ສະຖາບັນການເງິນຈຸລະພາກທີ່ຮັບເງິນຝາກ ພັດທະນາອຸດົມໄຊ ເປີດໜ່ວຍບໍລິການ 2 ແຫ່ງ

ສະຖາບັນການເງິນຈຸລະພາກທີ່ຮັບເງິນຝາກ ພັດທະນາອຸດົມໄຊ ( ສພອຊ ) ເຊິ່ງເປັນໜຶ່ງໃນສະຖາບັນການເງິນຢູ່ແຂວງອຸດົມໄຊ ໄດ້ຂະຫຍາຍທຸລະກິດຂອງຕົນຢ່າງຕໍ່ເນື່ອງ.

ຫຼ້າສຸດ, ກໍເປີດໜ່ວຍບໍລິການເພີ່ມຈໍານວນ 2 ແຫ່ງ ຄື: ເມືອງງາ ແລະ ເມືອງຮຸນ ເພື່ອເຮັດໃຫ້ປະຊາຊົນຢູ່ໃນເຂດຫ່າງໄກສອກຫຼີກ ໄດ້ມີໂອກາດເຂົ້າເຖິງແຫຼ່ງທຶນຫຼາຍຂຶ້ນ, ດ້ານຜູ້ອໍານວຍການເປີດເຜີຍໃນອີກ 3 ປີຂ້າງໜ້າ ໜ່ວຍບໍລິການເມືອງງາ ຈະສູ້ຊົນລະດົມເງິນຝາກ ໃຫ້ໄດ້ 20 ກວ່າຕື້ກີບ ແລະ ປ່ອຍສິນເຊື່ອໃຫ້ໄດ້ 40 ກວ່າຕື້ກີບ, ສ່ວນໜ່ວຍບໍລິການເມືອງຮຸນ ລະດົມເງິນຝາກໃຫ້ໄດ້ 35 ຕື້ ແລະ ປ່ອຍສິນເຊື່ອໃຫ້ໄດ້ 75 ຕື້ກີບ.

ທ່ານ ສົມຈິດ ດວງມີໄຊ ຜູ້ອໍານວຍການໃຫຍ່ ສະຖາບັນການເງິນຈຸລະພາກທີ່ຮັບເງິນຝາກ ພັດທະນາອຸດົມໄຊ ກ່າວວ່າ: ສະຖາບັນຂອງພວກເຮົາໄດ້ມາເຄື່ອນໄຫວບໍລິການກັບທີ່ຢູ່ເມືອງງາ ໃນວັນທີ 29/1/2014 ຈົນມາຮອດປີ 2017 ຈຶ່ງໄດ້ຮັບໃບອະນຸຍາດດໍາເນີນທຸລະກິດຈາກທະນາຄານ ແຫ່ງ ສປປ ລາວ ພາກເໜືອແຂວງອຸດົມໄຊ ພາຍຫຼັງທຸລະກິດນັບມື້ດີຂຶ້ນລວມທັງໄດ້ຮັບ ຄວາມໄວ້ວາງໃຈຈາກລູກຄ້າ ພວກເຮົາຈຶ່ງໄດ້ສະເໜີຂໍສ້າງຕັ້ງໜ່ວຍບໍລິການຢູ່ເມືອງງາຢ່າງເປັນທາງການ ແລະ ໄດ້ຈັດພິທີເປີດໜ່ວຍບໍລິການເມືອງງາຢ່າງເປັນທາງການ ໃນວັນທີ 2 ກັນຍາ 2019 ຜ່ານມາ. ໃນນີ້, ພວກເຮົາໄດ້ວາງຄາດໝາຍສູ້ຊົນໃນ 3 ປີຂ້າງໜ້າ ແຕ່ນີ້ຮອດ 2022 ຈະລະດົມເງິນຝາກ ໃຫ້ໄດ້ 20 ກວ່າຕື້ກີບ ແລະ ການປ່ອຍສິນເຊື່ອໃຫ້ແກ່ປະຊາຊົນ, ພະນັກງານ, ທະຫານ – ຕຳຫຼວດ ແລະ ອື່ນໆໃຫ້ໄດ້ 40 ກວ່າຕື້ກີບ. ທ່ານກ່າວຕື່ມວ່າ: ສໍາລັບເມືອງຮຸນແມ່ນໄດ້ມີການເຄື່ອນໄຫວບໍລິການແບບເຖິງທີ່ເຊັ່ນກັນ ນັບແຕ່ປີ 2017 ພາຍຫຼັງທີ່ການດໍາເນີນທຸລະກິດໃຫ້ບໍລິການທາງດ້ານການເງິນດີຂຶ້ນ ຈຶ່ງໄດ້ຂໍອະນຸຍາດເປີດໜ່ວຍບໍລິການ ແລະ ມີພິທີເປີດປ້າຍຢ່າງເປັນທາງການ ໃນວັນທີ 9 ກັນຍາ 2019 ຜ່ານມາ. ໃນນີ້, ພວກເຮົາໄດ້ຕັ້ງເປົ້າໃນ 3 ປີຂ້າງໜ້າ ແຕ່ນີ້ຮອດ 2022 ຈະລະດົມເງິນຝາກໃຫ້ໄດ້ 35 ຕື້ກີບ ແລະ ການປ່ອຍສິນເຊື່ອໃຫ້ໄດ້ 75 ຕື້ກີບ. ຜູ້ອໍານວຍການໃຫຍ່ ສພອຊ ໃຫ້ສໍາພາດຕື່ມວ່າ:

ສະຖາບັນພວກເຮົາໄດ້ຮັບໃບອະນຸຍາດດຳເນີນທຸລະກິດເປັນສະຖາບັນການເງິນທີ່ຮັບເງິນຝາກ ຈາກທະນາຄານ ແຫ່ງ ສປປ ລາວ ພາກເໜືອ ແຂວງອຸດົມໄຊ ເມື່ອວັນທີ 15 ເດືອນ 6 ປີ 2017 ຜ່ານມາ ເຊິ່ງການດໍາເນີນທຸລະກິດກໍເຫັນວ່າມີທ່າກ້າວຂະຫຍາຍຕົວເລື້ອຍໆ ໂດຍສະເພາະແມ່ນການຊ່ວຍເຫຼືອປະຊາຊົນຜູ້ທຸກຍາກ ຫຼື ຢູ່ເຂດຫ່າງໄກສອກຫຼີກໄດ້ມີການເຂົ້າຫາແຫຼ່ງທຶນ ເພື່ອນໍາໄປໝູນໃຊ້ເຂົ້າໃນການຜະລິດເປັນສິນຄ້າ, ປູກຝັງ – ລ້ຽງສັດ ແລະ ອື່ນໆ ຕາມຄວາມອາດສາມາດ ແລະ ເງື່ອນໄຂຂອງແຕ່ລະທ້ອງຖິ່ນ. ປັດຈຸບັນເຮົາມີ 1 ສໍານັກງານໃຫຍ່ ແລະ 2 ໜ່ວຍບໍລິການ ທີ່ຫາກໍເປີດ ຄື: ເມືອງງາ ແລະ ເມືອງຮຸນ, ມີລູກຄ້າທີ່ໃຊ້ບໍລິການ ມີທັງໝົດ 5.866 ຄົນ ຍິງ 3.238 ຄົນ.

 

ແຫຼ່ງຂ່າວ: ເສດຖະກິດ-ການຄ້າ

ຕອບກັບ

ເມວຂອງທ່ານຈະບໍ່ຖືກເຜີຍແຜ່ໃຫ້ໃຜຮູ້ ບ່ອນທີ່ຕ້ອງການແມ່ນຖືກຫມາຍໄວ້ *