ຈັບ ເປົ້າໝາຍ 2 ຄົນ ຂາຍຢາບ້າ ແລະ ຢາໄອສ໌ ໄປດຳເນີນຄະດີ

ເຈົ້າໜ້າທີ່ພະແນກຕຳຫຼວດສະກັດກັ້ນ ແລະ ຕ້ານຢາເສບຕິດ ປກສ ແຂວງໄຊຍະບູລີ ໄດ້ເຂົ້າກວດຄົ້ນເຮືອນ ເປົ້າໝາຍ ຄ້າຂາຍຢາເສບຕິດ ຢູ່ບ້ານລ້ອງປໍ ເມືອງໄຊຍະບູລີ ພົບເຫັນຢາບ້າ 400 ກວ່າເມັດ ແລະ ຢາໄອສ໌ 1 ຖົງນ້ອຍ ພ້ອມທັງກັກຕົວຜູ້ມົ້ວສຸມໄດ້ 1 ຄົນ ໃນເວລາ 14:00 ໂມງ ຂອງວັນທີ 5 ກັນຍາ ທີ່ຜ່ານມາ.

ເຈົ້າໜ້າທີ່ ປກສ ແຂວງໄຊຍະບູລີ ໃຫ້ຮູ້ວ່າ: ຜູ້ຖືກຫາ ຊື່ນາງ ມາຊົງ ອາຍຸ 59 ປີ ປະຊາຊົນ ບ້ານລ້ອງປໍ ເມືອງໄຊຍະ ບູລີ ( ເຈົ້າຂອງເຮືອນ ) ແລະ ທ້າວ ຄໍາພຸດ ອາຍຸ 21 ປີ ຄົນບ້ານດຽວກັນ, ເຊິ່ງຜູ້ກ່ຽວທັງສອງຄົນເປັນເປົ້າໝາຍ ຊື້-ຂາຍ ແລະ ເສບຢາເສບຕິດພາຍໃນບ້ານລອງປໍ. ເຈົ້າໜ້າທີ່ຕຳຫຼວດ ໄດ້ຕິດ ຕາມຕົວມາໄລຍະໜຶ່ງແລ້ວ ຈົນມາຮອດວັນທີ 5 ສິງຫາ 2019 ຈຶ່ງສືບຮູ້ວ່າ: ຜູ້ກ່ຽວແມ່ນໄປຮັບເອົາຢາບ້າຂາຍ ແລະ ເສບຢູ່ພາຍໃນເຮືອນ ພ້ອມທັງອໍານວຍຄວາມສະດວກໃຫ້ພວກມົ້ວສຸມເສບຢາບ້າພາຍໃນບ້ານໄດ້ເຂົ້າມົ້ວສຸມນໍາກັນ.

ເວລາ 14:00 ໂມງ ວັນດຽວກັນ, ເຈົ້າໜ້າທີ່ຕຳຫຼວດ ຈຶ່ງເຂົ້າກວດຄົ້ນເຮືອນຜູ້ກ່ຽວ ພົບຂອງກາງຢາບ້າ ຈຳນວນ 484 ເມັດ, ຢາໄອສ໌ 1 ຖົງນ້ອຍ ນໍ້າໜັກ 6 ກຼາມ ອຸປະກອນ ເສບຢາບ້າ 3 ຊຸດ, ເງິນ 14.000.000 ກີບ, ໂທລະສັບ 3 ເຄື່ອງ ແລະ ລົດຈັກ 1 ຄັນ, ໃນຂະນະດຽວກັນກໍໄດ້ກັກຕົວ ທ້າວ ຄໍາພຸດ ອາຍຸ 21 ປີ ຄົນບ້ານດຽວກັນທີ່ກຳລັງໄປຕິດຕໍ່ພົວພັນຊື້ຢາບ້ານໍານາງ ມາ ພົບເຫັນຢາບ້າຈໍານວນ 13 ເມັດ, ໂທລະສັບ 1 ເຄື່ອງ ແລະ ໂມງ ໃສ່ແຂນ 1 ໜ່ວຍ.

ພັທ ປານ ບຸນປອນ ຮອງຫົວໜ້າ ຫ້ອງຕໍາຫຼວດ ປກສ ແຂວງໄຊຍະບູລີ ກ່າວວ່າ: ໃນໄລຍະ 9 ເດືອນຜ່ານມາ, ເຈົ້າໜ້າທີ່ ມ້າງລາຍຄະດີຢາເສບຕິດໃນທົ່ວແຂວງໄດ້ທັງໝົດ 181 ເລື່ອງ, ກັກຕົວຜູ້ຖືກຫາໄດ້ 206 ຄົນ ຍິງ 44 ຄົນ, ຢຶດຂອງກາງຢາເສບຕິດປະເພດຕ່າງໆໄດ້: ຢາບ້າ 160.004 ເມັດ, ຢາຝິ່ນ 3 ຖົງ, ເງິນກີບ 225 ລ້ານກວ່າກີບ, ເງິນບາດ 238. 000 ກວ່າບາດ, ເງິນໂດລາ 1.400 ກວ່າໂດລາ ສາຍຄໍຄໍາ 13 ເສັ້ນ ນໍ້າໜັກ 8 ບາດ, ສາຍແຂນຄໍາ 7 ເສັ້ນ, ນໍ້າໜັກ 7 ບາດ, ລົດຈັກ 56 ຄັນ, ລົດໃຫຍ່ 4 ຄັນ, ໂທລະສັບມືຖື 200 ເຄື່ອງ, ໂມງໃສ່ ແຂນ 25 ໜ່ວຍ, ປືນແກັບ 5 ກະບອກ ແລະ ລູກປືນອາກາ 39 ລູກ.

 

ແຫຼ່ງຂ່າວ: ຄວາມສະຫງົບ

 

 

ຕອບກັບ

ເມວຂອງທ່ານຈະບໍ່ຖືກເຜີຍແຜ່ໃຫ້ໃຜຮູ້ ບ່ອນທີ່ຕ້ອງການແມ່ນຖືກຫມາຍໄວ້ *