ກຸ່ມບໍລິສັດລົງທຶນ ແລະ ກໍ່ສ້າງແຂວງຢູນນານຫຸ້ນສ່ວນ ຈຳກັດ ມອບເງິນຊ່ວຍເຫລືອຜູ້ປະສົບໄພນໍ້າຖ້ວມ

ໃນວັນທີ 20 ກັນຍາ 2019 ທີ່ ຫ້ອງວ່າການສໍານັກງານ ນາຍົກລັດຖະມົນຕີ, ທ່ານ ເພັດພົມພິພັກ, ລັດຖະມົນຕີ, ຫົວຫນ້າຫ້ອງວ່າການສຳນັກງານນາຍົກລັດຖະມົນຕີ ໄດ້ຕາງຫນ້າລັດຖະບານ ຮັບເງິນຊ່ວຍເຫລືອ ຜູ້ປະສົບໄພນໍ້າຖ້ວມ ຈາກກຸ່ມບໍລິສັດລົງທຶນ ແລະ ກໍ່ສ້າງແຂວງຢູນນານຫຸ້ນສ່ວນຈຳກັດ ທີ່ໄດ້ຮັບຈາກການ ບໍລິຈາກ ຂອງບັນດາບໍລິສັດ ແລະ ພະນັກງານ ຢູ່ເຂດພັດ ທະນາກວມລວມໄຊເສດຖາ ຈຳນວນ 103.132.000 ກີບ, ຊຶ່ງແມ່ນທ່ານ ຫລິວ ຫູ້, ຕາງຫນ້າໃຫ້ກຸ່ມບໍລິສັດດັ່ງກ່າວ ເປັນຜູ້ມອບ, ໂດຍມີພະນັກງານທີ່ກ່ຽວຂ້ອງເຂົ້າຮ່ວມ.
ໃນໂອກາດນີ້, ທ່ານ ເພັດ ພົມພິພັກ ໄດ້ກ່າວສະແດງ ຄວາມຂອບໃຈ ແລະ ຊົມເຊີຍຕໍ່ບໍລິສັດດັ່ງກ່າວ ທີ່ໄດ້ມອບເງິນ ເພື່ອຊ່ວຍເຫລືອຜູ້ປະສົບໄພນໍ້າຖ້ວມ ໃນຄັ້ງນີ້. ເງິນຊ່ວຍເຫລືອດັ່ງກ່າວ ຈະໄດ້ນຳໄປມອບໃຫ້ ກະຊວງ ແຮງງານ ແລະ ສະຫວັດດີການສັງຄົມ ເພື່ອນຳໄປຊ່ວຍເຫລືອ ບັນເທົາທຸກ ແກ່ຜູ້ປະສົບໄພນໍ້າຖ້ວມ ໃນປີນີ້, ຕໍ່ການຊ່ວຍເຫລືອດັ່ງກ່າວ ຈະເປັນກຳລັງໃຈໃຫ້ແກ່ ປະຊາຊົນ ແລະ ປະກອບສ່ວນເຮັດໃຫ້ການແກ້ໄຂໄພພິບັດ ກໍ່ຄືຜົນກະທົບຕໍ່ຊີວິດການເປັນຢູ່ຂອງຜູ້ປະສົບໄພນໍ້າຖ້ວມ ຢູ່ທ້ອງຖິ່ນຕ່າງໆ ສາມາດຜ່ານພົ້ນຄວາມຫຍຸ້ງຍາກ ແລະ ກັບຄືນສູ່ສະພາບປົກກະຕິໂດຍໄວ.

ຕອບກັບ

ເມວຂອງທ່ານຈະບໍ່ຖືກເຜີຍແຜ່ໃຫ້ໃຜຮູ້ ບ່ອນທີ່ຕ້ອງການແມ່ນຖືກຫມາຍໄວ້ *