ໄຂຂໍ້ສົງໄສ ແມ່ຍິງຖືພາຖ້າເຄັ່ງຕຶງຫຼາຍ ມີຜົນກະທົບຕໍ່ລູກໃນທ້ອງ ຫຼື ບໍ່?

ບັນດາແມ່ໆ​ຮູ້​ບໍ​່ວ່າ​ຄວາມ​ເຄັ່ງຕຶງ ອາດ​ສົ່ງ​ຜົນ​ກະທົບ​ຕໍ່​ລູກ​ນ້ອຍ​ໃນ​ທ້ອງ​ໄດ້. ດັ່ງ​ນັ້ນ ​ແມ່​ຈຶ່ງ​ຄວນ​ພະຍາຍາມ​ຫຼີກ​ລ້ຽງ​ຄວາມ​ເຄັ່ງຕຶງ​ໃຫ້​ໄດ້ຫຼາຍ​ທີ່ສຸດ ຊຶ່ງ​ເຮົາ​ກໍ​ຈະ​ພາ​ໄປ​ເບິ່ງ​ກັນ​ວ່າ​ເມື່ອ​ຄົນຖືພາ​ເຄັ່ງຕຶງຫຼາຍ​ຈະ​ສົ່ງ​ຜົນ​ຕໍ່​ລູກແນວໃດ ແລະ ​ຈະ​ຮັບ​ມື​ດ້ວຍ​ວິທີ​ໃດ​ໄດ້​ແດ່? ຜົນ​ກະທົບ​ຕໍ່​ລູກ​ນ້ອຍ​ໃນ​ທ້ອງ ເມື່ອ​ຄົນຖືພາ​ເຄັ່ງຕຶງຫຼາຍ ຈະ​ມີ​ຜົນ​ກະທົບ​ຕໍ່​ລູກ​ນ້ອຍ​ໃນ​ມົດລູກ​ໄດ້ ດັ່ງ​ນີ້:

1.ສົ່ງ​ຜົນ​ໃຫ້​ລູກ​ມີ​ພັດທະນາ​ການ​ຊ້າ ທັງ​ທາງ​ດ້ານ​ສະໝອງ ​ແລະ ​ການ​ຈະເລີນ​ເຕີບໂຕ ເພາະ​ຄວາມ​ເຄັ່ງຕຶງ​ຈະ​ເຮັດໃຫ້​ລະບົບ​ຕ່າງ​ໆໃນ​ຮ່າງກາຍ ດ້ອຍ​ປະ​ສິດ​ທິ​ພາ​ບລົງ ຈຶ່ງ​ບໍ່​ສາມາດ​ພັດທະນາ​ສະໝອງ​ ແລະ ​ຮ່າງກາຍ​ຂອງ​ລູກ​ໄດ້​ເຕັມ​ທີ່.

2.ລູກ​ອາດ​ມີ​ນ້ຳ​ໜັກ​​ຕອນເກີດ​ໃໝ່ຕ່ຳ​ກວ່າ​ເກນ​ປົກກະຕິ ຊຶ່ງ​ອາດ​ຕ້ອງ​ເຂົ້າ​ຕູ້​ອົບ​ຈົນ​ກວ່າ​ຈະ​ມີ​ນ້ຳ​ໜັກ​ທີ່​ເໝາະ​ສົມ.

3.ສ່ຽງ​ຕໍ່​ການ​ເກີດ​ລູກ​ກ່ອນ​ກຳນົດ​ໄດ້ ຊຶ່ງ​ຈະ​ມີ​ຜົນ​ກະທົບ​ຕາມ​ມາຫຼວງຫຼາຍ.

4.ລູກ​ນ້ອຍ​ອາດ​ມີ​ສະພາ​ບອາລົມ​ທີ່​ບໍ່​ຄົງ​ທີ່ ໂດຍ​ເປັນ​ຜົນ​ມາ​ຈາກ​ການ​ທີ່​ແມ່​ເຄັ່ງຕຶງ​ຂະນະ​ຖືພາ ເຮັດໃຫ້​ຮັບ​ມື​ກັບ​ການ​ລ້ຽງ​ລູກ​ໄດ້​ຍາກ​ພໍ​ສົມຄວນ. ວິທີ​ຮັບ​ມື​ກັບ​ຄວາມ​ເຄັ່ງຕຶງ ສຳລັບ​ວິທີ​ຮັບ​ມື​ກັບ​ຄວາມ​ເຄັ່ງຕຶງ​ຂະນະ​ຖືພາ ກໍ​ສາມາດ​ເຮັດ​ໄດ້​ດັ່ງ​ນີ້:

1.ຟັງ​ເພງ ສຽງ​ເພງ​ ແລະ ​ສຽງ​ດົນຕີ ເປັນ​ຕົວ​ຊ່ວຍ​ຢ່າງ​ດີ​ທີ່​ຈະ​ເຮັດໃຫ້​ເຈົ້າ​ແມ່​ຮູ້ສຶກ​ຜ່ອນ​ຄາຍ ​ແລະ ​ສະບາຍ​ໃຈຫຼາຍ​ຂຶ້ນ ໂດຍ​ໃຫ້​ເລືອກ​ເພງ​ທີ່​ມີ​ຈັງ​ຫວະ​ມ່ວນຊື່ນ, ຟັງ​ແລ້ວ​ເພີດ​ເພີນ​ມາ​ເປີດ​ຟັງ​ກັນ​ເບິ່ງ. ສ່ວນ​ເພງ​ໃດ​ທີ່​ຮູ້ສຶກ​ວ່າຍິ່ງ​ຟັງຍິ່ງ​ເຄັ່ງຕຶງ​ກໍ​ຕັດ​ອອກ​ໄປ​ໄດ້​ເລີຍ.

2.ອ່ານປຶ້ມ ຫາກ​ແມ່​ມັກ​ອ່ານປຶ້ມ​ຈົນ​ເປັນ​ຊີວິດ​ຈິດ​ໃຈ​ຢູ່​ແລ້ວ ການ​ອ່ານປຶ້ມ​ກໍ​ເປັນ​ອີກ​ໜຶ່ງ​ວິທີ​ທີ່​ຈະ​ຫຼຸດຄວາມ​ເຄັ່ງຕຶງ​ລົງ​ໄດ້ ເພາະ​ຂະນະ​ທີ່​ແມ່​ກຳ​ລັງ​ຮູ້ສຶກມີອາລົມຮ່ວມ​ໄປ​ກັບ​ເລື່ອງ​ທີ່​ອ່ານ ກໍ​ຈະ​ລືມ​ເລື່ອງ​ລາວ​ທີ່​ເຮັດໃຫ້​ເຄັ່ງຕຶງ​ໄປ​ຊົ່ວ​ຂະນະ​ໜຶ່ງ​ນັ້ນ​ເອງ.

ບໍ່​ແນ່​ນະ​ຫຼັງ​ອ່ານປຶ້ມ​ສຳເລັດ ເລື່ອງ​ທີ່​ເຄີຍ​ເຄັ່ງຕຶງ​ອາດ​ກາຍ​ເປັນ​ເລື່ອງ​ນ້ອຍ​ໄປ​ເລີຍ.

3.ຫຼິ້ນ​ໂຢ​ຄະ ເຄັ່ງຕຶງຫຼາຍສໍ່າ​ໃດ ການຫຼິ້ນໂຢ​ຄະ​ກໍ​ຈະ​ຊ່ວຍ​ຜ່ອນ​ຄາຍ​ຄວາມ​ເຄັ່ງຕຶງ​ໃຫ້ຫຼຸດ​ນ້ອຍ​ລົງ​ໄປ​ໄດ້​ຢ່າງ​ບໍ່​ໜ້າ​ເຊື່ອ ແຕ່​ຈະ​ຕ້ອງ​ເລືອກ​ທ່າ​ໂຢ​ຄະ​ທີ່​ເໝາະ​ກັບ​ຄົນຖືພາ​ນຳ ເພື່ອ​ຄວາມ​ປອດໄພ ​ແລະ ​ໃຫ້​ໄດ້​ຜົນ​ລັບ​ທີ່​ດີ​ທີ່ສຸດ​ນັ້ນ​ເອງ. ນອກ​ຈາກ​ໂຢ​ຄະ​ແລ້ວ​ ການ​ອອກ​ກຳ​ລັງ​ກາຍ​ ເັຊ່ນ: ​ການ​ເຕັ້ນ​ແອ​ໂຣ​ບິກ ຫຼື ​ເຄື່ອນ​ໄຫວ​ຮ່າງກາຍ​ເບົາ​ໆກໍ​ຊ່ວຍ​ໄດ້​ເຊັ່ນ​ກັນ.

4.ເລົ່າ​ໃຫ້​ໃຜ​ຈັກ​ຄົນ​ຟັງ ບາງເທື່ອ​ການ​ເລົ່າ​ໃຫ້​ໃຜ​ຈັກ​ຄົນ​ຟັງ ກໍ​ຈະ​ຫຼຸດ​ຄວາມ​ເຄັ່ງຕຶງ​ໄດ້​ດີ​ ແລະ ​ເຮັດໃຫ້​ຮູ້ສຶກ​ສະບາຍ​ໃຈ​ຂຶ້ນ​ຫຼາຍ.

ດັ່ງ​ນັ້ນ​ຫາກ​ເຈົ້າ​ກຳ​ລັງ​ຮູ້ສຶກ​ເຄັ່ງຕຶງ​ໜັກຫຼາຍ ລອງ​ເລົ່າ​ໃຫ້​ຜົວ, ເພື່ອນ​ສະໜິດ ຫຼື ​ຄົົນທີ່​ໄວ້​ໃຈ​ຟັງ​ເບິ່ງແລ້ວ​ຈະ​ຈັດການ​ກັບ​ຄວາມ​ເຄັ່ງຕຶງ​ໄດ້​ດີ​ເລີຍ.

ຄວາມ​ເຄັ່ງຕຶງ​ບໍ່​ພຽງ​ແຕ່​ສົ່ງ​ຜົນ​ຕໍ່​ສຸຂະພາບ​ຂອງ​ແມ່​ເທົ່າ​ນັ້ນ ແຕ່​ຍັງ​ສົ່ງ​ຜົນ​ເສຍ​ຕໍ່​ລູກ​ນ້ອຍ​ໃນທ້ອງ​ອີກ​ດ້ວຍ.

ດັ່ງ​ນັ້ນ​​ແມ່​ຈຶ່ງ​ຄວນ​ຮັບ​ມື​ກັບ​ຄວາມ​ເຄັ່ງຕຶງ​ໃຫ້​ດີ ເພື່ອ​ສຸຂະພາບ​ທີ່​ດີ​ຂອງ​ລູກ​ຮັກ​ນັ້ນ​ເອງ.

ນອກ​ຈາກ​ນີ້​ຕ້ອງ​ຄວບ​ຄຸມ​ສະພາ​ບ​ອາລົມ​ຂອງ​ຕົວ​ເອງ​ໃຫ້​ດີ​ດ້ວຍ ເພາະ​ອາລົມ​ຂອງ​ແມ່​ກໍ​ສົ່ງ​ເຖິງ​ລູກ​ໃນ​ທ້ອງໄດ້​ເຊັ່ນ​ກັນ.

 

 

ຕອບກັບ

ເມວຂອງທ່ານຈະບໍ່ຖືກເຜີຍແຜ່ໃຫ້ໃຜຮູ້ ບ່ອນທີ່ຕ້ອງການແມ່ນຖືກຫມາຍໄວ້ *