ພັນລະຍາ ນາຍົກລັດຖະມົນຕີ ຢ້ຽມຢາມຜູ້ປະສົບໄພນໍ້າຖ້ວມ ແຂວງຈຳປາສັກ ແລະ ສາລະວັນ

ທ່ານ ນາງ ນາລີ ສີສຸລິດ ພັນລະຍາທ່ານນາຍົກລັດຖະມົນຕີແຫ່ງ ສປປລາວ ໄດ້ເດີນທາງໄປຢ້ຽມຢາມ, ມອບເຄື່ອງອຸປະໂພກ ແລະ ບໍລິໂພກໃຫ້ແກ່ຊາວບ້ານແຊລະບໍາ ເປັນບ້ານໜຶ່ງທີ່ໄດ້ຮັບຜົນກະທົບຈາກໄພນໍ້າຖ້ວມຢ່າງໜັກໜ່ວງ ຢູ່ທີ່ເມືອງຊະນະສົມບູນ ແຂວງຈຳປາສັກ ໃນວັນທີ 20 ກັນຍາ 2019 ທີ່ຜ່ານມາ.
ຫຼັງຈາກນັ້ນ, ວັນທີ 21 ກັນຍາ 2019, ພັນລະຍາທ່ານນາຍົກລັດຖະມົນຕີແຫ່ງ ສປປລາວ ພ້ອມດ້ວຍຄະນະ ໄດ້ມອບເງິນສົດ ແລະ ເຄື່ອງອຸປະໂພກ-ບໍລິໂພກລວມມູນຄ່າ 130 ລ້ານກວ່າກີບ ທີ່ໄດ້ມາຈາກການປະກອບສ່ວນຂອງຄອບຄົວການນຳ ແລະ ສັງຄົມຜູ້ໃຈບຸນ ໃຫ້ປະຊາຊົນບ້ານຫ້ວຍເຊົາ ບ້ານໜອງແຕ່ງ ແລະ ບ້ານໜອງຫີນ ເມືອງຄົງເຊໂດນ ແຂວງສາລະວັນ.
ໃນໂອກາດລົງມອບເຄື່ອງຊ່ວຍເຫລືອຜູ້ປະສົບໄພນໍ້າຖ້ວມຢູ່ພາກກາງ ແລະ ພາກໃຕ້, ທ່ານ ນາງ ນາລີ ສີສຸລິດ ກໍໄດ້ສະແດງຄວາມເປັນຫ່ວງເປັນໃຍ, ຄວາມເຫັນອົກເຫັນໃຈ ແລະ ກ່າວໃຫ້ກຳລັງໃຈ ຕໍ່ປະຊາຊົນບ້ານຫ້ວຍເຊົາ, ບ້ານໜອງແຕ່ງ ແລະ ບ້ານໜອງຫີນ ເມືອງຄົງເຊໂດນ ແຂວງສາລະວັນ ທີ່ປະສົບໄພພິບັດນໍ້າຖ້ວມໃນຄັ້ງນີ້, ພ້ອມຮຽກຮ້ອງໃຫ້ປະຊາຊົນ ຈົ່ງພ້ອມກັນສູ້ຊົນ, ອົດທົນ, ຮັກສາຄວາມສາມັກຄີ, ຊ່ວຍເຫລືອເຊິ່ງກັນ ແລະ ກັນ, ມີຫຍັງກໍແບ່ງປັນກັນກິນ ໃນຍາມທີ່ຫຍຸ້ງຍາກ ແລະ ລຳບາກແບບນີ້, ສືບຕໍ່ຮັກສາມູນເຊື້ອຄວາມດຸໝັ່ນ ແລະ ຕ້ອງດຸໝັ່ນຫລາຍຂຶ້ນກວ່າເກົ່າຕື່ມອີກ ເພື່ອພ້ອມກັນຜ່ານຜ່າວິກິດຄັ້ງນີ້ໄປໄດ້ດ້ວຍດີ.
ໃນນັ້ນ, ສະພາບຄວາມເສຍຫາຍຈາກໄພນໍ້າຖ້ວມ ເມືອງຊະນະສົມບູນ ແຂວງຈຳປາສັກ: ເມືອງຊະນະສົມບູນ ປະກອບມີ 47 ບ້ານ, ພົນລະເມືອງ 75,644 ຄົນ, ຍິງ 38,241 ຄົນ, ມີແມ່ນໍ້າໄຫລຜ່ານ 02 ສາຍ ຄື ແມ່ນໍ້າຂອງ ແລະ ແມ່ນໍ້າເຊໂດນ; ເນື່ອງຈາກມີສະພາບຝົນຕົກໜັກຕິດຕໍ່ກັນຫຼາຍວັນ ໄດ້ເຮັດໃຫ້ນໍ້າຂອງນໍ້າເຊລົ້ນຝັ່ງ ໄຫຼຖ້ວມເຮືອນຊານບ້ານຊ່ອງ ແລະ ເນື້ອທີ່ການຜະລິດຂອງເມືອງຊະນະສົມບູນ; ແຕ່ວັນທີ 03-08 ກັນຍາ 2019, ລະດັບນໍ້າເຊໂດນ ວັດແທກປົກກະຕິແມ່ນຢູ່ໃນເກນ 10.70 ແມັດ, ແຕ່ຂຶ້ນສູງເຖິງ 14.33 ແມັດ, ເຊິ່ງຖືວ່າເຖິງຂີດອັນຕະລາຍ.
ພາຍໃນເມືອງຊະນະສົມບູນ ຖືກນໍ້າຖ້ວມ 34 ບ້ານ, ໂດຍໄດ້ຮັບຜົນກະທົບຈາກແມ່ນໍ້າເຊໂດນ ມີ 20 ບ້ານ, ຜົນກະທົບຈາກແມ່ນໍ້າຂອງ ມີ 14 ບ້ານ, ລວມມີຄອບຄົວປະຊາຊົນໄດ້ຮັບຜົນກະທົບທັງໝົດ 7,707 ຄອບຄົວ; ໃນນັ້ນບ້ານທີ່ຖືກຍົກຍ້າຍຂຶ້ນສູ່ທີ່ສູງໜີນໍ້າຖ້ວມ ມີຈໍານວນ 16 ບ້ານ, ມີພົນລະເມືອງ 36,951 ຄົນ, ເຮືອນໄດ້ຮັບຄວາມເສຍຫາຍທັງໝົດ 276 ຫຼັງ, ແຍກເປັນເຮືອນສ້ອມແປງຄືນໄດ້ 203 ຫຼັງ, ສ້ອມແປງບໍ່ໄດ້ 53 ຫຼັງ ແລະ ສູນຫາຍ 20 ຫຼັງ; ເນື້ອທີ່ຖືກຜົນກະທົບທັງໝົດ 14,235 ເຮັກຕາ, ໃນນັ້ນເນື້ອທີ່ການຜະລິດ 10,725 ເຮັກຕາ, ເນື້ອທີ່ສວນ 2,153 ເຮັກຕາ, (ເນື້ອທີ່ເສຍຫາຍ 5,786 ເຮັກຕາ).
ນອກຈາກນີ້, ກໍ່ຍັງມີເສັ້ນທາງຖືກກະທົບ 25 ເສັ້ນ (ທາງບ້ານ) ມີຄວາມຍາວທັງໝົດ 84,100 ແມັດ, ເປເພໜັກສັນຈອນລໍາບາກມີ 01 ເສັ້ນ ຍາວ 1,700 ແມັດ (ທາງບ້ານ ໂສໂລ) ແລະ ມີຂົວຂ້າມບ້ານຕໍ່ບ້ານໃຊ້ງານບໍ່ໄດ້ 03 ແຫ່ງ; ໂຮງຮຽນໄດ້ຮັບຜົນກະທົບ 39 ຫຼັງ, ໃນນັ້ນໂຮງຮຽນມັດທະຍົມສົມບູນ 01 ຫຼັງ, ມັດທະຍົມຕອນຕົ້ນ 01 ຫຼັງ, ປະຖົມ 37 ຫຼັງ, ເປເພບໍ່ສາມາດເປີດການຮຽນການສອນໄດ້ 05 ຫຼັງ, ໂຮງຮຽນທີ່ມີໂຕະຕັ່ງສູນຫາຍ 12 ຫຼັງ ລວມມີ 404 ຊຸດ ແລະ ຈໍານວນນັກຮຽນໄດ້ຮັບຜົນກະທົບ 4,248 ຄົນ.

 

ຕອບກັບ

ເມວຂອງທ່ານຈະບໍ່ຖືກເຜີຍແຜ່ໃຫ້ໃຜຮູ້ ບ່ອນທີ່ຕ້ອງການແມ່ນຖືກຫມາຍໄວ້ *