ປູເປ້ ນັກເທັນນິສເຍົາວະຊົນລາວ ໄດ້ສັງກັດໃໝ່ຢູ່ຝຣັ່ງ

ນາງ ອາ​ລິ​ຍາ ວົງ​ດາ­ລາ (ປູ​ເປ້) ນັກ​ເທັນ​ນິ​ສ​ເຍົາ­ວະ​ຊົນ​ລາວ ອາ­ຍຸ 14 ປີ ທີ່​ຄວ້າ​ແຊັມ 3 ຈາກ 6 ລາຍ­ການ ທີ່​ໄດ້​ເຝິກ­ຊ້ອມ ແລະ ແຂ່ງ­ຂັນ​ຢູ່​ປະ­ເທດ​ຝຣັ່ງ ວັນ​ທີ 18 ສິງ­ຫາ-23 ກັນ­ຍາ 2019 ເຮັດ​ໃຫ້ ປູ​ເປ້ ໄດ້​ສັງ­ກັດ​ໃໝ່​ຢູ່​ສະ­ໂມ­ສອນ Sucy en Brie ປະ­ເທດ​ຝຣັ່ງ ເຊິ່ງ​ເປັນ​ສະ­ໂມ­ສອນ​ທີ່​ສ້າງ​ນັກ​ເທັນ​ນິ​ສ​ຫຼາຍ​ຄົນ​ສູ່​ລະ­ດັບ​ໂລກ ເຊິ່ງ ປູ​ເປ້ ໄດ້​ເຊັນ​ສັນ­ຍາ​ປີ​ຕໍ່​ປີ ແລະ ສາ­ມາດ​ຮັບ​ໃຊ້​ຊາດ.

ທ່ານ ພູ­ເຂົາ​ທອງ ພົມ​ມະ​ວົງ ຜູ້​ປົກ­ຄອງ ທັງ​ເປັນ​ຜູ້​ຈັດ­ການ​ສ່ວນ​ຕົວ​ຂອງ ປູ​ເປ້ ໃຫ້​ຮູ້​ວ່າ​ເມື່ອ​ບໍ່​ດົນ​ມາ​ນີ້: ສັນ­ຍາ​ຄັ້ງ​ນີ້ ສະ­ໂມ­ສອນ Sucy en Brie ຈະ​ຊ່ວຍ­ເຫຼືອ​ຄ່າ​ເດີນ­ທາງ​ໄປ-ກັບ ເພື່ອ​ໃຫ້ ປູ​ເປ້ ຮ່ວມ​ແຂ່ງ­ຂັນ​ລາຍ­ການ​ຕ່າງໆ​ຢູ່​ຝຣັ່ງ ແຕ່​ເດືອນ​ເມ­ສາ-ກໍ­ລະ­ກົດ ແລະ ກໍ­ລະ­ກົດ-ສິງ­ຫາ 2020 ແມ່ນ​ເຂົ້າ​ສູນ​ເຝິກ­ຊ້ອມ​ໄປ​ພ້ອມ​ກັນ ໂດຍ​ມີ​ທ່ານ ໂຈ​ນາ​ທານ ຄູ​ເຝິກ​ສະ­ໂມ­ສອນ​ເປັນ​ຜູ້​ຊ່ວຍ​ແນະ­ນຳ-ເຝິກ­ແອບ​ຕາມ​ຫຼັກ­ສູດ​ນາໆຊາດ ສ່ວນ​ເງິນ​ລາ­ງວັນ​ທີ່​ໄດ້​ຈາກ​ການ​ແຂ່ງ­ຂັນ ສະ­ໂມ­ສອນ​ຈະ​ມອບ​ໃຫ້ ປູ​ເປ້ ທັງ​ໝົດ.

ເປັນ​ໂອ­ກາດ​ດີ​ຂອງ ປູ​ເປ້ ທີ່​ຈະ​ໄດ້​ສືບ­ຕໍ່​ເຝິກ­ຊ້ອມ ແລະ ທົດ​ສອບ​ຄວາມ​ສາ­ມາດ​ລະ­ດັບ​ສູງ​ຂຶ້ນ ເພື່ອ​ສານ​ຝັນ​ສູ່​ອາ­ຊີບ​ໃນ​ອະ­ນາ­ຄົດ ໂດຍ​ສະ­ເພາະ​ການ​ເກັບ​ຄະ­ແນນ​ສະ​ສົມ ຊີງ​ສິດ​ສູ່​ແກຣນ​ສະ​ແລັມ 4 ລາຍ­ການ​ຂອງ​ໂລກ ແລະ ປູ​ທາງ​ສູ່​ການ​ເປັນ​ນັກ​ເທັນ​ນິ​ສ​ອາ­ຊີບ​ຕໍ່​ໄປ.

ປູ​ເປ້ ໄດ້​ໄປ​ເຝິກ­ຊ້ອມ ແລະ ແຂ່ງ­ຂັນ​ຢູ່​ຝຣັ່ງ ວັນ​ທີ 18 ສິງ­ຫາ-23 ກັນ­ຍາ 2019 ສາ­ມາດ​ເຂົ້າ​ເຖິງ​ຮອບ​ຮອງ​ຊະ­ນະ​ເລີດ​ທັງ 6 ລາຍ­ການ ໃນ​ນີ້​ເປັນ​ແຊັມ 3 ລາຍ­ການ ສ້າງ​ຄວາມ​ສົນ­ໃຈ​ໃຫ້​ຫຼາຍ​ສະ­ໂມ­ສອນ​ຢູ່​ຝຣັ່ງ ແລະ ຄວາມ​ພາກ­ພູມ​ໃຈ​ໃຫ້​ປະ­ຊາ­ຊົນ​ລາວ ກັບ​ຄວາມ​ສາ­ມາດ​ແບບ​ສະ­ບັບ​ນ້ອຍ​ພິກ​ຂີ້­ໜູ.

 

 

ຂໍ້ມູນມາຈາກ : ວຽງຈັນໃໝ່

ຕອບກັບ

ເມວຂອງທ່ານຈະບໍ່ຖືກເຜີຍແຜ່ໃຫ້ໃຜຮູ້ ບ່ອນທີ່ຕ້ອງການແມ່ນຖືກຫມາຍໄວ້ *