດ້​ປະ­ກາດ​ເປັນ​ບ້ານ​ວັດ­ທະ­ນະ­ທຳ​ແລ້ວ 6 ບ້ານ ຄື: ບ້ານ​ດົງ​ໂດກ ສະ­ພັງ​ເມິກ ໂນນ​ແສງ​ຈັນ ນາ​ທົ່ມ ວຽງ​ແກ້ວ ໜອງ​ວຽງ​ຄຳ ສ່ວນ​ອີກ 2 ບ້ານ​ທີ່​ຍັງ​ມີ​ບ້ານ​ຫ້ວຍ​ເຕີຍ ແລະ ບ້ານ​ຫ້ວຍ​ແດນ​ເມືອງ ເຊິ່ງ​ຜ່ານ​ການ​ລົງ​ຕິດ­ຕາມ​ກວດ­ກາ​ປະ​ເມີນ​ຜົນ​ເຫັນ​ວ່າ ທັງ 2 ບ້ານ​ມີ​ມາດ­ຖານ​ເງື່ອນ­ໄຂ​ຄົບ​ຖ້ວນ ທີ່​ຈະ​ສ້າງ​ເປັນ​ບ້ານ​ວັດ­ທະ­ນະ­ທຳ ເປັນ­ຕົ້ນ ຈຸດ​ພິ­ເສດ​ທາງ​ດ້ານ​ທີ່​ຕັ້ງ​ພູມ­ລຳ­ເນົາ ມີ​ຄວາມ​ສະ­ດວກ​ໃນ​ການ​ຕິດ­ຕໍ່​ພົວ­ພັນ​ສັງ­ຄົມ​ຕ່າງໆ ເຊັ່ນ: ການ​ຄ້າ­ຂາຍ ການ​ບໍ­ລິ­ການ ເສັ້ນ­ທາງ​ຄົມ­ມະ­ນາ­ຄົມ​ໄປ­ມາ­ຫາ­ສູ່​ສະ­ດວກ​ສະ­ບາຍ ມີ​ວັດ​ວາ​ອາ​ຮາມ​ເປັນ​ທີ່​ສັກ­ກາ­ລະ​ບູ­ຊາ​ຂອງ​ຄົນ​ພາຍ​ໃນ ແລະ ຕ່າງ­ປະ­ເທດ.

ໂຄງ­ການ​ສ້າງ​ຄອບ­ຄົວ ແລະ ບ້ານ​ວັດ­ທະ­ນະ­ທຳ​ຢູ່​ສອງ​ບ້ານ ໄດ້​ເລີ່ມ​ປະ­ຕິ­ບັດ​ປີ 2008-2018 ອີງ­ໃສ່ 5 ມາດ­ຖານ ແລະ 5 ບາດ­ກ້າວ​ທີ່​ກຳ­ນົດ​ໄວ້ ສາ­ມາດ​ຕີ​ລາ­ຄາ​ຜົນ​ໄດ້​ຮັບ​ໃນ​ການ​ປະ­ຕິ­ບັດ​ໂຄງ­ການ​ໄດ້ ຄື: ສອງ​ບ້ານ​ມີ​ທັງ​ໝົດ 697 ຄອບ­ຄົວ ໃນ​ນັ້ນ ມີ​ຄອບ­ຄົວ​ໄດ້​ຮັບ​ໃບ­ຢັ້ງ­ຢືນ​ຄອບ­ຄົວ​ວັດ­ທະ­ນະ­ທຳ 676 ຄອບ­ຄົວ ເທົ່າ​ກັບ 96,98% ໃນ​ນັ້ນ ບ້ານ​ຫ້ວຍ​ເຕີຍ 402 ຄອບ­ຄົວ ໄດ້​ຮັບ​ໃບ­ຢັ້ງ­ຢືນ​ຄອບ­ຄົວ​ວັດ­ທະ­ນະ­ທຳ 392 ຄອບ­ຄົວ ເທົ່າ​ກັບ 97,45% ມອບ 3 ຄັ້ງ ບ້ານ​ຫ້ວຍ​ແດນ​ເມືອງ ມີ 295 ຄອບ­ຄົວ ໄດ້​ຮັບ​ໃບ­ຢັ້ງ­ຢືນ​ຄອບ­ຄົວ​ວັດ­ທະ­ນະ­ທຳ 284 ຄອບ­ຄົວ ເທົ່າ​ກັບ 96,27% ມອບ 3 ຄັ້ງ ຢູ່​ໃນ 2 ບ້ານ​ມີ​ວັດ​ວາ​ອາ​ຮາມ 2 ແຫ່ງ ມີ​ຫ້ອງ­ການ​ບ້ານ ພ້ອມ​ທັງ​ສະ­ໂມ­ສອນ 2 ແຫ່ງ ລະ­ບົບ​ໂທລະ​ໂຄ່ງ 2 ແຫ່ງ ໜ່ວຍ​ສິ­ລະ​ປະ 1 ໜ່ວຍ ປະ­ຊາ­ຊົນ​ໄດ້​ຊົມ­ໃຊ້​ພາ­ຫະ­ນະ​ສື່​ມວນ​ຊົນ​ໂດຍ​ຜ່ານ​ສື່​ໂທລະ­ພາບ ວິ­ທະ­ຍຸ ສິ່ງ​ພິມ ແລະ ວາ­ລະ­ສານ​ຕ່າງໆ ໂດຍ​ອີງ­ໃສ່​ຜົນ­ສຳ­ເລັດ​ໃນ​ການ​ປະ­ຕິ­ບັດ​ຕາມ 5 ມາດ­ຖານ ຂອງ​ບ້ານ​ວັດ­ທະ­ນະ­ທຳ​ເຫັນ​ວ່າ ມີ​ເງື່ອນ­ໄຂ​ເໝາະ​ສົມ​ທີ່​ຈະ​ປະ­ກາດ​ເປັນ​ບ້ານ​ວັດ­ທະ­ນະ­ທຳ​ຕາມ​ທິດ​ຊີ້​ນຳ​ຂອງ​ຂັ້ນ​ເທິ່ງ​ວາງ​ອອກ.

ໃນ​ພິ­ທີ​ໄດ້​ມອບ​ໃບ­ຢັ້ງ­ຢືນ​ໃຫ້​ຄະ­ນະ​ບ້ານ 2 ບ້ານ ພ້ອມ​ທັງ​ໄດ້​ຮັບ​ຟັງ​ໂອ້​ລົມ​ຈາກ​ທ່ານ​ເຈົ້າ­ເມືອງ​ໄຊ​ທາ­ນີ ເພື່ອ​ເປັນ​ທິດ​ຊີ້​ນຳ​ໃຫ້​ຄະ­ນະ​ບ້ານ​ນຳ­ໄປ​ຈັດ​ຕັ້ງ​ປະ­ຕິ­ບັດ​ເຂົ້າ​ໃນ​ວຽກ​ງານ​ດ້ານ​ວັດ­ທະ­ນະ­ທຳ ແລະ ວຽກ​ງານ​ອື່ນໆ​ຢູ່​ພາຍ​ໃນ​ບ້ານ​ຂອງ​ຕົນ​ໃຫ້​ດີ​ຂຶ້ນ ຈາກ​ນັ້ນ ໄດ້​ຮ່ວມ​ເປີດ​ປ້າຍ ປ່ອຍ​ປຸມ​ເປົ້າ ແລະ ລັ່ນ­ຄ້ອງ 9 ບາດ​ເພື່ອ​ເປັນ​ສີ​ລິ​ມຸງ­ຄຸນ.

 

ຕອບກັບ

ເມວຂອງທ່ານຈະບໍ່ຖືກເຜີຍແຜ່ໃຫ້ໃຜຮູ້ ບ່ອນທີ່ຕ້ອງການແມ່ນຖືກຫມາຍໄວ້ *